ص : مساء الخير يا ف.
ف : مساء الخير يا افندم..اهلا وسهلا..خير ان شاء الله؟
ص : مالك مفزوع كدا..انت كنت نايم و لا مكالمتي خضتك ولا ايه؟.
ف : بصراحة آه...مكالمة سعادتك خضتني شوية...بس انا سعيد رغم ذلك ان اسمع صوت سعادتك..لكن طلب سعادتك ليا في الساعة دي هو الى مخليني متاخد.
ص : ليه؟.
ف : انت عارف يا افندم الايام دي حساسة وصعبة جدا.
ص : حاول تاخد الامور ببساطة...take it easy
ف : انا يا افندم طالما سعادتك واقف جنبي انا مطمن ومرتاح.
ص : طبعا..لازم تعرف ان انا واقف جنبك..مش انا لوحدي..كلنا في الحقيقة واقفين جنبك..ومش الاعضاء بس...لا دي البلد كلها.
ف : انا متشكر جدا يا افندم..دا الى مخليني مطمن.
ص : بس يعني انا كنت...
ف : خير يا افندم...
ص : مالك قلقان كدا...اديني فرصة اتكلم ما تلاحقشي عليا
ف : لا يا افندم انا لا قلقان ولا حاجة..طالما انت طمنتني.
ص : بس يعني انا عندي لك خبر يمكن يكون مش ولا بد..
ف : خير يا افندم...خير ان شاء الله.
ص : شوف يا ف..انا ما عنديش وقت اخش في تفاصيل كتيرة…لكن انت احتمال ما تدخلشي امتحان الدور التاني..
ف : ليه يا افندم..انا غلطت في حاجة ولا عملت حاجة غلط ولا الناس بتوعي قالوا حاجة مزعلة سيادتك.
ص : لا..لا..الموضوع غير كدا خالص..شوف يا ف...احنا عندنا تقارير مش كويسة ان البلد مش ها تستقر لو ما منعناكشي من دخول الدور الثاني..وبالذات لو انت نجحت ممكن يبقى الامور صعبة...
ف : بس يا افندم دا الامتحانات خلاص على وشك...وبعد كل الاستعدادات دي.
ص : يا سيدي لكل مجتهد نصيب…والامتحانات الجاية كتير.
ف : يا افندم احنا ما عادشي في العمر كتير علشان نذاكر تاني.
ص : انت لسا شباب يا راجل…طيب دا لو الكبير قالوا لو تعال امتحن ها يسيب السرير وييجي جري.
ف : يعني لو سعادتك كنت اديتني رينج قبل كدا..على الاقل كنت مسكت ايدي شوية في المصاريف.
ص : يا ف بطل تهريج..ما احنا عارفين مين الى بيصرف على الحملة...وبعدين يا سيدي لو كنت انت صرفت وانضلعت ما فيش مشكلة احنا ممكن نعوضك..ماتحملش هم الفلوس خالص.
ف : يا افندم انا مش هاممني الفلوس..انا هاممني البلد ووضعها ومستقبلنا كلنا.
ص : يعني انت عاوز تقول ان احنا ما يهمناش مستقبل البلد دي وانت لوحدك الى مهتم بيها؟.
ف : لا..العفو يا افندم..انا ما اقصدشي كدا خالص.
ص : على أي حال انا عاوز اطمنك ان الموضوع لسا ما اتحسمشي..احنا لسا ها نجتمع ونقرر..لكن انا بس حبيت اقولك علشان ما تبقاش مفاجئة بالنسبة لك لو طلع القرار انك ما تخشش امتحان الدور التاني.
ف : بس انا يا فندم انا ذاكرت كل المناهج وهضمتها كويس ومستعد للامتحان النهاردة قبل بكرة.
ص : ياسيدي لو ما دخلتش الدور دا ادامك اربع سنين كمان تكون هضمتها اكتر وتجيب مجموع اعلى يدخلك طب ولا حاجة (يضحك).
ف : بس يا افندم انا كان عندي امل كبير..وكنت باعتمد على دعم سعادتك في الامر دا.
