حول محاولات الجامعة الامريكية المشبوهة في العراق


ياعم موسى سيبهم في حالهم
لا هاتصالحهم
ولا هاتفاجئهم
ولا هاتعالجهم
بعد ما ماتوا ومات املهم
@@@@
كان فين قادتنا لما غزوها
بوش وكلابه ودمروها
كانوا ساعتها جوة الجحور
وكل واحد بيطوف بعرشه ويناجي ربه
ويقضي ليله يحرق بخور
@@@@
البعض ساعد وفتح بلاده على اخرها كما الماخور
والبعض قدم اكبر قواعد وقال معاهم يبقي المصير
والبعض صامت من رعبه صامت صمت القبور
دم العراقي في نهر دجلة نده عليهم
باسم الاخوة
باسم العروبة
باسم الشهامة
باسم الضمير
لا حد منهم سمع صراخه
ولا حد منهم فكر للحظة
وقال مصيري نفس المصير
الكل همه ان يحمي عرشه
ويملا كرشه
ويبيد ف شعبه لو قام يثور
@@@@
الدم صابغ ايدين اميركا
الدم نازل من المخالب
بيشق ترعة او يملا بركة
واحنا معاهم في الذنب واحد
احنا معاهم في الجرم شركة
@@@@
امريكا كلبة صابها السعار
لو دم مسلم او دم عربي
تشرب ما تشبع
ومهما تشرب
بيزيد سعارها
ويزيدها نار
@@@@
دم الضحايا
في وادي دجلة
بيقول سكوتنا
ما فيهوش نجاة
والدور علينا
ها ييجي بكرة
او بعد بكرة
ما دام رضينا
نخفض رؤسنا
ونهين نفوسنا
مع التتار
@@@@
دماء بتجري
زي الجداول
دم العراقي
مش هو دمك؟
مش هو دمي؟
لا في كرامة
ولا شهامة
والخزي أوضح
من النهار
@@@@
يا عم موسى
بعد ما ضاعت
جايين ندور على البقايا
حكامنا سكتوا
لاجل الكراسي
وشعوبنا يأست
واليأس قاسي
وسكوتنا هو
بدء النهاية
هو القرار

المواصفات القياسية للزعيم العربي - الايزو

فخور بالحقارة والعمالة@@@ ولا يأبى الترفع عن سفالة

يسير بين الناس مختالا بجهله@@@ ويزعم انه ضد الجهالة

يمن على الجموع اذا تحدث@@@ وقوت الشعب هو فضل ماله

اذا ما الشعب حاول ان يغمغم@@@ اجاب في غضب الشعب عالة

الا يكفيهم العيش في ارضي@@@ واحساني لهم عند السؤال

يرى في الشعب مخلوقات ادنى@@@ تقربه اليها هو المحال

وفي التعذيب لذته الكبيرة@@@ وللموت في حضرته جلال

بقبضته العظيمة يجف نهر@@@ وامر منه تنتفض الجبال

عظيم لو مشى بين الرعية@@@ وفأر ان هبط في بلاد غال

اذا سار الى بوش ورهطه@@@ تراه يختفي بين النعال

شرعية جمال مبارك وشرعية الاخوان

انت الشرعي وابوك الشرعي@@@ ياحبيبنا يا ابن السلطان
انت وابوك ساكنين ف قلوبنا@@@ لافي احزاب ولا فيه اخوان
انت تتاجر ف ديون مصر@@@ وابوك بيسمسر ف المليان
مصر ف عهد ابوك طهقانة@@@ والشعب بحاله قرفان
تلاتين سنة بتخربوا فيها@@@ وتنتهكوا حقوق الانسان
شرعيتكم جاية من بوش@@@ وتشيني وباقي الجرذان
الشرعية ان انت وابوك@@@ تملوا سجونكم بالشبان؟
الشرعية الشعب يجوع@@@ والشلة كرشها مليان؟
الشرعية ان احنا نعذب@@@ شعب بلدنا بالمجان؟
علشان نرضي بوش وغيره@@@ ويسيبنا نقعد ف أمان؟
لو طلبوا واحد بالاسم@@@ نبعت لهم الحارة كمان
انتوا هدفكم خدمة بوش@@@ هو سايبكم كده احسان؟
طول ما انتوا بتخدموا اغراضه@@@ الكرسي ها يفضل عمران
الاخوان باعوا المحروسة@@@ وسمسروا على باقي العربان؟
الاخوان دبحوا اولادنا@@@ وباعوا تاريخنا للشيطان؟
الاخوان هربوا اموالنا@@@ وخلوا الشعب ف حال خذلان؟
الاخوان سمموا ايامنا@@@ ونشروا ف اراصينا السرطان؟
شرعية الاخوان م الشعب@@@ وما بينكرها الا العميان

الفساد والعبارة الغارقة

الفساد عنوان لمصر ***هو معبود النظام
ناس بتفطر م الزبالة*** وناس بتتغدى حمام
وناس تنام من جوعها بدري*** وناس تبعزق والسلام
ناس بتهبش مليارات*** وناس تشوفها ف المنام
دا النظام هو الفساد ***والفساد هو النظام
الفساد ويا النظام*** حالة صعبة م الغرام
لو يبعد عنه لحظة ***تبقي ايامه سخام
كل عهده برد جامد*** والفساد هو الزكام
خلوا ايامنا كريهة*** خلوا ليالينا ضلام
لا عدالة ولانزاهة دبحوا*** ف نفوسنا السلام
نظرة واحدة للثنائي ***تلقى حب وانسجام
لما يستشري الفساد ***ينسجم رأس النظام
ولما ينتعش النظام ***تنفتح هوة فساد
يغرفوا منها الاحبة*** والبطانة والولاد
الفساد مكتوب علينا ***بلوى حلت ع العباد
الفساد عند اخينا*** اعلى درجات الجهاد
لو تروح تطلب وظيفة*** يقولك ابن مين يا واد
لو معاك وسطة كبيرة*** تيجي بكرة ف المعاد
لو ما فيش واسطة تروح ***تبقى ايامك سواد
لو ابوك كان من البطانة*** وحبه لابد ف الفؤاد
تبقى مجموعة وظايف*** حتى لو مخك جماد
لو بتطلب قرض مالي*** تبتدي مشروع صغير
تبقى هاتشوف النجوم ***بالنهار والليل مغير
ولما تفشل ف السداد*** يسجنوك ..نفسك قصير
لو ابوك كان م البطانة*** اسمه لامع ف البلاد
الفلوس تيجي لعندك ***ما تراعيش مواعيد سداد
لو ترخص عربية ***تشرب المر ف كؤوس
ولو يكون ورقك تمام ***برضو راح من الخوف تلوص
تدفع الشاي والعمولة*** والفطار وياه غموس
لو معاك عبارة خردة ***حتى لو ما فهاش تروس
راح ترخص في السليم*** المهم ادفع فلوس
وان غرق ركابها جمعا ***يعني ايه تمن النفوس؟

مجلس الشعب الجديد واللعب المشروع


ياجماعة رحبوا بالمجلس@@@عمي سرور بيقول دا موقر

ناس من اشرف خلق الله@@@ولا واحد فيهم بيزور

جاي لنا ف انتخابات شفافة@@@ونزيهة فوق كل تصور

انتخابات كلها سلمية@@@لا مرشح ولا ناخب اتعور

والامن ياعيني بحياده@@@خلى تاريخنا كله منور

كان ياخذ الناخب من ايده@@@ما يسيبهوش غير عن الدفتر

ويسهر على راحته لساعات@@@سواء كان قبلي ولا مبحر

وبعد ما بيصوت ويخلص@@@يديلو بوسة ذي السكر

حتى صحف امريكا قالتها@@@سلوك الامن في مصر تحضر

خلونا نتعلم منهم@@@كفايانا غطرسة وتكبر

لافي ناخب شب على السلم@@@وقفز من شباك المنور

علشان يوصل للصناديق@@@ويدلي بصوته ودراعه متكسر

ولا واحد ضربوه بالسنجة@@@او بالسيف ابو نصل مزنهر

والصحفية شافوا حرية فشر@@@ان شافها عجل في مجزر

الي بيكتب كان على راحته@@@ والى يصور كان بيصور

لافي صحفي كسروا ادواته@@@ولا واحد حبسوه ف المخفر

ولا واحد فختوا له عنيه@@@وكتب فيهم الفين محضر

*******

بوش بعت من عنده رسول@@@ يهني الريس على مأثرته

قال له الوطني عمل انجاز@@@ انت رقيته او بخرته؟

انا جايلك بتهاني الريس@@@بوش واعوانه وادارته

بيقولك انت الى حبيبه@@@وانت الى هاتفقع له مرارته

بيهنيك على ثقة الشعب@@@فيك وف حزبك وانت منارته

شعبك شايف فيك احلامه@@@شايف فيك امله ومفخرته

تلاتين سنة من حبه ف حكمك@@@ سايبك تلعب ف مؤخرته

كلمة من القلب من مبارك لشعبه


ياشعبي اسمع كلمتي
مهما تحاور
او تناور
او تعافر
مش راح اسيب لك ضيعتي


@@
ياشعبي صحصح خليك فريش
انا لا انا خايف
من انتفاضتك
ولا كوندوليزا
ولا أبوها
ولاحتى بوش


@@
شعبي وعارفك ماتختشيش
تخاف بعينك ولا تستحيش
بيهيجوك
ويحمسوك
ويحرضوك
وكله يطلع على مافيش


@@
فاكرين مدابح يوم الاعادة
قتلت منكم
وجرحت منكم
ماتعدليش
وبوش عارف
وسفيره شايف
وقال له طنش
كل الحكاية ماتهمنيش


@@
كلمني بوش بعد النتيجة
قال لي يامجرم
يا ابو قلب قاسي
طب ليه بتقتل
وليه بتجرح
لما انت عارف
حزبك ها ياخد
كل الكراسي
تعبت قلبي
ووجعت قلبي
ياابو رمش جارح
مطرح ما يمشي
يزرع مآسي


@@
كلام احبة
بيزيد شوية
ويقل حبة
لكن قلوبنا
مهما بتبعد
مسيرها ترجع
نفس المراسي


@@
ياشعبي سيبك م الغضب
والهم سيبك
دا انا كل همي خدمتك
دا انا حبيبك
مهما تطول في الجفا
راح امد في حبال الوفا
مش راح اسيبك
دا انت نصيبي وقسمتي
وانا نصيبك




توقيع
العاشق لشعبه

نيرون وسيناريوهات الخروج المقترحة


يا اخينا ما تولعهاش @@@ روح في مصيبة ما تتعبناش
الشعب بحاله قرفان @@@ منك والشلة الاوباش
يعني يا تحكمها بالعافية @@@ يا اما تدخلها الانعاش
خمسة وعشرين سنة تأخير@@@ ضيعت المحروسة بلاش
اسيادك في واشنطن قرفوا@@@ بيقولوا نظامك غشاش
عمال تدى في تنازلات @@@ وهما يقولوا ما شبعناش
وخلعت لهم كل هدومك @@@ ما بقاش حتى حتة شاش
والشعب اهو رافض الاعيبك @@@ بيقولوا دا واحد بكاش
عارفين ان معاك قرشين @@@طول عمرك راجل هباش
اخلع بيهم بقى على برة @@@ وكأنك بتسوي معاش
حاول تخلع كدة دكاكيني@@@ في الضلمة كأنك خفاش
فكر من دلوفتي ف منفى @@@ وادرس خطة وماتنساش
امريكا مش راح تفتح بابها@@@ لواحد كان خدام ببلاش
واحد باع بلده ومصيرها @@@ عشان يرضيهم ومانالهاش
في اوروبا برضك هانجيبك@@@ بينوشيه قبلك ما عملهاش
&&&&&
انا من رأيي تروح اثيوبيا @@@ها تعيش "كينج" بين الاحباش
بالقرشين ها تعيش سلطان @@@ انا عارف تأثير الكاش
لكن وانت بتصرف فكر @@@ ان الهبرة اساسها قروش
من ناس بيبيعوا في الشارع @@@ اوعمال في ايديها خدوش
او واحد مش لاقي الهدمة@@@ لاولاده ولا حتى العيش
دول ملاليم من دم غلابة @@@ وانت بتاكل بيها جلاش
كل جنيه مسروق من واحد@@@ او صبي نايم ما تعشاش
وانت ياعم تفنجر بيها @@@ وايدك فرطة في البقشيش
بس هاتصرفهم دولارات @@@ اصرف فنجر ما تخليش
وضميرك لو حاول يصحى@@@ اديها ويسكي ولا حشيش
بس انا مش قلقان بالمرة @@@ لان ضميرك انت مافيش
دا لفظ انفاسه من بدري @@@ وانت دفنته وسط الهيش
عيش ايامك متع نفسك @@@ اليوم بيعدي ما بيجيش
لحد ما تيجي اللحظة اياها@@@ والروح تخرج من النغاشيش
&&&&&
لو اثيوبيا مش ع المعدة @@@ اطلع بقى ع السعوديين
ما انتش ها تكون اول واحد @@@ سبقك ليهم عيدي امين
دول ناس كرما فلوسهم ياما @@@ بيدو رواتب بالملايين
والاولاد راح يعملوا بزنس@@@ بدل الهبرة ها يبقو اتنين
تشرب شايك في العصرية@@@ ف فيلا ف جدة عليها حارسين
وتفكر في ايام الماضي @@@ والى سحلته من المساكين
فكر في القتل المجاني @@@ وف صرخات المستغيثين
في التعذيب ومهارتك فيه @@@ والشهرة الى ما نالها اتنين
&&&&&
ولو حسيت بفراغ ايامك @@@ راح يدوك الربع الخالي
ابنيلك فيه قلعة كبيرة @@@ واعمل فيها رئيس من تاني
وانزل شوف احواله يوماتي @@@ها تحس ان الوضع سليم
وانك لسا زعيمنا الاوحد@@@ بيحكم شعب صبور وحليم
اصرخ بين كثبان الرمل @@@واصدر قرارات او مراسيم
ها تلاقي كله يدين بالطاعة @@@والصمت ها تسمعه ترانيم
&&&&&
اطمن ع الجثة يا ريس @@@ هانجيبها ملفوفة ف خيش
لكن الدفن ها يبقى عوايلي @@@لا فيه مزيكة ولانار م الجيش
هانحاول ندفنها بسرعة @@@ مش عايزين احزاننا تعيش
لان بلدنا ها يبقى تغير @@@ وانقرضوا باقي البراطيش

الشعوب العربية وحكامها

شعوب بلوناها مثل القطيع @@@ تهيم في اودية للخنوع
تلوب السياط على ظهرها @@@ فتأبي التلفت تأبى الرجوع
وصوت الطاغوت يهز الفؤاد @@@ويضفى على الذل لون الخشوع
يسيرون مالهم من مقصد @@@ ولا فجرهم ينتهي بالبـــزوغ
وجلادهم ينضوي خلفهم @@@ يقول انا رب هذى الجموع
انا الذي يمنح حق الحياة @@@ وحق التنفس حق الهجوع
انا الذي يمسك نبع الضياء @@@ ويمنح للنجم حق السطوع
********
ويمشي القطيع في واي الردى @@@ فيسقط جيل وينهض جيل
وجلاد ينفق وجلاد يولد @@@ ويمضي القطيع في واد طويل
عهود تكر وايام تمضي @@@ ونفس المسير الممض الذليل
لا نوم يرون ولا راحة @@@ ولا راية ولا حتى دليل
وصوت السياط يشق الهواء @@@ ويسقط والظهر ظهر عليل
وينطلق الصخب المنتشي @@@ من الجلادين كصوت الصهيل

صوتك للحزب الوطني أمانة!!!!



