مبارك وعزمي والكلاب
مكتب مبارك في مايو 2007
الرئيس مبارك جالسا في مكتبه في الصباح يطالع بعض الاوراق امامه ثم يصيح فجأة:
- ياعزمي..ياعزمي..
- ............
- انت يا زفت يا الى اسمك عزمي.
(عزمي يدخل مسرعا)
- أيوة يا افندم..ايوة يا افندم.
- مين ياعزمي الست الى اسمها بيبي دي..هي الست دي تقرب لنتنياهو.
(عزمي يدور حول المكتب ليقف الى جانب مقعد مبارك وهو ينظر في الورقة).
- اسف ياريس فيه خطأ بسيط في الترجمة. هي اسمها بي نقطة بي مش بيبي ذي ما هما كتبوها.
- قريبة نتنياهو دي يا عزمي ولا ايه.
- لا ياريس ما تقربش لنتنياهو خالص.. دي ممثلة سويدية اسمها بريجيت باردو.
- وايه موضوع الكلاب الي هي طالعة فيه ده ..مش معقول يا عزمي انا كل شوية اسمي ييجي في خبر نشراه الوكالات عن الكلاب والقرف ده.
- معلش يا ريس دي وليه فاضية وواضح ان ماوراهاش حاجة.
- أنا اول مرة اسمع في حياتي ان فيه حاجة اسمها حقوق الحيوانات..طيب حقوق الانسان وعرفناها وقرفونا بيها وكل شوية يهددونا ويتدخلوا في شئوننا لما بوظوا ادمغة الناس بالكلام الفاضي دا. ما بقيناش عارفين نتعامل معاهم. جايين دلوقتي يقولوا حقوق الحيوانات.
- شعوب ما ما وراهاش حاجة ياريس. لا عندهم مشاكل ولا تنمية ولا ازمات اسكان. ربنا يعينك عليهم.
- طيب انا ها اعمل ايه دلوقتي يا عزمي يعني اتصل برئيس السويد اقول حوش عننا الست بتاع الكلاب الى دوشانا دي. هو كمان ها يطلع يقول لي حرية الرأي وحقوق الحيوان وانه ما يقدرش يكلمها.
- طبعا ياريس انا فاهم سعادتك دول عالم فعلا مجانين. تعرف ان رئيس السويد نفسه ممكن ما يقدرش يكلم مواطن عنده.
- ما هو علشان الهباب الي بيسموه حقوق الانسان ودلوقتي طالعين في المقدر جديد في حقوق الحيوان ويمكن بكرة يا عزمي يطلعوا في حقوق النباتات ويقولوا لك ما تأكلشي الطماطماية الا بعد ماتنام ولازم تكون استريحت من رحلة المزرعة.
(عزمي يضحك ضحكة مفتعلة).
- شوف لي مين رئيس السويد يا عزمي.
(عزمي يتناول كتيبا من على مكتب الرئيس وينظر فيه).
- دا ملك ياريس مش رئيس..اسمه كارل جوستاف السادس عشر.
- طيب يا عزمي انا ها اكلم ملك اقول الله والنبي سكت الست الى عندكم دي بتاع الكلاب..دا شيء مضحك.
- هو كمان يا افندم مش ها يقدر يكلمها.
- طيب..يعني..نعمل ايه في الموضوع السخيف دا..كل يومين ألاقي موضوع الكلاب دا.
- يا افندم احنا ممكن نحل الموضوع بسهولة.
- ازاي يا عزمي قولي انا مش فاضي لموضوع الكلاب ده.
- ممكن نبعت امين اباظة وزير الزراعة يطمنها ان الكلاب عندنا متمتعة بكل حقوقها زي كلاب اوروبا بالظبط ويمكن كمان احسن شوية.
- هو امين اباظة بيتكلم سويدي ياعزمي.
- لا يافندم هو بيتكلم فرنساوي وهي طول عمرها قاعدة في فرنسا وانا شفت لها كم فليم كانت بتتكلم فيهم فرنساوي.
- انت بتشوف افلام بقي ياعزمي ومروق نفسك.
- لا ياافندم دا كان زمان من 30 سنة واكثر.
- لية يازيكو هي الممثلة دي كبيرة للدرجة دي.
- طبعا ياريس دي ولية عجوزة..دي في سن سعادتك كده.
(عزمي يسعل في يده وهو مرتبك)
- ...انا قصدي...انا قصدي
- انت باين عليك بدأت تخرف ياعزمي.
- انا اقصد يا افندم انها ست كبيرة كانت حلوة من اكتر من تلاتين سنة.
- لكن دلوقت بقت عجوزة زي نوبة حالاتي.
- العفو..ياافندم..انت ابو الشباب يافندم.
- والحقن الى هي عاوزة تديها لنا نحقن بها الكلاب دي ها تجيبها منين.
