رائحة الفساد تهب من شرم الشيخ

قولوا لاخونا ف شرم الشيخ ريحتك غلبت أي فسيخ
سرقاتك طلعت بالجملة وفضايحك واصـــــلة المريخ
عزبة وبتديرها لمصلحتك من غير حسابات ولاتواريخ
والشعب اهو ملهي في احزانه ترمي له قشر البطيخ
****
لو كانت عزبة ووارثها او ضيعة في بر المنـــوفية
كنت ها تنهب فيها بحكمة او هاتسيب للفقرا شــوية
حتى عصابتك ما بتعتقش عز وغيره مـــن الالاتية
حالف ما تسيبها الا خرابة وتضــحي بحبة حرامية
****
بعتوا الارض كمان مساحات تكفي ممالك او امارات
بالملاليم او حتى بلاش ولصوصكوا عمـلوا شركات
والشعب طموحه واحلامه انه يعيش عــلى أي فتات
هو في وادي وانتوا في وادي والاثنين بينهم مسافات
****
لو كانت عزبة شخصية يمكن يوم يعتـــرض الناظر
ويقولك دا العزبة ها تخرب لو مش ها ندبر ونحاذر
لكن اعوانك ولصوصك فاهمين ان الشعب دا فاجر
امواله نهيبة وغنيمة لأي حرامي او متآمــــــــــــر
****
طول الوقت بتنهب فيها كنت ازاي بيجيـــــلك نوم
ولا الارقام والحسابات ورصيد اليورو المــشئوم
كان بيخلي ضميرك تايه من غير أي ندم ولا لوم
مع ان الأموال مسروقة من شعب محطم محروم
اقنعته ان موارد بلده ما تجيبلوش ولا فصين توم
وان العيش الحاف لوطاله يدعي يوماتي يارب يدوم
وانت بتلهف مع أولادك وفصيلة الغربـــان والبوم
وتقول العز ما بيدومشي أكنز قبل ما ييـــجي اليوم
وتلاقي الكرسي يبدحرج وتخش معـــــاه البدروم