الحزب الوطني بيوجع بطني ****كل ما تيجي السيرة ياناس


زرت اطبا وزرت مشايخ ****قالوا ابعد عن وجع الراس

لو قابلك واحد م الوطني**** ابعد عنه ونادي الناس

قول ياجماعة الحزب دا خرب**** مصر بلدنا بدون احساس

تلاتين سنة والحزب بيحكم ****ما شفناش منه الا الافلاس

ويا الحزب ما فيش متسقبل ما في ****وظائف مافي مساكن كله خلاص


الحزب دا خرب اوطاننا *** وخلا المنطقة تبقى مداس

لعدونا بوش وامثاله ****م الجهلة وباقي الانجاس


ابعد عن مراشيح الوطني**** لو بيهمك أمر الناس

لو اخوك من مراشيح الوطني ****قل له انا قلبي فيه وسواس

@@@@
اوعى تصوت لابن الوطني ****لو ها تصوت للشيطان

اوعى تصوت لابن الوطني **** لو كان هو اعز انسان

لو كان اخوك متشرشح فيهم**** قل له الشعب تعيس تعبان

صوتك دا امانة ف رقابتك **** اوعى تفرط فيه لانسان

صوتك دا امانة في رقابتك**** حسابه كبير عند الديان

لما تبيع صوتك للوطني ****كده بتساعد ف الطغيان

بتساعد على نشر الظلم*** ونشر الفقر كمان وكمان

الحزب فساده مالوش اخر*** شوف اذنابه ازاي عايشين

عز وثروة مالهاش اخر**** كله بيهبش بالملايين

عمره ما فكر ابدا فينا ****ولو هانجوع على بابه سنين

8 نوفمبر 2006

حكم العسكر وشيوخ النفط


حكم العسكر
زي السكر
مهما يقولوا
حكم تخلف
حكم تأخر
حكم تعسف
انا على قلبي زي السكر
@@@
شفت شعوب في الشرق الاوسط
امريكا عاملاها لعبتها
تقتل فيها وتبيد فيها
وفي فم الحاكم تتغوط
ولما بينسى نفسه ساعات
ويفكر يحتج ويرفض
بتشيله من ايده ورجله
هيلا بيلا وترميه م المسقط
قلت ياناس ايه الى بيحصل
قالوا يا ابني دا حكم العسكر
حكم العسكر شهد مكرر
@@@
شفت شعوب يحكمها ارذالها
نهبوا الثروة وقتلوا امالها
عايشة برة اطار العصر
طول عمرها بتسوء احوالها
واميركا يترعى كراسيهم
طول ما النفط رخيص يوصلها
قلت يا ناس ايه الى بيحصل
قالوا يا ابني دا حكم العسكر
حكم العسكر مسك وعنبر
@@@
شفت شعوب امريكا بتبيدها
تفنيها وتدوس كرامتها
وبقية الحكام تتفرج
وتقولك اهي دي مصيبتها
هي الى جابتها لاراضيها
وهي الى تدور على مخرج
قلت يا ناس ايه الى بيحصل
قالوا يا ابني دا حكم العسكر
حكم العسكر فل وزعتر
@@@
شفت دول عايشة ف اذلال
رغم النفط ورغم المال
اوامرها بتيجي من برة
وحياتها مسمومة ومرة
ولما مواطن يلفظ كلمة
يجعلوا من تعذيبه مثال
قلت يا ناس ايه الى بيحصل
قالوا دا حكم شيوخ النفط
حكم نزاهته ما فيهاش شك
@@@
شفت دول مالهاش مستقبل
مهما شعوبها تكافح تفشل
علشان الحكام العملا
باعوا حاضرها ومستقبلها
وباعوا الصوفة وحتى المغزل
قلت ياناس ايه الى بيحصل
قالوا يا ابني دا حكم العسكر
حكم العسكر ورد معطر
@@@
شفت دول حاكماها العاهة
ونخبتها عايشين في بلاهة
وشعوب ضايعة الظلم لاهيها
عن اوضاعها وعن مآسيها
وامريكا بتفتح مخالبها
نفس الخطة القذرة اياها
قلت ياناس ايه الى بيحصل
قالو ا يا ابني دا حكم العسكر
حكم العسكر زي السكر

حاجة تخلي العقل يجن

حاجة تخلي العقل يجن
راجل مش مكسوف من شيبته
ولا من خيبة حزبه وخيبته
ماشي يزور في انتخابات
ماشي يبلطج على مخاليقه
كاتم على انفاس الشعب
ولما اميركا تقول له ستوب
يبدأ يدي في تنازلات
@@@
حاجة تخلي العقل يشت
راجل داخل ع التسعين
لا هو بيفكر
ولا يتذكر
ولا عارف رايحين على فين
ناصح بس يلون شعره
ناصح بس يعذب شعبه
ويزود بهدلته وفقره
عمر الشعب ما شاف ف ايامه
الا الهم و الا الطين
ولما تقول يا عم ارحمنا
خلي الناس تعرف تتنفس
يقول والضيعة ها اسيبها لمين
@@@
حاجة تخلى العقل يضيع
راجل فاهم مصر دي عزبة
واولاده فيها بتتدلع
الى يهرب
والى يخرب
والى يجرب
ولما تقوله الشعب مضمضم
يقول وانا مالي
خلي الشعب بحاله يفرقع
@@@
حاجة تخلي العقل يشيط
حزب مافيش واحد بيحبه
ولامخلوق بيوحد ربه
فضايح اعضائه بالجملة
مثبوتة ف محاكم عليا
مثبوتة ف كتب التأريخ
ولما تقول له ياحزب افتينا
تلاتين سنة وانت بتحكمنا
لما الفقر نضح ف جبوبنا
ناوي تودينا على فين
هايقولك بالصوت البارد
انا ناوي اطلعكوا لفوق
ناوي اوصلكوا للمريخ
@@@
حاجة تخلي العقل يطير
شعب حياته زي النيلة
عايش ايامه بالزق
عمره ما فكر يوم يتذمر
او يرفع ايده ويحتج
ولا خطرت على باله الثورة
قاعد جنب الحيط يتاوب
واحدة ياعيني مكسورة الخاطر
متململة وعليها الدورة
ولما نقول يا شعب اتحرك
يمكن ييجي بكرة الافضل
يقولك بالصوت النعسان
مهما ها نعمل مش ها نغير
@@@
حاجة تخلي العقل يروح
دولة كبيرة بس حقيرة
حاكماها عصابة شريرة
عاملة زعيمة للحرية
بس تبعبع
بس تجعجع
واجعة دماغنا بس كلام
ولما واليها في مصر يزور
ولا يبلطج
ولا يعور
تخرس خالص ما تبلضمش
وتصيب لغلوغها الاورام

The Storm, Pierre Auguste Cott

الرئيس يؤدي اليمين


احلف بسماها وبترابها*** لابيع شبابيكها مع ابوابها
واخلي خرابها اعجوبة*** ويقولوا الرجل خربها
لابيع مصانعها وشركاتها*** واغرف اموالها واهربها
احلف لاجوع اولادها ***واشحتف من الهم فؤادها
وابدد ثروات الامة ***واخلي لصوصي اسيادها
وابيع مواردها لاعدائها*** واخليها تغرق في فسادها
راح تمشي دايما في النازل ***وها ازيد في ركودها وسوادها
@@@
احلف بايامي الى قضيتها*** كاتم انفاسها ومهجتها
لاضيع شعب المحروسة*** وما اسيب تعريفة ف جعبتها
احلف بحياتي لادمرها *** لو حتى ها ارتب خرجتها
وامشي انا والحزب واولادي*** نبكي وياكوا في جنازتها
الضيعة دي شيء من املاكنا*** ومعانا سند ملكيتها
لما عبيدها يفتحوا فينا*** ها نقول تخرب من لحظتها
لو مات سكان المحروسة*** تحيا الاسرة مع اذنابها
الاسرة بنت دولة عظيمة*** والعز اهو ماشي في ركابها
@@@
احلف بولائي لامريكا*** ورئيسها الى مطلع عيني
لاخلي المنطقة دي خرابة*** واضيعها ما بينه وبيني
امريكا اولى بثرواتها*** من جدة لحد السكاكيني
د ا ولائها معشش ف فؤادي ***مكتوب بالعافية على جبيني
راح افني حياتي ف خدمتها*** طول ما انا الكرسي مدفيني

اغنية الشعب بعد نتيجة الانتخابات

نجاحك يامبارك غم قلبي**** وخلاني اسير في الشارع ابكي
نجاحك يامبارك غم قلبي**** وزاد الحزن من المي وكربي
اقول ياربي احنا شعب بائس ****بقى لنا ربع قرن ف نحس ازلي
فيه ايه ياربي لسا ما خربوش ****دا احنا ايامنا واقفة ومش بتمشي
يارب ارحم عبادك م الغلابة**** دا حسه ميت والسلطان بيغري
يارب انت الى ادرى بالعباد**** وادرى بالالم جوة ف صدري
وادرى بالهموم الى شايلها ****سواد الشعب والاحزان بتفري
يارب انت ابتليتنا بالمصيبة****بعزك امسحه من الارض دوغري
دا ربع القرن ضيعه ف الخراب**** واحنا ما نعرف هو مصري ولا غربي
لكن واضح غرامه بسيدنا بوش**** ومطرح ما القلوب بتحب تدبي

المستقبل الاسود

مسرحية قصيرة جدا

شارع امام مجلس الشعب وعندما يرتفع الستار نسمع صوت الجماهير وهي تهتف ولكننا لانراها.
المسرح قاعة كبرى بها مقاعد ومكاتب وفي العمق جدار به ابواب معلق عليها
صور بحجم الباب. يبدو المسرح معتما نوعا ما وتسلط بقعة من الضوء القوي على الصور والشخصيات. عندما يرفع الستار لا تاتينا سوى هتافات الجماهير والراوي يقف في الركن غير ملحوظ ولانلمحه الا عندما يسلط الضوء عليه قبل سماع صوته مباشرة.
(هتاف يأتينا من خلف المسرح)
قوت الشعب في بطنك نـار ***** يالي مخلى حياتنا مـــرار
خليت مصر بلد خربانــة ***** وناس ماشيين ما ف جيبها دينار
ابنك ناهب مصر بحالهــا ***** طالع نازل كده منشـــار
ولا التاني عامل لي سياسـي ***** وداير يلهف بالمليـــــار
عايز يورث عرش الباغــي ***** عرش الموصل والانبــــار
احنا زهقنا من الحراميـــة ***** ومن الهبش والاستهتــــار
الرواي (بعد ان يسلط عليه الضوء و يشير الى صورة معلقة على باب)
زي ابولغد حرامي الدلتــا ***** كرشه بيكبر بالقنطــــار
فاتح بقه فاتح عبه فاتــح ***** بطنه فاتح جيبه للتيــــار
كل وظيفة ولها عمولتهــا ***** تقولش الحاج علي السمسـار

(ابو لغد بعد ان خرج من خلف باب عليه صورته)
انا يا جماعة ما باخد حاجـة ***** غير دعواتكم والســـتار
انا شغلي واضح ونضيــف ***** غيري مالوش قايمة اسعــار
الاعرج بفلوسه ضابـــط ***** والاعمى بماله طيــــار
والعاطل نعمله شيخ حــارة ***** والصايع نعمله مختــــار
(ابو لغد يدخل من الباب الذي خرج منه والضوء يتجه الى الراوي)
الراوي
ولا شرارة ابو صلعة حليـوة ***** "ارفع ايدك يلا قـــرار"
بدلة صديري كله يفصــل ***** ترزي مذاكر مش نجــار
بيفتش في الكتب الســودة ***** ويطلع منها الاســـرار
(الرواي يضع فروة رأس صلعاء على رأسه ويقول مقلدا شرارة)
"انا يا اخواني شايف تمديد
لأ توريت
لأ انا شايف دقة زار"
(الرواي يخلع فروة الرأس ويعود لطبيعته)
يوم اسود راح يخرج لينــا ***** ودموعه نازلة امطـــار
والصلعة الوحشة محزونــة ***** وبربوره نازل امتـــار
بقعة الضوء تنسحب من على الراوي وتتجه لشرارة الذي يدخل من خلف باب عليه
صورته. شرارة يبدو كما وصفه الراوي ولكنه يرتدي ملابس تشبه ملابس الساحرات حيث يضع باروكة على رأسه وخاتم ضخم يتدلي من انفه ورداء مزركش وهو يحمل موقدا ينبعث منه الدخان وكيس من الودع. يضع الموقد على المكتب ثم يدور حوله دورتين ويتوقف مخاطبا القاعة.
اخواني احزاني مهولـــة ***** امبارح مات الختيـــار
(عضو من الحزب الحاكم مقاطعا في لوعة)
مات الذي بتر الفساد بسيفه ***** وتكأكأت لمماته الاشعـار
عضو اخر من الحزب
مات الذي بكت الفضيلة موته ***** والمجد والاباء والاصــرار
(عضو من المعارضة بصوت به بعض الشماتة)
مات الذي غدت العمالة شأوه ***** والقتل والتعذيب والاهدار

(شرارة ناظرا الى العضو في تأنيب)
اخواني الودع بيقـــول ***** العرش ها يبقى في الــدار
انا مش باكذب ولا باخرف ***** ده كلام سر من الاســرار
قربو بصو معايا شويــة ***** بصو كويس قوي في النـار
(احد اعضاء البرلمان بصوت عال)
مش شايفين حاجة يا ريسنا ***** غير النار وفحيح النـــار
(شرارة يشير اليه مستنكرا)
واحد من حزب الخاينيـن ***** عضو من الحزاب الغــدار
انت جاسوس وعميل صهيوني ***** خسارة كمان ضربك بالنـار
قربو انتو ياحزبي الغــالي ***** بصوا كويس قوي في النــار
شايفين ايه شايفين ايه
(اعضاء الحزب الحاكم في كورس)
شايفين بقرة وراها حمار
(شرارة يلقي بالبخور في النار وهو يدور حولها في حركة ايقاعية)
فيه ايه تاني بصوا كويس
اعضاء الحزب الحاكم
البقرة وقعت في الحفـرة ***** وحمارنا واقف زنهـار
(شرارة يقفز فوق المكتب ويضرب بقدميه في ايقاع)
هو زعيمنا وابن زعيمنا ***** هو طريق الاستقـرار
(اعضاء الحزب يقفزون على مكاتبهم وهم يرددون خلفه)
هو طريق الاستقرار ***** هو طريق الاستقرار
ويسدل الستار واصوات الصخب تنطلق من القاعة مختلطة برائحة البخور
النفاذة.

