الله يرحم ايامك ياعادلي
الله يرحم سنينك
ياعادلي ياحبيبنا
كان استفتاءه عظمة
كنا بناخد نصيبنا
وتبقي هيصة ولمة
والضرب من حبايبنا
وتحرش مع شتايم
لو قلنا مش عاجبنا
****
على ايامك يا عادلي
الاستفتاء جميل
فيه زيطة وفيه اونطة
واغاني على مواويل
كان نزهة وعلقة حلوة
ويوم مرهق طويل
غير الصناديق بتاعتك
والحشو والتقفيل
قالوا لي ان انت نايم
ع البرش..دا مستحيل
****
ف ايامك الجميلة
كان يبقي مهرجان
الكل ياكل عيش
ويفيض منه كمان
سواء بتوع الشاي
او فرق البلطجية
والسريح الغلبان
****
ف ايامك الجميلة
الاقتراع كان فسحة
العيلة وعيلة العيلة
من بنها للصعيد
وجيوش م البلطجية
ييجوا يشاركوا ف فرحنا
الى بيرفع له سنجة
والي بيخرج بآلي
اوسيف مسنون وحامي
او حتى قضيب حديد
****
والمسجونات سوابق
يخرجوا ف الكرنفال
يقلعوا البنات
ويبهدلوا العيال
والشرطة واقفة تشرف
وتقول دا بلدنا حلوة
ما فيهاش ابدا محال
فينك ياعادلي ارجع
وجاوبنا على السؤال
****
على ايامك ياعادلي
والاستفتاء معارك
كان فيه نصر وهزيمة
والاستفتاء له قيمة
والناس تقعد تبارك
كنا بنخرج بقوة
حتى الي ساقط قيده
او الى مات وسابنا
وبقاله سنين في قبره
كان برضه يروح يشارك
واخر النهار نتيجته
تطلع كدا بالمقاس
من تحت أيد العادلي
زي ما قال المبارك
****
من غيرك استفتاءنا
يا دوبك كان جنازة
الناس بتخش صامتة
وبتخرج برضو صامتة
والهيصة والأغاني
والضرب والبواني
كله واخد اجازة
****
من غيرك لا استفتاء
ولا انتخاب ها ينفع
لو جابوا دستور قديم
او كتبوا واحد جديد
او وافقوا ع المرقع
يارجل قل لي بس
امتي تخلص وترجع
وتبقي استفتاءاتنا
ف التلفزيون تلعلع
ليست هناك تعليقات:
إرسال تعليق