س: صباح الخير يا ص..ايه اخبارك.
ص: صباح الخير يا افندم..ايه اخبار سيادتك؟.
س: الحمد لله..انا اسف ان كنت انا بازعجك بالليل بس انا قلت اكيد انت صاحي..اكيد بتفكر في الاوضاع زي نوبة حالاتي.
ص: والله يا افندم النوم بقى صعب وعزيز على الواحد.
س: انت ها تقولي لي انا عارف كويس..المثل بيقولك ايه...اسأل مجرب ولا تسأل طبيب.
ص: بمناسبة الطبيب يا افندم...انا سامع ان سيادتك صحتك تحسنت في الايام الاخيرة كويس قوى.
س: يعني الحمد لله..افضل من المرة الاخيرة الى انت كنت عندي فيها قبل الانتخابات باسبوع..بس امسك الخشب لان صحتي زي مصر تمام..مش مستقرة..ساعة كدا وساعة كدا.
ص: لا ما تخافش يا افندم انا قاعد على المكتب وماسك الخشب بأيديا الاتنين...وبعدين انا بادعيلك دايما في صلاتي.
س: ربنا يخليك ياص..على أي حال بانا باشكرك كتير علشان تحسن صحتي.
ص: ازاي يا افندم هو حضرتك كنت بتشتكي من نقص ادوية ولا حاجة وجالك مؤخرا.
س: لا ياراجل..الاولاد في المركز واخدين بالهم مني تمام مش مخليني ناقص حاجة ابدا..
(يضحكان بصوت عال)
س: انا اقصد حاجة تانية خالص...انا صحتي مرتبطة بصحة مصر..لو مصر صحتها تعبانة تبقى صحتي تعبانة..لو مصر صحتها كويسة,,تبقى صحتي كويسة..وانا صحتي ما اتحسنتش في الأيام الاخيرة الا لما حسيت ان مصر صحتها تحسنت وانها على وشك تسيب المستشفى.
ص: مش فاهم يا فندم قصد سيادتك ايه...
س: انا قصدى ان شفا مصر ها يكتمل لما الرجل بتاعنا يمسك الدفة..وانا كمان صحتي ها تبقى بمب...
ص: (يضحك عاليا ويقاطعه) انا مش متابع خط الحديث لان سيادتك وديتني في سكة تانية خالص..وانا باسأل نفسي يا ترى هو ما بيتكلمشي في الموضوع اياه ليه...يكون حد فهمه ان احنا قصرنا في حاجة..انا كدا متابع سيادتك تمام..
س: بصراحة الرجل شكر فيكوا جدا جدا وكان عندي امبارح بالمناسبة..وحكى لي كل الى انتوا عملتوه معاه وقال لي بصراحة لولا دعمكم ليه ما كانش ها يطلع حتى الخامس.
ص: احنا بصراحة ما سبناش حاجة الا ما عملناها معاه..لدرجة ان انا كنت باتوقع انه يفوز من الجولة الاولى بفارق كبير..لكن رغم دا طلع التاني.
س: (ضاحكا) معلشي اصله طالب غبي وما بيذاكرشي كويس..وعاوز شوية دروس خصوصية علشان ترفع مستواه..انا كنت عارف انه ها يغلبك ويقرفك طول السنة دروس وبهدلة وفي النهاية مجموعه مش ها يوديه حتى معهد دودة القطن.
(يضحكان سويا)
ص: احنا ما سبناش مادة الا ما اديناه فيها دروس حتى في الرسم والتربية الرياضية وما سبناش مدرس الا ما قعدناه معاه يشرح له ويوضح له..حتى في لجنة الامتحان كنا بندخل له الكتب ونخلي المدرسين يكتبوا له.
س: معلهشي ان شاء الله في الدور التاني يجيب مجموع حلو يخش طب ولا هندسة ويتربى في عزك وتفرح بشهادته الكبيرة.
ص: احنا ها نفرح كلنا مش انا لوحدي..بس الدور التاني امتحانه اصعب من الدور الاول..انت عارف الظروف.