باركوا للريس على عبوره الناجح

ياجماعة باركو لريسنا**** وباركو عبوره للمستقبل
هو صحيح في نهاية العمر**** وصحته مش حلوة ومتبهدل
بس عبوره دا كان انجاز**** وها يبدأ تاني من الاول
احنا عبرنا لعهد جديد**** فيه تغيير شامل وخطير
قبل ما نعبر كنا بنزحف**** بعد عبورنا بقينا نطير
غيرنا اجهزة الحركة**** والعقلية والمواتير
مش قلنا لكم ان عبوره**** هو بداية الهنا والخير
احنا عبرنا لعالم تاني**** عالم مفتاحه التغيير
عالم غير الى عرفناه ****عالم كله حرير ف حرير
ودا بقى من بركات الريس**** عيني عليه ابو قلب كبير
رجل الى ف ايده مش ليه ****ولو هايعدل ف الدساتير
شوفتو زعيم كبرة ف مكانته**** بيبعزق سلطاته ع الشعب
ويعمل له انتخابات شفافة ****ما فيهاش ولا تزوير ولانصب
شفتو طاغوت وملاك تعذيب**** بقى فجأة معجون بالحب
شوفتو فساد من النوع الخالص ****انسدت نفسه عن النهب
شايفينو بيقود خطاوينا ****نازله عليه بركات الرب
وبأيده ماسك دفتنا**** عيني عليه تحت العشرين
كأن عبوره ميلاد متجدد**** رجع عمره سنين وسنين
دا عبور يا جماعة مدروس**** خمسة وعشرين سنة تسخين
علشان كده تجاوزنا العصر**** وادينا ورا الريس ماشيين
الريس راح يسرح بينا**** واحنا ها نمشي وراه نايمين
وفجأة نفوق من نومنا في لحظة**** نلاقي نفسنا بنغوص في الطين
ساعتها يقولك ادوني فرصة**** يا دوبك حسبة ست سنين
انا ها اعدل احوالكو المايلة**** واعبر بيكو لبر امين
والمسألة تتكرر تاني**** كأننا شعب من الملاعين

مسرحية الانتخابات

يا جماعة دي مسرحية**** بدأوها ف المنوفية
من يوم ما كوندوليزا**** قالت له انا مش جاية
يا جماعة دي مسرحية ****راسمينها البلطجية
الوصفة من واشنطن**** والخلطة من الغورية
عجوز الهم راجع**** والشعب هو الضحية
والشلة اهي راجعة تاني ****ودي شلة الاذية
ها تزيد معاناتنا اكتر**** ونشوف ايام غبية
مولد والكل شارك**** والشعب هو الضحية
هانشوف ايام هباب ****ما فيهاش لحظة هنية
وواشنطن راح تبارك**** بعد الخيبة القوية
الوالي بتاعها شرعي ****واهو جاي بمسرحية
المسرحية تافهة ****والعرض كان مأساوي
وبطلها كان عجوز**** وادائه كان بلاوي
حاول يضحك علينا ****ويغني لنا الغناوي
سخر له كل حاجة ***من شعبولا لطنطاوي
علشان العرض ينجح**** ومعاه جمعة وقناوي

صح النوم

يوم اسود على مصر بحالها**** فوز الشلة مع ارذالها
يوم من اسود ايام مصر**** ابكو عليها وع الى جرالها
طول عمرها منكوبة بناس**** ما انشغلوش ابدا باحوالها
واديهم كاتمين على انفاسها**** لحد ما يبقى اعلاها اسفلها
النمل اهو راجع للكرسي**** بيقود جيشه حرامي الحلة
هاتشوفو ابشع ايامكم**** ف الفترة الخامسة واهوالها
@@@@@
ياما قلنا لكو اتلموا ياناس ****بطلو سخرية من الشعب
لكن الامخاخ العطلانة ****خادت المسألة لعب ف لعب
قالك يلا اديها ترشيح ****يمكن يطلع حظك بمب
مش عارفين اللعب جريمة**** والى مشارك بيشيل ذنب
ذنب الشعب الى طلع عينه**** كل حياته غلب ف غلب
جروهم للعب بخدعة**** والاخر اترموا على جنب
الرجل كان ناجح ناجح ****ولو بالقوة ولو بالنصب
بس قالو له لازم اشباح ****تتنطط ادام الشعب
@@@@@
ما حدش كان عارف اسمائهم**** ولا شاف قبل الكارثة صورهم
دخلو المسرح والنور قاطع**** ولا حد اتنبه لحضورهم
هو بنفسه رحب بيهم ****قالك بكرة راح اغورهم
بعد ما تيجي نهاية العرض**** ويلاقو الجمهور طيرهم
دول مش اكتر من كومبارس**** لكن النص عايز ادوارهم
@@@@@
دي نتيجة معروفة من الاول**** ليه الترشيح بقى والاهانات
قالك دي مصالح مفهومة**** ما بيعرفها غير البهوات
ناس طمعانة تاخذ قرشين**** وناس هوايتها لم فتات
وناس فرحانة بالتلفزيون**** أهي شهرة بين الاموات
اشمعنى شعبولا بيطلع**** بيغني لنا ساعات وساعات
نطلع احنا كمان ونغني**** اهو صوت من بين الاصوات
وناس بتقولك اهي سبوبة ****تيجي ما تجيش مافيهاش ازمات
وناس بتعاني من امراض ****اقل مافيها كره الذات
وناس بتقولك اشغل نفسك**** الشيخوخة فراغها افات
حاجة تبدد ملل الوحدة**** في الشارع من غير نفقات
@@@@
ياعيني عليكو يا مصريين**** طول عمركو ايامكم طين
صدقتو المسألة بسذاجة**** وبلعتو طعم الملاعين
ودي خطة امريكا راسماها**** وعارفة هاتستدرجكم فين
صدقتو انها انتخابات**** فيها شفافية ومنافسين
وبدأتم تعملو حملاتكم**** وتخمنو...الكرسي لمين
طبعا الكرسي لاخينا**** دا لازق فيه حتى الرجلين
مش ها يسيبو ابدا ليكو**** ولو لفوه حتى بكفنين
الكرسي راح تاخده الاسرة**** يتداولوه جيل ولا اتنين
يمكن ييجي يوم نفهمها**** اننا كنا صحيح هايفين
لما بلعنا طعم واشنطن**** ومشينا ويا المجانين

احنا معاك معاك ياريس

ياجماعة ادو الريس فرصة **** يخلي حياتكم زي الفل
الرجل مشاريعه كتيرة**** ووظايفه مضمونة للكل
راح يبني لكم الفين مصنع**** من المنوفية لحد التل
ها يخلق لنا اشغال بالكوم**** واحنا من التوظيف ها نمل
راح يهتم كمان بالصحة**** ويعالج السرطان والسل
راح يدينا مرتب اكبر**** بعد حياة النيلة والذل
واحنا ياناس جربنا كتير**** طول الخمسة وعشرين عام
ان الريس لما يقول**** يبقى كلامه تمام ف تمام
شوفنا العز في عهده الوردي **** بعد ما كات ايامنا ضلام
شوفو انجازه مغرق مصر**** وياما هانشوف ويا الايام
الريس يا جماعة ها يعبر**** للمستقبل والاحلام
اصل الماضي دا كان تسخين**** فترة وضاعت ف الاوهام
حاسبوه بعد ما يعبر بينا**** ياما ها نشوف منه الافلام
ناوي يصحي الطبقة الوسطى**** بعد ما داسها بالجرافة
راح يبسطها ويهندمها**** ويخلي ايامها خرافة
الطبقة دي في عهده اندفنت**** بس ناقصها ياعيني قرافة
ادوا له الفرصة يا جماعة**** ها يمسح كل تاريخه الماضي
انسوا بقى ايام التعذيب**** والسجن دخلتوه على الفاضي
والسنوات خلف الاسوار**** من غير لا محامي ولا قاضي
الريس راح تبقى سجونه**** بالتكييف او فايف ستار
لما تخش هاتنسى حياتك**** وتنسى ولادك والاخبار
ولما ييجوا يقولولك اخرج**** ها تقول انا من اهل الدار
الريس راح ينسى فساده **** وفساد اعوانه و اولاده
وهايجمع كل المسروق**** سواء كان برة او ف بلاده
يصلح بيه الصحرا الواسعة**** ويضيف امجاد على امجاده
الريس راح يبني مساكن**** لشباب الشعب الغلبان
الشقة من خمسة وصالة**** وهايوزعها بالمجان
مش نوعية شقق الحملة**** الى قرفنا بيها سليمان
@@@@
!خمسة وعشرين سنة تسخين**** تفتكروا ها يعبر على فين؟
لو كان ها يعدي الاطلنطي**** كان ها يسخن له شهرين
هو هايبقى رئيس كشافة**** واحنا التلاميذ المطيعين
لحد ما يوصل جبل النعمة**** هايرمي عصاته بين حجرين
ويقول لنا خيمو يا اولاد**** ادى احنا عبرنا سنين الطين