ص : انا دعمي زي ما هو ودعمنا كلنا لكن احنا لسا ما قررناش..الموضوع عاوز دراسة متأنية..الوضع صعب ولازم نكون حذرين ونخلي المصلحة العامة قبل مصالحنا الشخصية..صح؟
ف : طبعا...طبعا يا افندم..ما فيش حد يقدر يقول غير كدا خالص...لكن يا افندم انا كان عندي امل كبير ان سعادتك تذلل لي كل الصعاب دي بحيث ان انا اكمل....
ص : خلي بالك مش انا لوحدي الى باقرر الامور دي..احنا بنقعد كلنا ونتكلم ونناقش ونوصل لرأي في النهاية.
ف : يا افندم بس انت ما حدش يقدر يكسر لك كلام...
ص : لا..لا..خلي بالك الاسلوب دا ما بقاش يمشي الايام دي...لازم كله يناقش ولازم انا حتى ورقم 2 نحترم رأي الأغلبية...صحيح احنا ما بنعملشي تصويت على القرارات لكن بنراعي رأي الاغلبية (ضاحكا) دي بقى واحدة من النتايج السيئة بتاعة الثورة.
ف : ثورة ايه يا افندم..انا اخر واحد ممكن اصدق ان سعادتك تقتنع ان دي ثورة..معقول سعادتك مصدق ان دي ثورة برضه..وبعدين الكبير يا افندم ممكن حالته تسوء لو سمع الكلام دا.
ص : الكبير راح وراحت ايامه..احنا دلوقتي بندور على نفسنا.
ف : ما تنساش ان احنا كلنا في قارب واحد..والكبير معانا.
ص : الكبير ربنا يكون في عونه...خاد قارب لوحده ومشي في طريقه..يعني بصراحة التيار جرفه بعيد..ما تنساش ان هو الى اختار دا بنفسه.
ف : بس انا كان عشمي ان انا اساعده لو نجحت في امتحانات الدور التاني...وكنت كمان...
ص : احنا كلنا عاوزين نساعده...مش اقل منك..لكن لو محاولة مساعدته ها تضيعنا وتودينا هناك معاه..ومش ها تفيده ولا تفيدنا في النهاية..يبقى بلاها المساعدة دي...صح ولا لأ.
ف : طبعا صح يا افندم...بس احنا كدا يعني يا افندم ها نسيبه يواجه مصيره؟.
ص : للاسف دي حتمية تاريخية ما نقدرش نغيرها.
ف : يا افندم ان كان عندي خطة بعد ما انجح..ان انا اعمل مصالحة على نطاق واسع..بحيث نحل كل المشاكل...حتى المشاكل مع المستثمرين...انا مجهز من دلوقتي خطة مصالحة كبيرة للبلد كلها.
ص : خليك ماشي في خططك زي ما انت...واحنا بندرس كل حاجة وما نعرفش ايه القرار...لكن عاوز اطمنك ان وضعك آمن..سواء دخلت الامتحان او الظروف خلتنا نأجل امتحانك..
ف : الى سعادتك تشوفه يا افندم..انا من ايدك دي لايدك دي.
ص : انا ها ابلغك بالقرار خلال اقل من 24 ساعة..بس عاوزك تخف شوية نبرتك ان احنا لازم نحترم الناجح ونقبل بيه وان الجيش ها ندعم الشرعية...والكلام الى من النوع دا…
ف : انا اسف يا افندم..مش فاهم ايه الغلط في الكلام دا.
ص : لا مفيش غلط ولا حاجة بس الناس بتاخد الكلام دا على محمل سيء...بيقولوا ان نتيجة امتحانك موجودة عندنا في الكنترول بالفعل وانك بتتصرف على الاساس دا.
ف : لا يا افندم..انا ما اقصدش اطلاقا ان المح لتطمينات سعادتك لي..انا باتكلم بتلقائية وبطريقة عفوية جدا...(ضاحكا) دا حتى العيال بيقولوا على الانترنت ان انا محشش او سكران.
ص : اتصرف بطريقة طبيعية وتلقائية جدا لحد ما يجيلك القرار وانا الى ها ابلغك بنفسي.
ف : انا متشكر جدا ايا افندم..ومش عارف اقول لسعادتك ايه.
ص : قول لي تصبح على خير.
ف : تصبح على خير يا افندم.
ص : وانت من اهله.
ليست هناك تعليقات:
إرسال تعليق