س: لا اسمع..ماتقوليش لا ظروف ولا جوابات...انت الى ماسك الكونترول من الاخر وانت الى بتطلع النتيجة.
ص: يا افندم العملية فيها صعوبات كبيرة..احنا ما نقدرش نتدخل بطريقة واضحة..انت عارف حساسية الموقف والدوشة الى عملها نجاحه في الدور الاول.
س: خلي بالك انت ممكن تبوظ طبخة كبيرة جدا تعبنت فيها سنين علشان شوية ملح..ما تمسكشي ايدك في البهارات البسطية دي....اوعى...
ص: الموقف يا افندم ما يستحملشي...
س: الموقف لازم يستحمل..بلاش علشاني انا علشانكم انتم ومصالحكم...انتوا فكرتوا في السيناريو التاني لو هو ما جاش ها تبقى الاوضاع عاملة ازاي.
ص: يعني ها نعمل ايه؟
س: اضغط شوية..انتوا من ساعة ما مسكتوا السلطة والامور ماشية كويس..مش معقول ها تقطعوا الشوط دا كله وتيجوا تبوظوا المسائل علشان فركة كعب.
ص: الفركة دي ممكن ارواح كتير تضيع فيها.
س: ياما ارواح راحت وها تروح..وانت قالق نفسك ليه..لو فيه واحد بيموت الظهر بيكونوا مخلفين عشرة بداله قبل العصر.
ص: احنا عاوزين صورتنا ادام العالم ما تبقاش وحشة..هي زي الزفت بالفعل ادام الشعب.
س: سيبك من الصورة والكلام الفاضي دا..عاوز اقولك على حاجة مهمة جدا..انت لو قعدت مكاني يومين اتنين بس ها تكتشف ان موضوع صورتك ادام العالم دي وهم مالوش معني ومش ها تفكر فيها للحظة...وبعدين انت مش شايف الى بيحصل في سوريا..تفتكر لو بشار حط في دماغ امه الصورة والكلام الفاضي دا كان استمر اسبوع..كان زمانه مرمي دلوقتي في الضاحية الجنوبية عند نصر الله او في أي مستشفى في دمشق.
ص: انا يا افندم ما باقولشي ان احنا مش ها نساعده...لكن الموضوع ها يبقى محسوب..هو مفروض يستعين بالناس بتوعكم القدام زي الجولة الاولى واحنا ها نطنش الى في ايدينا ان احنا نطنشه..ونعمل الى في يدينا نعمله..ومش ها نقصر معاه خالص.
س: من غير دعم مباشر مش ها يحصل معهد دولسي..وانت ما ترضاش اخينا التاني وجماعته يخشوا طب القصر العيني والرجل بتاعنا يسقط..ماتنساش ان سقوطه ها يبقى سقوط لينا كلنا...اوعى تفهم ان اخينا وجماعته ها يسيبوكم ولا ها يسيبوني..لا..انتوا بتحملوا...
ص: احنا اعلنا ان ان احنا مش ها نتولى أي مناصب ومش ها نشتغل بالسياسية بعد انتخاب الرئيس علشان نقطع أي سكة على أي حد.
س: دا مش كفاية..دا يمكن سبب ادعي انهم يتوحشوا معاكم..يمكن لو في السلطة ها يخافوا منكم شوية..وبعدين فيه جرائم لا تسقط بالتقادم..وانت عارف المحاميين في مصر يقعدوا ينفخوا في الحبة لما تبقى قبة وبعدين يشيلوها يحطوها في الطريق العام وتبقى كارثة.
ص: انا حاسس يا افندم ان مخاوفك مبالغ فيها شوية.
س: لا..لا..اوعى تكون فاهم انا مهتم..انا مش ها تفرق معايا لو خدت حكم بخمسين سنة سجن او حتى اعدام...لو سجن اديني قاعد زي ما انا قاعد لو اعدام ها ارتاح خالص..انا بافكر فيكم انتم...