تأملات رئاسية في الحملة الانتخابية

الريس قرفان من الحملة ****ومن بوش الى فرضها عليه
خمسين مرة يكلم نفسه ****وهو بيتلفت حواليه
بس اما انجح بس يا بوش ****راح اوريك انا ها اعمل ايه
احيانا يتخيل نفسه ****بيصفع بوش بضهر ايديه
او يرميه من شباك قصره**** ويسلط اعوانه عليه
ويجز على اسنانه بشدة**** ويحرك في الهوا رجليه
واعوانه يشوفوه يتهامسوا****دا من تأثير الحملة عليه
@@@@@
طول عمري قاعد مرتاح**** اتشرشح واتبهدل ليه
وناس جايين يعملو انداد ****ما حدش عارف اسمهم ايه
لو كانت مشيت كالعادة ****استفتاء كان يحصل ايه
@@@@@
بقى مش لاقي الا انا يابوش**** يدفع لك تمن انكساراتك
انا مالي ومال الفلوجة ****والى بيحصل مع قواتك
ياما قلنا لك يابني اتلم**** وبلاش تفرد لنا عضلاتك
لكن لاسمعت لنصايحنا ****ولا حتى الجهلة مخابراتك
ياما ها تشوف من العراقيين ****خلينا نسمع صرخاتك
بس انا ليه اتحمل ليه ****عبء هزايمك واندحاراتك
اعواني فلقولي دماغي**** بصور تافهة من حملاتك
فاهمين انك قدوة يا عيني**** وف تكريت يسحلوا قواتك
انت يا بوش سبب عكننتي**** امتى بقى تنتهي سنواتك
@@@@@
بعد سنين العمر دا كله ****انا اضطر ان اعمل حملة
وامشي اتزف ف وسط الناس ****كاني حرامي وعامل عملة
واسلم على رفراف الشارع **** واوزع ابتساماتي مجاملة
واتساوى مع كل مرشح ****زي حكاية الفيل والنملة
انا حاسس ان انا باتهزأ ****بس ف خطة كبيرة وشاملة
اعواني ماشيين حواليا ****بيقولو الليلة مش كاملة
كل شوية يطلع واحد ****يديني ملاحظات بالجملة
اوعى تكشر وانت بتقرا**** وماتنساش ان هناك كاميرا
اتصور من غير البدلة**** كأنك قبطان راكب باخرة
بلاش تتكلم خارج الورقة ****لانها في الايام دي مغامرة
جابوا وثائق حملة بوش ****وافلامه وهروها مذاكرة
عايزين يمشو عليها بالملي ****واحنا في مصر يا ناس مش برة
ازاي بقى ممكن تقنعهم ****ان أوتاه مش زي مسرة
وان احنا لسا بنتحرك ****يادوبك ما خرجناش من الجرة
حتى الشرابات مش ناسيينها**** والجزمة لونها ومنظرها
وانا ماشي في الزفة مضمضم**** ولا شايف للحملة اثرها
@@@@@
وييجي كمال ويقول لي**** ياريس اقلع يلا وانزل عوم
يلا اديها خمسة عبور ****علشان فيه اعلان اليوم
وقبل ما ايدي تشيل الكرسي ****مسكها جمال وفي عينه اللوم
قالي يابابا دا احنا في حملة**** ودي خطة وطريق مرسوم
فيه لجنة درست تفاصيلها**** وكل تحرك فيها معلوم
احنا اخترنا عبورنا شعار**** يلا يابابا قوم اقلع قوم
ويوريني صورة لبوش**** واقف يضحك ف الحمام
كل ما اشوفه دمي بيغلي**** وابدأ ابلبع ف البرشام
@@@@@
بيعاملوني كأن انا سلعة**** منها كتير ف السوق مركون
قلت لهم فوقولابهدلكم**** دا انا رئيس مصر الفرعون
انا بدأت الحملة بكيفي**** بلاش الغيها بالتليفون
ما انا طول عمري وانا باتكلم**** ودايما ضيف ف التلفزيون
اشمعنى الايام دي يعني ****ها نحسبها بالميم والنون
عايزينها تمشي "بركاوي" ****ما هي ماشية وبقالها سنين
صوت الشعب انا ضامنه ف جيبي**** سواء بالشدة اوباللين
عمري ما شفت سقوط ف حياتي ****مش ها اسقط بعد التمانين
@@@@@
اعواني خايفين لا اتعثر**** او يقع الكرسي ويتكسر
ساعتها ها تبقى خسارة كبيرة**** للحرامية وشيخ المنسر
زادي في الحملة حب الشعب**** الى على ايامي ها يتحسر
لو جه واحد من اياهم ****بطيخة والبيع ع المكسر
لكن انا عارفيني كويس ****والمعرفة كنز ما يتقدر
هما صحيح اتفقرو ف عهدي **** وها اخليهم افقر وافقر
بس انا واثق ان انا ها انجح**** شعبي بيكره ان يغير
ماشي بحكمة عبيطة بتقول**** الى ما تعرفه هو الاخطر
هاينتخبوني علشان عارفيني ****زي بولاق والهرم الاكبر
مين جمعة وباقي شركاه ****عالم لسا عودهم اخضر
بينافسوني على ضيعة بتاعتي ****وتركة ها اسيبها لابني الاصغر
عايزين حملة اديها حملات**** ونشوف مين بقى هو الاشطر
مش ممكن اخش انتخابات ****والداخلية معايا واخسر
ليه انا يعني سبت العادلي ****بعد فضيحة شرم الاكبر
لانه مرتب كل اموره ****مين راح يكسب ومين راح يخسر
حتى النسبة لكل مرشح ****معروفة من دلوقتي واكتر
كل التفاصيل في الادراج ****مش عايزين تعطيل وتعثر
عايزينها تبقى شفافة ****وانضف من الصيني المتكسر
رغم ان انا نجاحى اكيد ****زي ما قالها بوش الاصفر
انا حاسس بالم ف ضلوعي ****وماشي في المولد كده متوتر
ماشي اشحت اصوات الشعب**** انا الفرعون المتكبر
بس زي ما بوش ذكرها**** انا محتاج اركز ع المظهر
@@@@@
وجمال ابني يقول لي يابابا ****لازم تلبس حاجة كاجوال
شكلك مش اكبر من جيلنا**** وشعرك اسود زي الليل
ويوريني صورة بوش ***راكب العجلة بدون سروال
قلت له يا ابني ابوك مش ****روبي بطل بقى بلا لعب عيال
خدت الشنطة منه رميتها ****وقلت الصورة دي اسوأ فال
انا مش عايز اسمع صوته ****ولا اشوف صورته ولو هاانشال
@@@@@
وبوش قارفني بالتليفون ****بيسأل عني كل شوية
بيحاول يظهرها مودة ****بس انا عارف حقده عليا
عايز يبعتلى مراقبين ****قلت له انا عندي الداخلية
دول ناس زمتهم مش واسعة**** ونتايجهم دايما ايجابية
قالي عايزها انتخابات حلوة**** فيها نزاهة مع شفافية
قلتله هانخليها شفافة**** اكتر من زيت الطعمية
@@@@@
من اول ما مسكت الحكم ****وانا باسجن فيهم وباعذب
ضيعة ابويا وهما عبيدها ****لا باحب اتجمل ولا باكذب
ييجي يوم اسود واشحت صوتهم**** وامثل واعمل فيها مهذب
@@@@@
من اول ما مسكت الحكم ****عمري ما فكرت في اوضاعهم
ولا عمري شغلتني امورهم ****ولا حتى سلوكهم وطباعهم
بس دا مش معناه من الاخر**** ان انا كنت سبب تراجعهم
انا علشان الانتخابات ****ها اهتم شوية بمواجعهم
واشوف ايه يعني يريحهم ****فيه اوقات لازم ادلعهم
@@@@@
ييجي عليا يوم واترشح ****قدام الصباحي ونور
ونعمان ينفخ في الجرنان**** قال مخنوق وعاوزني اغور
الصباحي هو الى عاجبني**** راجل مش عايش في الدور
بيقول انه بيأيدني ****ودا هو صلب الدستور
انا قرفان اطلب اصوات**** من شعب انا دايما باحتقره
فاهم ان الريس منه ****ناقص بقي يتغدى ف قصره
طول عمري عامله ملطشتي**** اضربه على بطنه وعلى ضهره
ولما ازهق ارميه في السجن ****ولا املش ابدا من قهره
الشعب انا عارف مطحون ****بس انا مش مسئول عن فقره
اكسل شعب ف ارض الله ****متعته انه يفلي في شعره
مشغول ان يعيش ايامه ****من غير حتى ما يحسب عمره
وانا متعتي ان انا اشوفه**** والفقر بيهريه ويحاصره
عارف لو عاش يوم مرتاح**** راح يكتر تفكيره وفجره
@@@@@
ويجي جمال ويقول لي يابابا ****عايزك تركب باخرة كبيرة
دي مرحلة تانية من الحملة**** وانت ها تبقى الريس بيرة
انت القبطان في المحروسة**** هاتعبر بيها نوة خطيرة
بس تحط ايديك ع الدفة ****وسيب الباقي على البحارة
لازم الشعب المصري يحس**** ان رئيسه واحد من الحارة
وان هموم الدفة تقيلة ****مش فذلكة وكلام وشطارة
خلي الشعب يشوف اعدائك ****ما يسوو حتى عقب سجارة
وانا باسمع له وانا مخنوق ****وباقول يلا ودمي بيغلي
يا بني انا عيني على امريكا ****سيبك بقى من الشعب المصري
لو واحد فيهم اتكلم**** انا ها اشنقه ف جنينة قصري
انت مصدق ان دي حملة ****ولا انا ماشي فيها بخطري
انا مش عايز ازعل بوش ****دا رجل مش سالك ولا دغري
ياما قالو لصدام ياحليفنا**** وفجأة سقاهم سم سقطري
حلفو يهدو عليه بغداد**** كانه وقف قدام المجري
شوف قذافي ليبيا كمان ****راح شايل كفنه على ايده
ومعداته مع اسلحته ****والتعويض لرعايا سيده
وقعد يتحايل ويعيط ****لحد ما بوش سحب تهديده
وعدوه بمكافئات وهدايا **** وكلام تافه مش ها يفيده
مش راح ياخد منهم حاجة**** بعد ما سلم ورفع ايده
@@@@@
بيقولو ان انا ممكن اسقط**** قلت لهم ولا في الاحلام
لو هاتقل عن التمانين**** تبقى نتيجة فيها كلام
مش رايح اقبلها من العادلي ****ولا ها يشوف ف حياته سلام
انا قلت انتخابات شفافة**** بس معاها نتيجة تمام
عايز كله يكون في هدوء**** وعبورنا يمضي بسلام
خمسة وعشرين سنة في البحر**** خلي عبورنا يبقى ختام
@@@@@
مين كان يتوقع ان انا**** اشحت من شعبي الاصوات
شعب الفهم بتاعه محدود**** لو يوسع ممكن انشاط
علشان كده وصيت اعواني**** يستعملو كرابيك وسياط
ويكونوا مباشرين ف عملهم**** من غير دوران ولا اسقاط
احيانا ياضحك من نفسي ****وما باصدقش الى بيحصل لي
معقول وانا قاعد ع الكرسي**** الشعب يحاول يوصل لي
ويرشح ناس يقفو قصادي ****ويقولو صاحبك ها يولي
عايز اطمن شعبي البائس ****ان انا ها ابقى رئيسه تملي
وما فيش نية ان انا اسيبه**** الا ف ساعة ما يحين اجلي
حتى الموت مش راح يعفيني**** ناوي اسيب ف المنصب نجلي
@@@@@
اول مرة الاحظ ان احنا ****عندنا شعب وله اصوات
وناس بتقول انها موجودة**** ف شبرا النملة والعياط
بيقولو احنا الشعب النايم ****ها نفوق من نومة الاموات
هانطالب بحقوقنا الكاملة ****وهانعمل ضجة وزياط
اصبروا بس عليا اما انجح**** وها اخليها محزنة وعياط
كل معارض يفتح بقه ****ها احول ورقه للخياط
والى يشيل الخيط من بقه ****ها ياخد حقه من الظباط
@@@@@
انا لسه مش قادر اتأقلم ****مع فكرة حملة انتخابية
احيانا بيجيني كابوس ****ان انا ماشي ف الشرابية
والحارة سد ومزنوقة ****والناس رايحة فيها وجاية
ناس مهمومة وجوه محزونة**** ولا واحد كان حاسس بيا
خمسين واحد خبطو ف كتفي**** وعنيهم بصت ف عنيا
ولا واحد فكر يسألني ****جاي تعمل ايه ف الشرابية
وفجأة سمعت اصوات طلقات**** وصحيت من النوم غرقان مية

زهايـمر

الماضي القريب
مرة اخينا راح يتعـــالج **** واتنزه في الغابة الســودة
عجبته قال يا اهل المكسيك **** طول عمركو عايشين على الموضة
ماشي وياه سواق سفارتنـا **** اصلع واسمه محمد عـودة
قالو يا ملك الرايخ السابـع**** نفسي حداكم حتة اوضـة
بعد ما اسيب الحكم في غانا **** اقضي فيها ايامي السـودة
الان
يصحى من النوم الصبحية **** يقول هاتو لي عشايا خفيف
ما احبش اضغط ع المعدة **** كفاية بطة ونص خـروف
عفوا يا ريس ده الافطار **** تابعنا بوش على التليفــون
مش بوش ده بتاع مدغشقر **** قولولو في الحمــام لسـه
واجع دماغي بقالو يومين **** عايزلو طنين حلبســـة
ما بيختشوش يشحتو منا **** فاكرينا من الدول الكبرى
فاهمين فلوسنا مال سايب ****متبعترة ف شارع شـبرا
الشيخ زياد سلطان لبنان ****حالف على لاروح ليبيـا
اشوف اميرها زعلان ليه **** واشرب معاه فنجان سوبيا
خلافاته ويا جيرانه في الهند **** خلت حياته بقت كوبيـا
حالف لاروح احل الاشكال**** واخلي ايامه زلابيـــا
زايد تعيش انت ياريس ****عميلنا بوش على التليفون
انا فاكر الاسم كويس **** بس ملخبط في البوشين
واحد كان صاحب صدام **** والتاني دب معاه خناقتين
هاتوا لي صدام ع التليفون **** قولو له يسحب قــواته
ملك الكويت دا رجل صاحبي **** وحماتو تقرب لحمــاتي
لو ماانسحبش خلال ساعتين **** رايحين نقصقص جناحـاته
تانسو تشيلر ملك الاتراك **** باعت رسالة على المحمول
بيقول هايخرج من الجامعة **** ويرمي نفسه في البوسفور
زعلان قوي من السي اي ايه **** علشان مابعتتلوش مسئول
يقوله ليه البرج انهار **** وليه اوجلان بيحب الفول
بعد ان بلبع خمس حبات من منشط الذاكرة
هاتو لي بوش على التليفون **** دا بوش دا بتاع امريكـا
لو غضبه واحد منا **** راح يمسحه بحتة استيـكة
نصيحة لوجه الله
حرام عليكو يامفتريين **** الراجل داخل ع التمانين
ما بقاش يقدر يمشي دقايق **** او يعرف بيكلم مــين
الناس في السن دا بتريح **** ف مصحة او دار لمسنين
يعيشوا في طفولة ازلية **** والماضي اطياف وحنـين
ويفتكروا اللمسات الاولى **** ف سبعتاشر او عشـرين
وأول مرة يدق القلب **** ونبض الحب وهمس والعين
أنا همي مصلحة الرجل **** نفسي يريح له سنتــين
قبل ما ييجي صاحبنا يزوره **** يقول تعال ف غمضة عين
دا الى ما حدش يهرب منه **** تهرب منه تروح عـلى فين

عكاييف المصري والمخرج اياه

عكاييف مصر ياعكاييف مصر
حاول تهرب قبل العصر
سامع صوت الشعب بيهدر
بيقولك اخرج من مصر
اخرج يلا وفر بجلدك
من الباب الخلفي للقصر
اخرج قبل ما تيجي مصيبة
تغرق فيها لحد الخصر
وتنتهي زي اخوك شاوشيسكو
الى صبح امثولة العصر
هي نهاية كل عميل
سواء كان برة ولا في مصر
شوف الشاه بجلالة قدره
لما الشعب رماه في الشارع
امريكا قالت مش عايزينه
ولافكروا لحظة في خدماته
هي دي حالة أي عميل
لما بيخسر حب الشارع
ولا يبان ضعفه لاسياده
لم عزالك ويا عيالك
وارحل يلا بلاش تأخير
احيانا الفرصة اما بتيجى
بيبقي ضياعها حسابه خطير

حكام العـــرب

حكام بيقضوها عمالة
خلوا حياتنا قرف وزبالة
يخدموا امربكا باخلاص
عندنا احنا يبقوا كسالى
ولو قلنا ياجماعة راعونا
يقولو لنا اخرسوا ياحثالة
احنا ورثنا عروش اهالينا
وورثاكوا معاها كلالة
لكن لما تشاور لندن
ولا حمار يعطس في واشنطن
ولا ايطاليا تتف عليهم
ولا فرنسا تشيد بغبائهم
يجروا يشوفوا ايه الحالة
ولما نقول احنا مواطنين
لينا نعيش ذي انتوا ماليكو
يقولوا يعني ايه
ما احناش فاهمين
ولما اسيادهم يغضبوا منهم
يركبهم خوف
ويموتوا في جلوهم
تلاقيهم رايحين جايين
يتحركوا في غباء وهبالة

