بيان بدء الحملة الانتخابية لمرشح رئاسي فلولي الهوى
(من مسرحية "حديقة العاهات2" التي ستنشر قريبا على هذه المدونة)
(النسخة الموجهة للمجلس العسكري)
عاوز ابقي رئيس لمصر وابسط كل الفلول
ونعيد امجاد نظامنا وندلع الـــــــــــديول
والشعب كبيره يعني نرميله عيش وفـول
ولو ضمضم وزرجن حبة كلام معسـول
ولو زاد عن حدوده ها نعمله الاصـــول
ها يمشي لحاله تاني ويقول احسن حلول
ها تشوفوا ايام سعيدة وتمدولي على طول
*****
عاوز ابقى رئيس لمصر واعيد ايام مبارك
والشلة بتاعته ترجع وتخوض كل المعارك
والكعكة يقسموها وينول كل الى شــــارك
والكل ياخد نصيبه ونقوله الله يبــــــــارك
*****
عاوز ابقى رئيس بلدنا واعمل كل الى كان
امشي على درب حسني ونعيد امجاد زمان
من قمع وضرب ماشي مع سجن وامتهان
والقهر الى معاشرنا والقتل بالمــــــــجان
والحزب الوطني يرجع بعد ماساب المكان
ونظامنا يشد حيله بعد ظــــــــروف الهوان
والسيس يرجع لاصله مجموعة م الخرفان
*****
نفسي امسك الرياسة وامسح كل الى فــات
ها نقول الثورة كارثة وآفة م الآفـــــــــات
لا ثورة ولا دياولو دي مؤامرة م الخواجات
دي جاية من امريكا وشغل استخبــــارات
عاوزين يحتلوا مصر ويقسموها اتـــلات
والشعب دماغه لاسعة ونصه كمان عاهات
لو قلنا له ها يصدق ويروح ع الأنتيــكات
*****
عاوز ابقى رئيس لمصر وولادكم ينهبوهـا
وان فاضت حاجة منهم اصحابهم يشفطوها
ويلموا فلوس بلدنا في سويسرا يشونـــوها
وان قامت ألف ثورة ولا نكلة يرجــــعوها
*****
يا مجلسنا الموقر ساعدوني عشان نــــعدي
د احنا ف مأزق خطير والتيار مش مـــــهدي
ايامنا الجاية صعبة وصباحنا مش منـــــدي
الشعب عرف طريقه وعرف على فين يودي
والموج عالي علينا والمركب مش مــــقضي
(النسخة الموجهة للشعب)
انتخبوني يا شعبي علشان نبني الكنــــــــانة
دا مبارك سابها ضايعة متشحتفة وتعبــــــانة
سابهالنا خرابة فاضية ودا من فعل الخيــــانة
عاوزين نبنيها تاني بالحب وبالأمــــــــــانة
واللى يمد لنا ايده ها نرحب بيه مــــــــعانا
الا فلول النظام هما سبب المـــــــــهانـــــة
*****
انتخبوني يا شعبي يا حبايبي يا قلب قـــلبي
علشان نبني بلدنا واحلف لاوفي بوعــــدي
فترة بس ابنيهالكوا واسيبها للى بعـــــــدي
بلدي وها اعملها جنة وايامها تبـــقى وردي
تبقى مصر العظيمة ونشوفها نقول ياوعدي
ومهما تشوفوا تاني ها تقولوا هو عـــــهدي
*****
ما فيش وراثة تاني ولا سرقة ولا امـــتهان
أي مواطن في عهدي راح يتاوى في مكان
فيلا او قصر جاهز فيه الاوض ألـــــــــوان
وعربية كبيرة تشيله مع الجيـــــــــــــران
تعليم وعلاج بلاش والأكل بالمـــــــــجان
انتخبوني ها انقلكوا بكرة لبر الامــــــــان
*****
جماهير مصر العظيمة انتخبوني رئيـــــس
خلوا البلد تنعنش والفقر يروح فطيــــــس
والعيشة تبقي وردي والشعب كمان يهيص
وفلوسنا تبقى لينا بعد ما خادها الخســـيس
مصر امانة في ايديكم ماتبيعوهاش بالرخيص
ليست هناك تعليقات:
إرسال تعليق