- دي عندها مؤسسة خيرية ياريس لرعاية الحيوانات وبتجمع تبرعات من شركات كبيرة.
- طيب ما نجيب الحقن دي يازيكو على الاقل نبقى راضينا الولية المجنونة دي علشان ما تقعدش تلسن علينا تاني وبالمرة ممكن نعمل منها سبوبة. طبعا ياعزمي الحقن دي ها توصل مجانا وانت فاهم انا قصد ايه.
- طبعا طبعا ياريس وهي دي حاجة تفوتني برضو. احنا رتبنا مكتب الوكيل العلمي الى ها يستلهما في مصر وبعدين وزارة الزراعة تشتريها منه باسعار معقولة وناخذ حصتنا واحنا بعيد ونبعت للست بي. بي نقولها ان احنا عقمنا الكلاب عندنا وبطلنا نقتلها علشان جمال عيونها.
- تعرف يا عزمي ان كلامك عن الست دي خلاني افكر اشوفلها فيلم. بس المشكلة ان ما فيش وقت خالص.
- احنا ممكن نبعت نجيبها هنا شخصيا لسيادتك.
- ياعزمي انت اجننت. انت شايف فيا حيل دا انت لسا من شوية من نفسك قايل ان انا رجل عجوز.
- العفو يافندم انا ما قصدتش اطلاقا المعنى الي سعادتك وصلت ليه. انا اقصد نجيبها يومين في مصر ونحدد لها ساعة تكون سعادتك فاضي فيها ممكن تتقابلوا وتناقشوا موضوع الكلاب ده وتطمنها ان الكلاب واخدة حقها عندنا.
- ايوه هي ناقصة فضايح علشان صحف المعارضة تكتب الرئيس مبارك فاضي للممثلات ولمشاكل حقوق الكلاب. انت شايف احنا بنشتغل اد ايه وياريته عاجب. مش طمعانين حتى في كلمة شكر. عاوزين بس الناس تلم السنتها واقلامها وتسيبنا في حالنا.
- بصراحة ياريس انا كنت عاوز اكلم سعادتك ف حاجة..بس ما جاتش فرصة كويسة ذي النهاردة ..تسمح لي....
- عاوز ايه يازيكو.. اتكلم يا زيكو..
- بصراحة سعادتك ظالم نفسك كتير قوى..انت عارف ان عبدالناصر كان عنده سينما في البيت بيتفرج فيها على الافلام قبل ما حتى تنزل دور العرض.
- انا آخر مرة دخلت سينما ياعزمي كان من حوالي خمسة وتلاتين سنة وكان فليم اسمه جريمة في قطار الشرق السريع وفيه الممثلة الحلوة الى اسمها انجمار برجمان.
- اما السادات ياريس فكان صاحب مزاج عالي قوي. كان يروح ميت ابو الكوم ويلبس الجلابية البلدي وواخد معاه احلى انواع الحشيش ويقعد يشيش ويسلطن دماغه وبعدين يتخذ اعظم القرارات. قرار ثورة التصحيح وقرار السلام مع اسرائيل وقرارات كتير تانية غيرت تاريخ مصر والمنطقة كلها كان بياخدها بعد زيارات مزاج ذي دي لميت ابو الكوم. لكن انت ظالم نفسك كتير ياريس بصراحة.
- ياريت يازيكو احنا كمان عاجبين على كده. انت شايف الى بيتقال والى بيتكتب.
- انا طمعان في حاجة كمان من سعاتك يا ريس.
- اطلب يا زيكو.
- يعني يا افندم احنا ها نبعت امين اباظة يراضي الست بي.بي. في فرنسا ونرتب علشان نجيب الحقن وموضوع الكلاب دا ينتهي خالص. فيه ستين اتنين كمان غيرها ياريت لو حضرتك تنظر ليهم بعين الرأفة علشان نبقى ارتحنا من كل الستات النهاردة.
- مين يازيكو الستين دول.. هو النهاردة بقي يوم الستات ولا ايه.
- واحدة اسمها سارا لي ويتسون والتاينة اسمها ايرين خان.
- آه...انا فاكر الاسماء دي..دول بتوع منظمات حقوق الانسان انا دايما باقرا عنهم.
- صح ياريس.
- شوف ياعزمي انا مستعد اريح الكلاب لكن الناس لا..طبعا ها تقول لي ليه؟.
- اتفضل يا افندم.
- انا ها اقولك ياعزمي. انت في حياتك شوفت الكلاب ماشية في مظاهرة وبتهتف (قولوا للنايم في عابدين حكمك زفت وزي الطين) عمرك شوفت الكلاب ماشية بتقول على ان أنا حرامي..طبعا لا وبالتالي الكلاب تستحق الراحة اكتر منهم.
- الى تشوفه سعادتك يا افندم.
(عزمي ينصرف).
ليست هناك تعليقات:
إرسال تعليق