انشودة العاطليــــن


احنا شباب مصر المحروسة **** احنا شباب مصر العاطلين
شعرنا شاب والسن اتقدم **** بس املنا ييجي التعيين
اوحتى نلاقي شغلانة **** او سبوبة نجيب قرشين
العيشة في مصر بقت نيلة **** والاسعار اهي زي الطين
ياما تعبنا وياما ذاكرنا **** واهالينا شالوا الهم سنين
واخرتها قاعدين ع القهوة **** يوماتي نفتش في الجرانين
لكن الشغل ياعيني معدوم **** الا لاولاد الواصلين
دول بيلاقو الشغل كتير **** بنفوذ بابا وعمو حسين
كارت صغير او تليفون **** يفتح خمسين باب حلوين
كم سنة لما الواد يتودك **** ويعرف ماشية ازاي ولفين
يبدأ يعمل بيزنس خاص **** ويبقى حسابه بالملايين
ويجيب ناس يشتغلوا معاه **** برضو بكارت او تليفون
واحنا ياناس نقعد نتفرج **** ونقول بكرة ييجي التعيين
وييجي بكرة زي امبارح **** ونقول بعده وهايروح فين؟
دا نصيبنا من الدنيا ياناس **** نستناه سنة ولا اتنين!
@@@@@
سنة ورا سنة والايام تجري **** واحنا على القهوة قاعدين
نتفرج على اهل البيزنس **** واولاد الامرة الناجحين
لحد العمر مايزحف بينا **** وتظهر شعرة بيضة واتنين
واحنا نقول دي هموم الدنيا **** لما الحلم يبان هاتهون
بكرة الشعر هايرجع اسود **** لما نشوف ورق التعيين
والقهوة قعدتها مملة **** "دومنة..طاولة..شاي..ينسون"
لما نمل القهوة ننام **** نفضل بالايام نايمين
و ساعات نتمنى ما نصحاش **** ونشوف واقع كله لعين
الجرنان بيقول فيه وظائف **** بس شبابنا ياناس هايفين
عايزين يقعدوا ف الارشيف **** وياخدوا اعانة للعاطلين
ونروح نجري على العنوان **** يقولوا لنا جايين مع مين؟
الواسطة ياجماعة دا شرط **** واحنا نجيب الواسطة منين؟
لو مش واسطة تبقى عمولة **** وما فيش اصعب من الاتنين!
@@@@@
الشعر الاسود بقى نادر **** والاطراف ما بقتش تلين
ونقول بكرة اهو جاي يا ناس **** بطلو تبقو متشائمين
إلى استنى تلاتين عام **** مش معضلة يصبر سنتين
ما بقاش فيه شعر اسود خالص **** والاسنان وقعو الصفين
الدكتور قال خف القهوة **** واوعى تقرب من التدخين
الدكتور قال فيه اضطرابات **** ف القلب وزغللة ف العين
فيه ف حياتك حاجة خطيرة **** فرحة كبيرة او حزنين
ف الشيخوخة الفرح بيتعب **** ذي الحزن يغوروا الاتنين
قلت لو انا امبارح جاني في **** البوسطة جواب التعيين

يوم الاستفتاء الكارثة

شوفو ابطال الحزب الوطني**** بيعملوا ايه في المصريات
دي فضيحة والله بجلاجل**** شافها العالم ع القنوات
وضريح سعد شاهد ع الكارثة**** شاهد على فسق الحشرات
اعراض مصر بقت منتهكة**** تحت حراسة من الباشوات
والاوغاد طايحين ف الحتة**** كأن الشعب اختفى او مات
وايدين الجهلة ما بتفرق**** متظاهرات او صحفيات
او حتى ستات ف الشارع ****ماشيين بيشوفو الطلبات
وايدين الشياطين الجارحة**** تمشي تقطع في البلوزات
اضرب ايدك زي ما تيجي**** فوق او تحت دا مستباحات
والى يعارض الحزب الوطني**** عرضه مباح وسط الطرقات
هتكو الستر ف نص الشارع**** وايديهم تحت الجيبات
او بتفتش جوة بلوزة**** او بتقطع بنطلونات
وصعودهم ف مراتب الحزب ****موقوف على عدد الستات
الى يمزعو عنها هدومها**** ويعروها للنظرات
ماحصلش في عهد الهكسوس**** ولا ف الغزو ولا الثورات
لافرنسا قدرت تعملها**** ولا بريطانيا واهم خواجات
ما عملهاش الا المتأمرك**** ابوعهد اسود م الظلمات
والشرطة ماكاتش بتتفرج**** كات بتساعد في الازمات
ولما يلاقوا البنت تقاوم**** يبعتو قوة من النزيلات

ولاصياحهم في الميدان ****على ستات الحجزاخانات
هاتوا البنت ام ايشارب ابيض ****خلوها عبرة للباقيات
ولواءنا بيدير معركته**** تقولش روميل من غير هفوات

لم يحس الوحدة اندحرت ****باشارة منه يضيف قوات

قائد متمرس ومحنك**** كل معاركه مع الستات

@@@
والبلطجي لما يقول اهجم*** وايده تدي بالاشارات
تحس ان احنا في تل ابيب**** ورجعنا لعصر الفتوحات

ولما يحس العدو ها يسلم**** وهدومه هاتبقى شذرات

يضغط ويكثف هجماتو**** وما تهموش الاستغاثات
حاسس انه بيفح عكا**** بس ادو لو ياناس قوات
كل طموحه يقلع خصمه**** ولا سيما اذا كانوا بنات
لكن الحسرة ياعيني في قلوبنا**** دول اخواتنا المصريات
واحنا بناتنا ياعيني غلابة**** والحزب اعضائه بشنبات
لكن لا رجولة ولا نخوة**** ولاحتي تقدير للذات
الغلطة مش عند نظامنا**** دول مش اكتر من ادوات
الغلطة غلطة امريكا**** والبيت الابيض بالذات

لو امريكا كانت لمتهم**** ماكانوش عملو فيها فتوات
دي اهانة لكرامة الشعب**** وصمت الخزي دليل اثبات

أول مرة ف المحروسة**** نحس كأننا من الاموات

لما اعراضنا ينتهكوها**** واحنا نقول اهو هم وفات

يا جماعة ثورو لاعراضكم**** دا العالم كله منفات
والي يموت في دفاع عن عرضه**** افضل من عيشة الاموات
ياجماعة اعراضكو اتهانت**** فكروا فيها ولو لحظات

دا نظامنا ما يفهمش العرض**** ولا احساسنا بالصدمات

دا نظام ضاعت كل كرامته**** من افراطه في الاهانات

شوفو وصلنا لفين وازاي**** ها يحصل ايه لو فيه انتخابات
يمكن يغتصبونا في الشارع**** ولا اكتر من كده يا بنات

من ولد الصايع الموريتاني الى ولد الضايع المصري


بابعت لك بجوابي الحالي
من شقة ف اراضي النيجر
بالتحديد م العاصمة نيامي
انا مش عارف لها عنوان
بس معلمها بالمتجر
الى انا باقضي فوقه ايامي

عايز اقولك خدها نصيحة
من واحد ف النيجر صايع
اوعى تعزي ف ميت تاني
لان الايام مش مضمونة
ممكن تخرج بعد جنازة
ولسه الميت داخل قبره
تدخل انت في عالم تاني

لو جالك مرسال من اخوك
بيقولك ان ابوك مات
روح بس القي نظرة عليه
نايم ف الشارع الوراني
قل مصلحة الشعب اهم
ووجودي مش راح يعمل حاجة
ولا هايصحي الميت تاني

اتعلم من اخوك الطايع
بعد جنازة بقى اسمه الصايع
وانقلبت كل الاوضاع
لا انا عارف انا ها اعمل ايه
ولا عارف على فين انا رايح

اوعي تعزي ف حد يموت
دا الاعمار كلها بتفوت
والواحد من غير الكرسي
بيضيق العالم على وسعه
كأنك يونس جوه الحوت

فنجل عينك على اعوانك
شوف مين منهم عينه بترمش
او مين منهم راح يتاوب
الاشياء دي مهما تخبي
بيبقى لها ف الوش معالم

اوعى تسلم نفسك ابدا
لواشنطن او تل ابيب
طول ما انت مريح ع الكرسي
تخدمهم وتشوف مصالحم
ها تبقى صديق وحليف وحبيب
واول ما بتنشاط م السلطة
تلاقيهم ماسكين قباقيب

بيعاملونا باستحقار
ويبصوا لامثالنا انا وانت
على اننا عملاء تافهين
اول ما بيفقدوا وظيفتهم
يرموهم وسط الكراكيب

اوعى تكون فاكر امريكا
هاتحرك جيشها وتحميك
او ها تروح تنتزع الكرسي
من غيرك وتسلمه ليك
دي اوهام عشتها من قبلك
وادي نتيجتها جوابي اليك

اوعى تسيب العاصمة في يوم
ويكون اعوانك جواها
مش ها تشوف بعنيك النوم
لو عسكري ارتاح لهواها

اوعى تسيب الكرسي دقيقة
او تبعد عنه امتار
ممكن ترجع بعد ثواني
تلاقيه ف ايدين الشطار

خلي العسكر يمشوا معاك
مطرح ماتروح اوعى تسيبهم
لو شافوا ف غيابك الكرسي
ممكن مشاعرهم تغلبهم
او هو بنفسه يجذبهم

حاذر من الحرس الجمهوري
اول ناس سيطروا ع العاصمة
رسموا العملية باحكام
ونجحوا في التنفيذ بجدارة
ولا واحد منهم خاد كدمة

انا اخوكم ولد الطايع
لحد امبارح كنت رئيس
دلوقت بقيت اسمي الصايع
قاعد لاجيء عند النيجر
والشقة ما لهاش عنوان
بس معلمها بالمتجر
اخوكم الصايع
(الطايع سابقا)

يوم اسود على مصر

كان يوم اسود يوم ترشيحك
دا كل املنا ان احنا نزيحك
يا ما مشينا في مظاهرات
وهتفنا باعلى الاصوات
رغم العسكر والظباط
مش عاوزينك..مش عاوزينك

احنا الشعب المصري ياريس
عايزينك ترحل وتسيبنا
كل شوية نقول راح يمشي
او يزهق ويسيب الكرسي
وساعتها نحيي الافراح
ونداوي بالحب جراح
ونبدأ نمسح عفن الماضي
وتعود البسمة لشفايفنا
ونقولك بالصوت العالي
مش عاوزينك..مش عاوزينك

كان يوم اسود يوم ترشيحك
خلا الحزن ف مصر بحور
الناس قرفانة يامولانا
صبرت حتى طلوع الروح
بنقولك ارحمنا وغوز

الشعب المصري مش صفوت
ولا سرور وكمال الشاذلي
ولا الفقي وزميله العادلي
الشعب ياريس ملايين
ماشيين في الشارع صابرين
الحزن بينزف من عينهم
والهم متلتل ف قلوبهم
ولما يشوفوا الطلعة الحلوة
في مجلة او تلفزيون
يصرخوا بالصوت المكتوم
مش عاوزينك.. مش عاوزينك

ملايين ضاعت كل امالها
ان يعيشوا حياة ادمية
اجيال ورا اجيال في طاحونة
بيدورو فيها من ولادتهم
لحد مايرحلو عن دنيتهم
وعرقهم تاخده الحرامية

اجيال تايهة ف المحروسة
بيعدوها باليوم والساعة
كل املهم انك تخلع
علشان يلقو حتى مساحة
يتنفسوا فيها بحرية
من غير ما المخبر اياه
ييجي ياخدهم ف الفجرية
ويصرخو من بين القضبان
مش عاوزينك..مش عاوزينك

الشعب ما هوش ابو جينا
ولا رضاه ودلاله علينا
واوامره الي بتمشي صاروخ
ولاهو كوندي الشعنونة
وتشيني ابن المجنونة
دول اسيادك بيساعدوك
على ظلمك واهانتك لينا
مش عاوزين يسمعو اصواتنا
واحنا بنهتف من الاعماق
مش عاوزينك..مش عاوزينك

الشعب مش هو شارون
ولا زميله التاني شيمون
الى بقينا نسترضيهم
لو حتى ها نبوس رجليهم
علشان يرضى عننا بوش
ونقعد ع الكرسي الملعون

الشعب ياريس مستكفي
خمسة وعشرين سنة افساد
خلت صرخات المحروسة
توصل لضفاف الاطلنطي
يمكن امريكا ترحمنا
او حتى ترق لاحزاننا
ما هي فيها حاكمنا المتخفي
سامع صوتنا بنصرخ فيك
مش عاوزينك..مش عاوزينك

الشعب ياريس مش شلة
كل حياتها تمص نخاعنا
وتشرب دمنا وتجوعنا
ولما نقول ياجماعة الرحمة
يبقي عملنا جريمة كبيرة
ولاخرجنا خلاص م الملة

الشعب يا ريس ملايين
هما الصوت العالي الهادر
مش هما الشلة الملعونة
الى بترفع راية الظلمة
وتقضي ايامها المسمومة
بيطوفوا حوالين الكرسي
ويسبحوا للطفل الساحر
الى مقرب ع التسعين
محبوب الملايين الاسر
وابنه ولي العهد الطامح
الى هايخرج لنا م العتمة
يركب بعده الكرسي الشاغر
ومهما نصيح بالصوت العالي
مش عايزينك..مش عايزينك
ها يقولك انا قاعد قاعد
عهدي مالوهشي حدود ولا اخر

اوكازيون الترشيح..اوكازيون المسخرة


رشح نفسك دا اوكازيون
يمكن ييجي الحظ معاك
وتاخدلك حبة اصوات
تقعد على كرسي الفرعون

جهز ورقك واجري بسرعة
جهز ورقك يلا دي فرصة
راح تظهر ف التلفزيون

عارف انك ساقط ساقط
بس اهي فرصة تلمع نفسك
وتبدد نص المليون
على اصحابك ولا قرايبك

اول مرة الكرسي العالي
يبقي متاح في الانتخابات
يتنافسو عليه الحرامية
والترزية والبهوات
اول مرة فرعون ينزل
يعرض عرشه في المزادات

رشح نفسك
هزأ نفسك
مسخر نفسك
ما بقاش فرق بين الكلمات

رشح نفسك دا اوكازيون
مش عايزين الفرصة تفوتك
لوضاعت تستنى سنين
يمكن ييجي قبلها موتك

رشح نفسك دا اوكازيون
والتخفيض فيه مية لمية
وسقوطك هو المضمون
والترشيح دا مزاج او غية

دا اوكازيون من صنع بلادي
حريمي رجالي وحتى ولادي
ومهما تشيل وتعبي اكياس
لازم تخرج من الباب فاضي

دا اوكازيون دعاياته اونطة
من امريكا لغاية طنطا
وماحدش راح ياخد حاجة
الا اصحابه تجار الشنطة


رشح نفسك زي الناس
دا مافيش حد احسن من حد
راح تطلع ف التلفزيون
وتقول للفرعون انا ند

رشح نفسك ما تأخرش
لوعندك صورتين وبطاقة
المسألة مش عايزة ذكاء
دا شوية فهلوة وحداقة