ص: ما تقلقشي علينا يا افندم احنا فكرنا في كل حاجة وما سبناش خرم ابرة ممكن يعدي منه أي خطر. لكن بالنسبة لسيادتك..لو عاوز تزوغ على برة ممكن نساعدك في الموضوع دا.
س: انا يهمني مصر يا اولاد..انا كبرت على الهرب والتنطيط والكلام دا..اروح اقعد في السعودية زي زين العابدين؟..لا مش دا الى انا عاوزه...عاوز اعيش في مصر واشوفها بترجع تاني لسكة السلامة الى انا سبتها عليها. عاوز اسيب فيها ناس امينة عليها وبتحبها زي الرجل بتاعي. وعلى فكرة انا مش طمعان منه في عفو ولا حاجة..وهو لما كان هنا قال لي قرار العفو ها يبقى جاهز بعد اداء القسم على طول..انا قلت له لأ... انسى الموضوع دا دلوقتي خالص انا مش مستعجل اسيب المركز.
ص: احنا عاوزينه اكتر من سعادتك وها نبذل اقصى مافي وسعنا لكن باقول لسعادتك وأكد لك تاني النتيجة مش مضمونة..
س: انتوا عملتوا مع الرجل حاجات الحزب في عنفوانه ما كانش بيقدر يعملها..انتوا كملوا جميلكم..ما تقوليش ان الموقف محتقن والموقف مورم..الى انا اعرفه ان الامور لما يكون لازم تمشي في اتجاه معين لازم تمشي فيه...الا اذا كان بقى فيه حاجات انا مش واخد بالي منها ولا سيناريوهات انتوا حاطينها بقى ونايمين عليها...
ص: سيناريوهات ايه يا افندم الى سعادتك بتتكلم عليها..ويا ترى هو الى قالك الكلام دا؟.
س: هو لا اتكلم ولا نيلة..دا انا عمري ما شفت حد حاسس بالجميل تجاهكم زيه..طيب تعرف انه بيقول لي لولا انه مكسوف ولولا ان دا مش سلوك عسكري كان عاوز يوطي على ايدك يبوسها...هو ما قالش حاجة..الكلام دا جاي من برة...
ص: كلام ايه يا افندم الى جاي من برة؟.
س: اهو كلام بقى يا ص..انت عارف الناس اهي بتتكلم في كل حاجة من ساعة الهبابة دي الى بيسموها
الثورة.
ص: مش ممكن اعرف الكلام دا ايه علشان اطمن سيادتك اذا كان صح ولا غير كدا.
س: بصراحة..بيقولوا ان ما فيش جولة اعادة...وان انتوا مرتبين ان انتوا تستمروا في السلطة سواء تمت جولة الاعادة او ما تمتش.
ص: دا كلام غير حقيقي بالمرة لان احنا فعلا عاوزين نرتاح..بس عاوزين نطمن ان احنا سلمنا مصر للشخص الصح...
س: انا مش فاهم...قصدك ايه يا ص.
ص: بكرة يا افندم سيادتك ها تشوف بعينك..لكن عاوز اطمن سعادتك..دعم الرجل بتاعك دا اولوية من اولوياتنا..لكن لو ما جابش نتيجة..تفتكر ها نقعد نتفرج؟.
س: مش ممكن اعرف انتوا ها تعملوا ايه؟.
ص: للاسف يا افندم دي سيناريوهات مش مسموح لي ان اتكلم فيها مع حد..لكن عاوز اطمن سيادتك تمام ان وضعك ووضع الاولاد امن جدا جدا سواء في مصر او برة..ودا كل الى اقدر اقوله لسيادتك في الوقت الحالي...وتصبح على خير علشان انا عاوز اصحى بكرة بدري.
س: تصبح على خير..بس ياريت تبقى تسمح لي اكلمك كل كام يوم من غير ما اعطلك.
ص: سيادتك ممكن تطلبني في أي يوم بس يفضل دايما يكون في الميعاد دا....تصبح على خير.
س: وانت من اهله.
ليست هناك تعليقات:
إرسال تعليق