طبعا كله سقوطة اكيد
باستثناء نفس الفرعون
بس وجودك برضه مفيد
راح يدي للفوز بهارات
حبة فلفل على كمون

رشح نفسك وما تشغلش
بالك بقى بنجاح وسقوط
اقل ما فيها اهو حفل طهور
تاخد منه هدايا ونقوط

السذج صدقو اوهامهم
راحو بسرعة رمو الاوراق
فاهمين انها دي ايامهم
وان الكرسي صبح في ايديهم
مش ناقص الا الاجراء

الفرعون عايز كومبارس
يظهرو ف الصورة وياه
علشان يدو الفليم حرارة
ويخدمو ع البطل اياه

الفرعون راح يسخر منا
واحنا بنجري في الحملات
هو هايقعد كده يتفرج
وتجيلو لعنده الاصوات
احنا هانعمل له الخلفية
علشان يكسب الانتخابات

رشخ نفسك علشان تسقط
وانت عارفها نتيجة اكيدة
ما تجيش بعد اليوم وتعيط
وتقول انا عملو لي مكيدة

رشح نفسك واعمل منظر
واطلع ع الشاشة علمهم
واعمل فيها خبير ومفكر
هايشوفك العاقل يتكدر
ويشوفك التافه يتمسخر

اوعى تصدق كله كلام
لا في تكافؤ ولا اوهام
دول مهابيل راكبين عربية
مش عارفين رايحين على فين
ولا عارفين راح يدفعو كام

خيل منهك في سبق مجنون
مالهوش مضمار ولا حكام
ولا حتى الخيل قادر يمشي
لكن عارف فشله اكيد
لو مشي ورا او مشي قدام

هزأ نفسك بالمجان
مش راح تدفع ولا مليم
كله الشعب ها يدفع تمنه
سواء في فلوس
ولا ف اهانات ولا في طغيان

الشعب المصري مسكين
ربنا نكبه بالاموات
والعجزة ومحبي الذات
بيساعدو اميركا في اهانتنا
لما يقولو دي انتخابات
ويسخرو من عقل الملايين

دعوة من القلب للراحة

أنا من رأيي انك ترتاح **** يا الى غمرت حياتنا نجاح
من ايام الضربة الاولى **** وانت حياتك رايحة كفاح
ضربة مباركة هزت يافا **** وخلت تل ابيب اشباح
بس انا رأيي انك ترتاح **** وكفاية عليك الاصلاح
عهدك هو العهد الذهبي **** خلانا عايشين في براح

أما حياة المصريين **** فالتغيير راح اقول فيه ايه
نص الشعب اهو عرف الجوع **** قبل ما تيجي يا ابن الايه
عهدك قضى على الفقر تمام **** والغلبان فيهم بقى بيه
المبسوط ركب المرسيدس **** والتعبان جابلو شيفورليه
كل العز ده من افضالك **** من غيرك راح نعمل ايه

سعادتنا ان نشوفك قاعد **** كل يومين تهبدنا خطاب
او تفتح مشاريع مبروكة **** وتقول اتوظفو ياشباب
ما بقاش في المحروسة عاطلين **** الا التافه والمغتاب
حرصك على رعاياك مفهوم **** ما وصلوش ابن الخطاب
لو طفلة جاعت ف حلايب **** تبقى الليلة بحالها هباب
لافي سجناء ولا معتقلات **** ولا تعذيب ولاحتى عذاب
علشان كده عايزك ترتاح **** دا انت الهم ف عهدك غاب
والاخلاص ف ايامك استشرى **** حتى اللص في زمنك تاب

سفينتنا يا ريس معطوبة **** والركاب فيها مشاغبين
بس انت قبطاننا الماهر **** بتسير بيها لبر أمين
احنا ياريس اممناك **** عين املاك الوطنيين
اما العملا بتوع امريكا **** دول ناس مرضى او مجانين
ثرواتنا القومية بحالها **** ما تساوي منك نظرة عين
خليت مصر بلدنا النايمة **** سبقت المانيا والصين
صناعاتنا في اسواق العالم **** عاملة شكاوى من الحاقدين
كله بيشكي من الاغراق **** من صناعات المصريين
عربيات "كلوباترا" و "أحمس"(1) **** غزت العالم بالملايين
حتى الايرباص تعتبت منا **** بتقول ان " الايرجعارين "(2)
خلتهم يقفلو مصانعهم **** وينضمو لجيش العاطلين
والبوينج بتدعي علينا **** خسارتهم وصلت بلايين

مش عايز احكي عن سيادتنا **** لا يقولوا دا راجل كذاب
لما تقول لواشنطن لأة **** بتسمع من الباب للباب
ولا شارون لما بتزغرلو **** وتقولو نفذوا يا كلاب
قبل ما يتجي كات كرامتنا **** متهانة وحياتنا سراب
جيت خليتنا نسود العالم **** سواء كانو منا او اغراب
بيقولو ان الحكمة لسانك **** بدونه تسود قوانين الغاب
دا الى مخلينا بنحبك **** و انت هواك قاهر غلاب
مش بس اجنتنا تبايعك **** دا النطفة كمان في الاصلاب
علشان كده عاوزك ترتاح **** يا الي الشعب في حبك داب

المنطقة عايشة بافكارك **** وانت خصيم الاستعمار
ما في طير بيعدي في سماها **** الا باذن كبير الدار
ولاحتى خطوة بياخدوها **** من غير ما تكون لينا قرار
حرصك على سيادتنا ياريس **** خلانا شعب الاحرار
حيدت أوروبا وامريكا **** وزجرت بقية الاشرار
قلت لهم خليكو في حالكم **** دا احنا بلدنا بلد جبار
لو واحد فكر يتعبنا **** نرمي بلاده ف حفرة نار
المنطقة كلها اعواننا **** ما في مهانة ولا استهتار
علشان كده عايزك ترتاح **** قبل الحب ما يصبح نار
---
1 بضع من اسماء ماركات السيارات التي تنتجها مصر وتوزع في انحاء العالم.
2 هي شركة انتاج الطائرات المصرية والتي يتوقع لها ان تقضي على بوينج والايرباص تماما في فترة مبارك الثامنة بعون الله. هذا طبعا اذا مارفض نصيحتنا وأصر على عدم حرمان الشعب من خدمته.

في 17 من دا الشهر

في سبعتاشر من دا الشهر
الريس راح يلقي بيان
عن انجازة ف المحروسة
عن صولاته عن جولاته
كأطول حاكم ف تاريخ مصر

الريس ياجماعة بيانه
ها يبقي بداية جديدة لعهد
راح ينقلنا قرون قدام
ويخلينا نشوف احلام
ما يشوفهاش اطفال ف المهد

العهد الميمون يا اولاد
ذي ماقال التلفزيون
ها تبقى بدايته بالاعياد
وكل ما نمشي فيه ونتوغل
راح نتعثر في الامجاد
لحد ما ييجي يوم ونفوق
على عرشه ورثه الاولاد

في سبعتاشر من دا الشهر
الريس راح يلقي بيان
عن مشاريعه ضد الفقر
عن اسلحته عن ادواته
عن اصراره حتى النصر
عن حركاته ومناوراته
ضد فساد النفعيين
والشلة الفاسدة ف القصر
عن أيام ها نشوفها معاه
اليوم فيها يساوي العمر

الريس راح يلقي قصيدة
ها يضمنها حكمة مفيدة
عن قدر الانسان ف الدنيا
والشيخوخة وطول العمر

الريس ياجماعة ها يبدأ
فصل جديد في رواية قديمة
يمكن تغيير ف الديكورات
و الاضواء ولا الاصوات
والاعلان ولا الافيشات
لكن هي نفس التيمة

في سبعتاشر من دا الشهر
الريس ها يغني علينا
اغنية سمعناها كثير
هايغنيها بنفس القوة
وهاتعمل نفس التأثير
واحنا ها نستقبلها ببهجة
مش من الحب لكن من القهر

في سبعتاشر من دا الشهر
الريس راح يلقي بيان
ها يبرأ نفسه مع والي
من امراض نص بالمحروسة
بالفاشيولا والسرطان
ها يقول ان الكارثة سببها
ان الرب عليكو غضبان
علشان بتخلفو بزيادة
من غير رخصة من السلطان

مش ها يكلمنا عن السجن
والاف النزلاء ضحاياه
كم منهم ماتوا من التعذيب
وكم ف الصف بيستناه

مش هايقولنا عدد الجوعي
في نجوع المحروسة وقراها
ولا عدد العاطلين في بلادنا
والاحزان والام اللوعة
والحرمان ف عيون اولادنا

مش ها يقولنا ولا راح نسمع
ان اربعة وعشرين عام
عدت من غير اي نجاح
ولا حتى خطوة لقدام
وان حياتنا ف عهده الاسود
ضاعت كلها ف الاوهام
كأنها كات غيبوبة طويلة
او كنا ماشيين نيام

مش هايكلمنا عن الشلة
الي سرقت نص فلوسنا
وهربت بالباقي على برة
والشعب بيشرب اوهامه
مستني التنمية الشاملة

في سبعتاشر من دا الشهر
ست سنين من عمر الامة
ها يضيعوا كمان ف التخريب
كأن الماضي ما كانش كفاية
او اننا بنموت ف هواه
رغم الشيخوخة بدون شيب

الريس في الست سنين
ها يكمل مشروع امريكا
في السيطرة على باقي الشرق
على نفطه وغازه وسكانه
وقبل نهاية الفترة الخامسة
ها تكافئه برمي ابنه مكانه

الريس في الست سنين
هايدي لتل ابيب حصتها
ف ثروات الامة المنهوبة
سواء من النفط ولا الغاز
او حتى هواها وميتها
تل ابيب راح تبقى زعيمة
واحناها نمشي تبع رغبتها

في سبعتاشر من دا الشهر
الريس راح يلقي قصيدة
درة عصرها ف التدليس
دبجها شعراء القصر
وباركها الكهان وقالو له
روح نيم بيها المتاعيس

وبعد مايلقي قصيدته اياها
الريس راح يبدأ حملة
ها تخليه اضحوكة العالم
هو ما كانش عايز يعملها
ولا حتى خطرت على باله
بس تقول ايه للاقدار
ولبوش الامريكي الظالم.

حبــل الغســيل

اوعى تقدم أي مرشــح **** الا ما بعد اخينا يفلسع

مش مفروض نربك ثورتنا **** لازم اخينا الاول يخلع

لازم يبقي هدفنا أكيد **** مهما يجد ما فيش تمديد

الاصلاح ييجي بعد ما يمشي **** مفيش اصلاح ويا التمديد

مش ممكن ييجي الاصلاح **** من ناس كل حياتها فساد

ناس من افسد خلق الله **** مش ممكن يصبحوا امجاد

مهما يطنطنوا ع الاصلاح **** دول اوغاد اوغاد او غاد

الترشيح ضد الطغيان **** راح يدي لالاعيبة شرعية

لو كان فيه أي انتخابات **** راح ياخد تسعين في المية

الترشيح مفروض مش وارد **** الا بعد ما يمشي البارد

@@@@

ربع قرن بدون شرعية **** خلى خرابها مالوهش مثيل

فما بالك لما يكون شرعي **** مش هايخلي حبل غسيل

ها نشوف ايام زي النيلة **** وتبقى حياتنا ضلام موصول

ونقول الماضي كان افضل **** ونشوف ذل ما شافهوش جيل

ها يقول انا جاي بانتخابات **** وممثل لارادة الشعب

الى ها يعمل حاجة ها ابيده **** دي امور مش تهريج ولا لعب

وقبل ما ييجي يسيب الكرسي **** ها يرتب لابنه المحروس

دي انتخابات شرعية صميم **** اوعى تعمل فيها فلحوس

دي ارادة الشعب الغلبان **** الى بيصنعها المتعوس

ابنه هايبقى ابشع منه **** ده بتاع امريكا المخصوص

كشفت عنده قدرات خاصة **** وذكاء حرامية ولصوص

جزء دراسة وجزء مواهب **** وجزء وراثة من الهكسوس

@@@@

الاصلاح ده عشان امريكا **** مش علشان الشعب المصري

لو علشان الشعب المصري **** ليه اتأخر وما جاش من بدري

خمسة وعشرين سنة تأخير **** مستنيهم تحت الكوبري؟

لحد ما امريكا تشخط فيه **** وتقولو ها يضيع الكرسي

لو ما عملتش لعبة حقيرة **** تظهر بيها حاكم عصري

اضحك على الشعب المغبون **** قول له ها نعمل انتخابات

وانت عارفها انها مضمونة **** المسألة لعب وحركات

شكلنا حتى امام العالم **** لازم يبقى شوية ثبات

مش عايزين ندعم حكام **** زمانهم عدى ومر وفات

@@@@

امريكا معنية بمصالحها **** لو ها تبيد الشعب المصري

شوفوا صور القتل في بغداد **** تخلى الدم في راسنا بيغلي

لكن حكامنا العملاء **** بيتلفعوا بالصمت المزري

شايفين ان حياتنا رخيصة **** ما تساوي مسمار في الكرسي

هل يخلع الشعب المصري الكافولا؟

الريس بقي قلبه حديد*** بعد ما بوش ادالو تمديد

ها يخلي وقعتكم سودة*** وايامكم راح تبقي صديد

بكرة الضرب ها يبقى بلاش*** والبهدلة من غير ترشيد

اخونا نظيف ابو دم خفبف*** اقنع بوش ابو مخ بليد

قالو اديلو الفترة الخامسة*** وها يبقي خاتم ف الايد

####

الريس بقى قلبه حديد*** بعد ما بوش مضى التفويض

شوفوا البسمة منورة وشه*** كانه عروسة في ليلة العيد

كم يوم راح يبدأ حملاته*** وف جيبو صك التأييد

عمي نظيف الرجل النابه*** قال لبوش الشعب فريد

عايش برة اطار العصر*** ومالوش دعوة باي جديد

خلونا نعلمه بالراحة*** ونفهمه بقى في التمديد

وبوش بيعرف اكثر منا*** واحنا يادوبك عنده عبيد

هو المتصرف في شئونا*** ابن الامرة والاماجيد

عارف مين الى بينفعنا*** وعارف ايه دايما بيفيد

####

الريس راح يبقى عضنفر*** والى يقف ادامو يتبخر

ها يخلي ايامكم سودة*** والى ها يتحداه راح يخسر

الراجل ياجماعة مستقوى*** بوش ادالو الضوء الاخضر

اخونا نظيف الرجل "الشاطر"*** قالو الشعب بتاعنا صغير

والفترة الخامسة مطلوبة ***علشان ينضج فيها ويكبر

فترة اتنين او حتى تلاتة*** وها يبطل يستخدم بامبر

ساعتها ها نفطمه عن نزواته*** ونجيبلو انتخابات وتحرر

####

الراجل طاعن في السن ***ومزاجه دايما متعكر

لما نظيف ادا لو الورقة*** رجع له شبابه ومشي يتغندر

من فرحته ما بقاش على بعضو*** بايت طول الليل بيزمجر

قال انا ها اسجن كل خصومي*** وابهدل فيهم وارمي واكسر

والى ها يرفع منهم صوته*** راح يختفي قبل ما يستنكر

عايز الفترة الخامسة هدوء*** والسادسة مش راح تتغير

والسابعة ها ياخدها " جمال"*** والتامنة يترستأ اكتر

####

الريس راح يبقى غضنفر*** اخونا نظيف الرجل الاخضر

جابلو التمديد من اسياده*** جابو من عند الكاهن الاكبر

وعشان يدي اشارة لبوش*** انه ف موقف اخطر واخطر

بدأ التقفيش في الاخوان*** وكفاية بدون اي مبرر

حتى التكفير صحي من نومه*** وبدأ يتآمر ويدبر

####

الريس ياجماعة مستبيع ***حاسس ان طريقه مدحدر

فيه حالة غليان ف الداخل*** والاوضاع برة بتتغير

فيه سوابق تاريخية كتيرة*** ومواقف من النوع ده واصغر

ضاع فيها طغاة من عينته*** كانو اشد واعتى واكبر

!!!لكن لما ساعتهم حانت*** امريكا كات قاعدة بتتضفر

في قضية المراقبين الاجانب


احنا معاك يانظامنا الوطني **** بنرفض كل قرار مشبوه
لما يجيبوا رقابة من برة **** يعمل ايه العادلي واخوه
داحنا قرارنا وطني صميم **** نابع من ارادتنا ياهووه
الداخلية في مصر ياعالم **** انزه من بوش ومن ابوه
####
احنا معاك يانظامنا القومي**** بنحيي فيك الاستقلال
احنا بنرفض كل خيانة **** من المصريين الاندال
ايه يعني ندخل اغراب **** في انتخابات العيلة الواحدة
دول عالم وطنية ما فيش **** انا مش عايز اقول دا ملاحدة
ناس وطنيتهم معدومة **** قاعدين للشاردة والواردة
####
نظامنا يا عيني صحي من **** النوم على ترانيم الاستقلال
لما قالوا له فيه مراقبين **** قال لك سوق في الاستهبال
صحي الشعب النايم قل له**** قوم دي مهانة مع اذلال
هايجيبوا مراقبين من برة **** من امريكا وبلاد الغال
يراقبوا انتخاباتك القومية **** ودي كارثة ما كانت ع البال
####
يانظامنا بطل تهريج **** مفروض يعني شوية حياء
احنا قرارنا بييجي من برة **** واحنا ننفذ كالاجراء
لما أخونا بوش بيأمر **** ما بتبقاش قراراته هباء
قبل ما يخرجوا بالتعديل **** كانوا بيقولوا ما فيهش رجاء
وبيتسابقوا في الاستنكار **** والسخرية الاستهزاء
ازاي نبقى بلد محترمة **** ونروح نلعب في الدستور
دا احنا هانبقى مسار سخرية**** من امريكا لكوالالمبور
لكن لما البيت الابيض **** قال ادوها قراط تحابيش
فجأة بقى التعديل مطلوب **** واهو جه من الريس بقشيش
امريكا فاهمة اللعبة كويس **** وفاهمة ان التعديل مش جاد
الترزية بتوعنا المهرة **** خلوا الامر تراب ورماد
مش ممكن تمسك فيه حاجة **** او تلقى فيه اي سداد
خلوا الترشيح مسألة صعبة **** من لوغاريتمات الاجداد
ترزيتنا ما شاء الله **** افسد حتى من الافساد
وأمريكا معنية بالمظهر **** مش مسؤولة عن الاعداد
لو امريكا مهتمة حقيقي **** كات ها تقوله لم الدور
يا اما يكون اصلاح معقول **** يا اما تسيبها بقى وتغور
####
وعلشان تكمل كل الصورة **** لازم يبقي فيه مراقبين
امريكا عارفة ان اخينا ناجح **** وان مافيش حتى منافسين
لكن لازم العالم يعرف **** انها بالشدة وباللين
غيرت المحروسة بلدنا **** وخلتنا ناس عصريين
####
طبعا احنا نظامنا دا قومي **** استقلاله ما فيهش جدال
بس ياعيني قراراته بتيجي **** من البيت الابيض في شوال
بينفذها بكل مهانة **** ويقول لك دا الاستقلال
بكرة هاييجي برضو مراقبين **** وهايستقبلهم على عينو

وها يتنافسو في التبرير **** من غير اي خجل في جبينه
####

احنا نظامنا ارادته حديد **** ما بيسمعش اوامر حد
لازم يعني نقف وياه **** ونقول له انت نظامنا بجد
مش عايزين غيرك يحكمنا **** وانت مداسك فوق الخد

قاطعوا الاستفتاء وارفضوا التعديل الزائف

استفتاء استفتاء **** اوعى تروح الاستفتاء

انت يا خالد قل لوهيبة **** وخلي علية تقول لبهاء
وانت ياعادل قول لحميدة **** وخلي ابو جورج يقول لسناء
اوعى يروحوا الاستفتاء
وسلامة ينبه على ويصا **** ومصيلحي يعدي على وفاء
كله ينبه اخوه واخواته **** اوعو تروحو الاستفتاء
استفتاء على ايه يامواطن **** دا احنا حياتنا بقت اشلاء
عيشتك حلوة قوي وهنية**** ولا حياتك فيها رخاء
ناس مش لاقية العيش الحاف **** وناس بتعيش ذي الامــراء
وناس بتدور في الصناديــق **** يمكن تلقى بقايا عشـــاء
قل لجيرانك ولاصحابــك **** اوعو يروحوا الاستفتاء
الاستفتاء ده بتاع امريكــا **** علشان يقعد ابوعــــلاء
وتقعد نفس الشلة الفاسـدة **** واحنا نعيش زي السجنــاء
الاستفتاء ده بتاع امريكــا **** ترضى تكون ويا العمــلاء
وانت يا بت يا حلوة يا بيضة **** يا الى خطيبك طلعت عينــه
مش عارف يعملك اوضــة
اوعي يروح الاستفتاء
قولي لعمك ابو حمــدان **** والشيخ عادل ابو هيفـــاء
اوعى يروح الاستفتاء ****
وانت يا عمدة كفر العنــبة **** اوعى تخاف من ناس الحــزب
دول عالم فاضية وتافهــين **** كل كلامهم كذب ف كـذب
امريكا هي سبب مصايبنــا **** هي السم وداء الـــــداء
هي تجدد له على الكرســي **** بعد مهانة واستجـــــداء
واحنا يطلع عين اهالينــا **** نعيش في نكد وعذاب وشقـاء
طريق الاستفتاء لاخينا **** مفروشة بصمت الجبنــــاء
صمت على القتــل في رام الله **** والفلوجة وسامـــــراء
لو هاتروح الاستفتاء **** اعرف انك من الشــــركاء
شركاء امريكا الملعونــــة **** الى ايديها ملانة دمـــــاء
دماء اخوانا في كل مكـــان **** في غزة وصابرا والعــــراق
عمر الشعب ما خاف امريكـا **** ولا كان ليها عنده حســـاب
لكن الريس لاجل الكرســي **** يعمل الف حساب وحســاب
صدام اخوه النسخة التانيــة **** لحظة وكان بين الانيــــاب
خلا عروش العرب اهتــزت **** من طرابلس لشبرا شهـــاب
واحد فيهم بل هدومــــه **** والثاني خلع الجلبـــــاب
فتشوا جيبه وحتى دماغـــه **** وقالو له يلا من الاحبـــاب
بقو يزوروه ويودو بـــلاده **** بعد ماكان كلب ابن كــلاب
حكامنا بيعبدوا امريكــــا **** وقلوبهم مليانة خـــــواء
راحو انبطحو امام الظالـــم **** كله مهانة واستخـــــزاء
عدى عليهم بوش نايميــــن **** قال خدامي من العمــــلاء
سلطنوهم وابسطوهــــم **** شعوبهم عندي ماليها عـــزاء
الى عايز يحكم مدوا لــــه **** بس ولاءنا ما بعــــده ولاء

فيلم دودي والزعيــــــم

فين أيام أكتوبر فيــــــــن **** دا احنا بقينا في الرجلين
كنا ساعتها القوة السادسة **** دلوقتي ستة وستيـــــن
شوف موضوع تاني ياريسنا **** يقنع طفل بتاع سنتيـن
+++++
حاول تتفرغ اسبوع **** وتشوف الفليم المضروب
لو سينما من الدرجة الثالثة **** الجمهور هايحدف طوب
الاعداد كان فيه مبالغات **** والتصوير برضك معيوب
لكن الفيلم ديكوره كويس **** و واضح يعني حماس عشوب
أما ملابس بطل الفيلـــم **** فسبحان العاطي الوهـــــاب
بدلة شياكة بدون كرافتة **** بتقول ان الحشو شبـــــاب
لكن دا طبعا مش صح **** ما احبش اكون ناقد كذاب
أما الضوء فما شاء الله **** نورك في الاستديو خطير
خلا الناس ماشيين تايهين **** وغلوش على طقم التصوير
+++++
انا بكيت في العرض يا ريس **** ودا مش من فرط التأثــــير
أنا بكيت على مصر بلدنا **** وبكيت على نفسي وعلى الغير
أنا بكيت على مستقبلنا **** وعلى ايام الهنا والخيـــــــر
إحنا بقينا شعب منافق **** ما عندوش حتى بقايا ضمير؟
ولا فقدنا حاسة الشــم **** ويا القدرة على التفكيـــــر؟
+++++
شوفه لوحدك مش حواليك **** كدابي الزفة الهتيفـــــــة
ها تلاقي فيلم كوميديا رخيص **** ما يساوى حتى التعريفة
الفيلم ياريس مشموم **** ما فيهوش حتى بقايا نجوم
نجم آفل ونجم غافل **** والمخرج بيقول مظلوم
بيقول هما جابوه بالعافية **** وقالو له مش عايزينها وجوم
عايزين فيلم فرايحي جميل **** يخلي الناس ماتشوفش النوم
المخرج عمل الى عليه **** بيقول انا ما علييش لـــوم
البطلين في نهاية العمر **** بيحكوا حكاية ما فيها تشويق
والسيناريست منيل خالص **** كاتب الفيلم بحاله تلفيــــق
وما فيش حبكة ولا ازمات **** ولاحركة ولاحتى طريـــق
الفيلم كوميديا سوداء **** من الالف لحد الياء (1)
+++++
انزل مرة في وسط الشارع **** شوف السخط في عين الناس
الناس مش فاكرين اكتوبر **** لكن الرفض هو الاحساس
سيبك بقى من الضربة الاولى **** والطيارة وخط النــــار
كلمنا عن خط الفقــــــــر **** والهبيشة والاستهتــار
عن ملايين تنهشها الحيرة **** مش لاقية وظيفة ولارغيف
درسوا وراحوا الجامعة وتعبوا **** واخرتها مكنسة ورصيف
كل ما ييجي مسؤول ينهبهم **** وانت تقول دا مساعدي شريف
لما مسكت الدفة يار يس **** كان كم سعر العم دولار؟
اهو دا مؤشر على التنمية **** والرفاهية والاستقــــرار
كلمنا عن بيع شركاتنا **** للحرامية والتجــــــــار
عن عمولات هبشوها اسيادنا **** وسابوا لنا الاوهام تذكار
كلمنا عن بيع كرامتنا **** لكلاب امريكا الشطار
سيطروا على المنطقة وخادوها **** وانت وسيطهم والسمسار
كلمناعن الثورة النايمة **** في صدور مكتومة على نار
كلمنا عن عزة مصر **** الى بيدهسها الفجـــــار
كل فخار اكتوبر ضاع **** يوم ماطاطينا للاحبــار
لما بقينا نحج لتكساس **** لمزارع سيدنا الجبــار
نسترضيه بكرامة الشعب **** يادي الخسة ياد للعـــار
+++++
كرهتنا في النصر وسيرته **** من تكراراك للمـــوال
احنا قرفنا من موالك **** وزهقنا من طول البال
تلاتة وعشرين سنة من الكذب **** تدجيل عمال على بطال
كأن الشعب فيران تجريب **** او نسانيس عايشة ف ادغال
فيه ثلاثين مليون يامبارك **** عايشين تحت خطوط الفقر
دول عايشين في ظروف ملعونة **** ما فيش في حياتهم غير المر
بيقولوا مع الشعب كفاية **** من عابدين لمصيلحة الكفر
+++++
فيه موضوع هو الى شاغلني **** ومخليني مش باعرف انام
دودي اخويا النجم الصاعد **** خاد ف الفيلم الساقط كــام؟

--------
(1) علمت الاعصار ان تعليقات المخرج صرح بها في جلسة خاصة مع اصدقائه بعد ان وجهوا له اللوم لمشاركته في الفيلم ولكنه دافع عن نفسه بانه لم يكن يستطيع ان يرفض ذلك علاوة على ان الاغراءات المالية كانت كبيرة للغاية

12 مايو 2005.

صدمــة

يا ابو شعر اسود قوي وتقيل **** يا صغير يا زينة الحـــارة
كل ما اشوفه بيقص شريط **** اقول اهو "بوند" لابس نضارة
ولا متاب باتشان في السيما **** لما ينط من الطيــــارة
بس الناس قلبها مش سالك **** كلها كذب وغيط وحقارة
لما قالوا لي مرشح نفســه **** قلت صغير قوي ياخسارة
ده يبقى مخالف للدستــور **** كله شباب وهياج وحرارة
قالو لي ياوحشة ياهبلة يابومة **** مخك مش اكبر من فـارة
ده مرشح للفترة الخامسـة **** وماسك السلطة بأيد جبارة
دا معدي التسعين ياحبيبتي **** وشعره الاسود شغل عطارة
خليكي في كتب المزيكـة **** وبكرة ها تتخرجي نجـارة
وتقعدي جنب الحيط سنوات **** لحد ما ييجي عريس للفارة

9 مايو 2005

الرئيـــس يغنــــي
بوش الغيرة بتاكل قلبـــه **** من اخلاصي وحبي لشعــبي
كلها كم سنة راح يتفسـح **** ويسيبني قاعد على الكرســي
قبل ماريجان ييجي السلطـة **** كنت انا قاعد قبله باغـــني
جه ومشي وانا برضه مكـاني **** وجه بوش الاول متهــــني
مشي من الفترة الاولى ياعيني **** كان نفسه يقعــــد ويتني
وبعده بتاع مونيكا شرفــنا **** بعد ما بهدل بـــوش الاول
قعد الفترة الاولي وخــلص **** وبعد ما خلص بدا مـن الاول
خاد اثنين وخلع من السلطـة **** قبل ماييجي بوش المتدهــول
انتخاباته كانت اعجوبــة **** خلت كل العالم يضحــك
ساعة يقولوا دا خادها في جيبه **** وشوية يقولوا بيتمحـــك
والعالم واقف يتفــــرج **** واموره مش عايزة تتحــرك
قالوا امريكا في الانعـــاش **** وولادة صعبة ورايحة تــغيب
وبعد يومين جابت المحـروس **** ولادة الشوم عمرها ما تخيـب
بعدها طلع فشله علـــينا **** وجنونه وعاهات الاســرة
بعد البرج قال ياجماعــة **** الشرق دا ها نخليه مزيكــا
ها نشيل الحكام الظلمـــة **** ونخليه يسبق امريكــــا
مش عايزين ارهاب وبـلاوي **** ومشاكل حاوريني ياكيكـة
انا قلت لهم انا مش ماشــي **** ها احكم بلدي وشعبي عايزني
ما ابقاش قاعد من قرنيـــن **** وييجي ابن امبارح ويشيـلني
لكن فيه عندنا ناس صيــع **** ودا بصراحة هو الى غايظـني
بيرددوا تفاهات امريكـــا **** فاهمين ده كلام بينرفــزني
ويمشوا في مظاهرات خيبانـة **** ويقولوا ما همش عايزيــني
فاهميني قاعد بمزاجهـــم **** ولا هبلهـم راح يتعبــني
انا ر اح اقول لحسود امربكا **** سيبني لوحدي انا وشــعبي
انا فاهم مطلوب اصــلاح **** بس سيبوني اشوفه بنفسـي
الاصلاح ما يجيش من بــرة **** ولا من اهبل مش متــربي
انا في السلطة بقالي سنيــن **** واعرف ايه يمشي مع شعـبي
الشعب بتاعنا غلبــــان **** وها يحتاس في مشاكل بعدي
الشعب بيكره امريكا ودي **** نقطة شايفها انا ف صـفي
بكرة يسيب البيت الاسـود **** ويقعد عاطل زي ابـــوه
ييجوا يقولوا لي نفسه يقابلك **** اقول مش فاضي يلا زيحـوه
ساعتها ها يعرف مدى قنزحته **** ويعرف ليه رجالتي شاطـوه

5 مايو 2005

تهنئة وانذار الى بوش

عمنا بوش يا ابو الســلاطين **** يجعل عهدك زين ف زيـــن
كل الشعب بيدعي لعــزك **** من المنوفية لراس التيــــن
وكل ائمتنا بيدعــــولك **** في يوم الجمعة وف العيدين
وبندعي لك يعمر بيتـــك **** بولي عهد يسر العيــــن
الله يزيد مجدك امجــــاد **** ويرفع هامتك في العالمين
وينصر جندك في المعمــورة **** من نيويورك لشرق الصيــن

يا الى حميت الامة بسيفــك **** من الصليبية (2)لكوم أشفين(3

+++++++++++
انا بقى واحد من رعاياكـم **** من المحروسة بلاد الزيـــن
انا عارف مماليككو كثيــرة **** يسرح فيها الذهن يوميـــن
بس انا ها اوصفلك حتتنــا **** علشان تعرف احنـــا منين
عارف برضه مشاغلك يامـا **** والجغرافيا دا علم لعـــين
انزل بحر الروم الشرقـــي **** امشي شوية وخش يميـن
تلقي بلدنا فيها الاهـــرام ****وفيها ابو الهول ابو مـخ تخين
احنا يامولانا من الاخـــر **** جنب حبيبكو الى اسمه شارون
شعبنا عمره ما فكر يشكـي **** لاسمح الله ما احناش ملاعيـن
لكن الوالي بتاعكـــم فينا **** مخلي حياتنا طين ف طــين
خمسة وعشرين سنة ماشبعش**** ناوي يكملهم خمســـين
لكن الظلم يا صاحب العظمة **** خلا حجارة السكة تليــن
الوالي بتاعكو جبايته كبيـرة **** وبطنه كبيرة وما هو امــين
ناس مش لاقية العيش الحـاف **** وهو بيكنز بالملاييــــن
بيت المال خربه مولانـــا **** ما بقاش فيه غث ولا سمين
احنا يا مولانا ما بنكرهشي **** والي عظمتك لو كان ميــن
عارفين ان الجزية في عهـده **** بتمشي مضاعفة نوبة واتنين
كل المال مولانا يهـــون **** الا كرامة شعب حزيــــن
والي عظمتك باع كرامتنا وباع ايامنا**** وحتى تاريخ المصريــين
+++++++++++
مولانا بوش يا ابو السلاطيـن **** احنا رعاياك المساكــــين
لو تخذلنا بمين نستنجـــد **** ولا نروح منهم على فـــين
دا ابو الهول من همه اتكلـم **** بعد ما كان شيخ الصامتين
احنا عظمتك شعب غلابـة **** جنب الحيط دايما ماشيــين
نص بلدنا في الداخليـــة **** والنص الباقي مواطنيـــن
لو واحد قال انا زعــلان **** راح يختفي في خلال ساعتين
ولو واحد قال انا مبســوط **** اقل ما فيها يغيب شهــرين
ولو واحد سلم ع الــوالي **** يطلبوا من اسرته كفنــين
مطلوب منك في المحروسة **** تدفن قلبك بين كهفيـــن
حتى الهمسة في نص الشـارع**** ممكن تبقى نهاية اتنيـن
++++++++++
مولانا بوش يا ابو السلاطيـن **** يا راعي الازهر والحرمين
بعد يومين والى المحروســة **** راح يبعت اخشيد واثنيــن
يحملو للاستانة هدايـــاه **** فيها كام صنف وفيها كام لون
وتزلف لما شــــاء الله **** للحلوف الي اسمه شــارون
عارف تأثيره على مصيــره **** ومودته لابو الســـلاطين
قاله ياعم شارون توصيـــة **** عند الباب العالي يا زيــن
رد حبيبي..اخويا الغــــالي **** طلبك من عيني الاتنيــن
يلا اعزمني في مصر اتفسح **** وناخد صورة ولا اثنيــن
نعمل منظر يعني اونطـــة **** كأننا ها نحل فلســـطين
نضحك بيه على الصدر الاعظم **** ويوصل علمه لابو السلاطين
ساعتها ها اقوله ده من رجالتي **** وتقعد وتكيد الحاســدين
يعني ها ارتبلك اوضاعـــك **** وطظ في كل المصرييــن
+++++++++
قول للوالي بصوت رعايـاك **** احنا يا مولانا المساكــين
ما فيش توريث هنا في المحروسة **** ولا تجديد ولا حتى يومين
يعني بلدنا ست عقيمــــة **** بتخلفشي بقالها سنيــن؟
جابت الوالي وشالت الرحــم **** حايسة تجيب رجالة منيـن؟
كلامك عند الوالي مسمـوع **** اكتر من سبعين مليــون
صك الحكم بييجي من عندك **** مختوم بالنسر ابو حناحـين
لو ها تقوله يسيب الكرسـي **** مش ها يقولك ليه ولميــن
لو ها تسيبه ها يفضل كاتــم **** فوق انفاسنا سنين وسنين
لو عايز تخدمه مـــــولانا **** شيله احدفه ع الارجنتيــن
مش عايزين مأساة شاوشيسكو**** تتكرر مرة واتنيـــــن
+++++++++
الكرسي يا مولانا في بلادنــا **** متمغنمط وله جناحـــين
لما الواحد يقعد فيـــــه **** صعب يفارقه الا ف حالتـين
اما زيارة ملك الـــموت **** او شلوت من ابو السلاطـين
خايف مولانا يدعو عليــك **** يهبط نجمك للارضيـــن
وجيوشك ترجع مدحــورة **** زي ما رجعوا م الرافديــن
احنا كمان برضه يا مولانــا **** مش راح نقعد كده ساكتيـن
احنا عرفنا طريقنا معاكـــو **** مهما تروحو شمال ويمـــين
فاكر عطا نسر المحروســـة **** لما مسح لكم البرجيــــن
لما عملتها في الطيــــارة **** وراحوا لحقوك بالبنطلــونين
وقضيت يومك وانت معلــق **** لا طايل سما ولا شايـف طين
شايفك قاعد في الطيــــارة **** دموعك نازلة على الخديــن
عمال تبكي وحالتك حـــالة **** زي بنات بين السورين
كل ما تيجي تروح في النــوم **** تشوف البرج وطيارتيـن
++++++++++
فيه مليون عطا في المحروسـة **** بيدوروا على فرصة يا زين
طول ما الظلم عايش في بلادنـا**** مش ها يغمضلكو جفنيـن
--------------
(1) في الكويت.
(2) قرية في الدلتا

22 ابريل 2005

بيان بدء الحملة الانتخابيـــــة

(النسخة المقدمـة للكونجرس)

خمسة وعشرين سنة خدمات **** خليت المنطقة متاهـات
سلمت لكو النفط بأرضـه **** بعد جراح ودماء وآهات
واديني بامهد لربيبيتكـم(1) **** علشان تحضر الاجتماعات
بكرة كمان هاتخش الجامعة(2) **** وتبقي ايامها بلح امهـات
انا عارف انتوا بتحتقـروني **** بس انا بانفع في الازمـات
فاكرين لما اخويا صـدام **** ساق قواته وخش الكـوت
قلت ها ياخد النفط بحالـه **** وامريكا من البرد تمــوت
قمت بحملة انتو شهدتو لها **** لحد ما طار ذي الكتكـوت
خليت المنطقة في ايديكـم **** تسرحوا فيها بدون حسبـان
قواعد..جيش..اسلحة نووية **** دخول وخروج بدون استئذان
ولما دخلتو بلاد أفغــان **** تمسكوا بن لادن التعبــان
كل دقيقة في التلفزيــون **** كنت باطلع ليكو بيــان
اقول امريكا من حقها تقتل **** أي مخرب مهمن كــان
مش هاتلاقو احسن مــني **** يخدمكم من غير خـذلان
انا اقنعت الواد الليـــبي **** يسلم نفسه بالمجـــان
والواد السوري خليتـــه **** يخرج ويسيبلكو لبنــان
وحماس قعدناها في مصر **** مع عباس اخونا الكحيـان
وقالت مش راح تقتل تاني **** صهيوني او حتى انســان
انا باسلك كل اموركـو **** وفيه مليون شاهد عيــان
انا لو ها اوصف لكو خدماتي **** مش ها يكفي "ديسك" ملان
انا خدماتي لكم مجــانا **** فيها ولاء وفنـاء وجنـان
حبي لاخويا بوش في قلـبي **** مخليني مش شايف انسـان
اخدمه بعينيـا الاتنيــن **** لو راح ابيع الشعب كمان

(النسخة المقدمة للشعب المصري)
خمسة وعشرين سنة انجـاز **** حتى شوفوها في التلفــاز
شوفوا وزرائي بيشرحوا فيها **** كله حقيقة ما فيها مجــاز
التنمية مية لمية ومشاريـع **** ناجحة نجاح اعجـــاز
شوفوا المترو بيمشي بسرعة **** فيه شبابيك وابـواب وازاز
بس فيه ناس كذابة بيقولوا **** جايبة معاكم مية وجــاز
بيثيروا قلب احبابي عليـا **** ويحاربوني في استفـــزاز
بس انا مش شايــف في ****عنيكو الا مودة مع اعـزاز
انا باطعم 70 مليـــون **** علشان كده اشغالي كتيـر
بس انتو تقللوا شقاوتكـو **** وبلاش خلفة بدون تدبيـر
احيانا ما باشوفش النـوم **** وساعات باتعب من التفكير
انا علاقاتي بالدول الكبرى **** بتخليني حداها سفيـــر
انا لولايا لكنتم جعتــم **** باشحت لكو من غير تقتـير
انا بمكالمة في التليفــون **** باخلي سفينة القمح تسيـر
تيجي من روسيا او امريكا **** او من دولة اصغر بكتيــر
حكم بلدنا دا حمل ثقيـل **** اصعب من عيش الطوابيــر
انا باعمل مشاريع تنميـة **** للقرن الجاي وابعد بكتــير
شوف بطيخنا جاي مـن **** توشكى ولا الفلفل والجرجير
كل الخبرا شافوه من بـرة **** قالوا مشروعنا هايبقى خطير
بكرة ها نطعم كل اوروبا **** وافريقيا وباقي البلــدان
ويقولوا مصر خيرها عليهم **** ويستوردو منا بدنجــان
انا علشانكم حابس نفسي **** بين جدران وحياتي عذاب
كل ما افكر اسيب الكرسي **** ألاقي الناس بتسد البـاب
يقولوا هاتروح على فيـن **** وتسيبنا يا حنين يا بو الاحبـاب
من غيرك ممكن نتشــرد **** ولانعيش من غير انيــاب
كل العدا بيقولو دا عجـز **** بس انا حاسس كلي شباب
قوة..نشاط..حيوية..تدفق **** وحكمة شهد بيها الاغراب
كل دا بيخليني اتراجــع **** مع ان انا من حقي ارتـاح
حاسس لو سبت العمليـة **** ممكن تبقي سداح في مـداح
كل ما اسافر حــتى لبرة **** اشحت ع الشعب الغلبـان
اقضي زيارتي ما اشوفش **** الشارع قاعد كده بين الجدران
نفسي ف مرة اخش السيما **** ولا اتسوق من البســـتان
واشرب بيرة ف الجريـون **** وامشي ف باب اللوق عريان
بس باضحي براحتي لشعبي **** واضحي بروحي وقلبي كمان

----

(1) اسرائيل

(2) الجامعة العربية

22 ابريل 2005