ياعم طومسون ادفع
ياعم طومسون اعقل وادفع لنا الضرايـــــــب
بلاش تلهف فلوسنا مش ناقصة كمان مصايب
الناس مش لاقية تاكل والحال مايل وخايـــــب
والثورة يا عيني ضاعت ما بين عسكر ونايب
وبغال قاعدة ف فنادق عايشين على المطايب
واكلينها برة والعة وجوة شهـــــــــــــد دايب
ورئيس مفروض ها يحكم لكن بسم الحبايب
وشهيد امه بتبكي وبتسأل القرايــــــــــــــب
إمتى يعود اللى راح..إمتى يعود اللى غايب؟
*****
يعني ما تبقاش فلوسنا وتروح تحــــــب بيها
ستات بعدد فلوسنا وكأنك بتــــــــــــــــلاقيها
يا سيدى حب واكره واعملي روميــــو فيها
واصرف على اسرائيل وعلى كل الى فيـها
بس ادينا الفلوس مش راح نسامــــحك فيها
دي قروش عالم غلابة من جيب باتعة وفكيهة
وفكيهة دي لو تعرف بتنام على الرصيف
ايامها ضنك خالص وبتشتهي الــــرغيف
واخوها الاسمراني واسمه عبده الضعيف
م الجوع وم الانيميا دايـما هزيل نحيف
يمشي جنبك خيال ويعدي كأنه طيـــــــــف
لو عينك جات عليه تحلف عالم مخيـــــــف
وانت بتصرف فلوسهم وتقول دا مال نضيف
*****
لو يعني حكومة خايبة وما عندهاش ضمــير
بتبيع مصير ولادها حتى ف سوق الحمــــير
برضو احنا عشمنا فيك انك تبقى الكبــــــير
وتضحى عشان خاطرنا ومش عاوزين كتير
دا مبلغ سهرة واحدة او حفلة لاهل الخـــــير
ها يغطي الدين بتاعك دا المبلغ مش خطــير
*****
دي فلوسنا ياعم طومسون مش منة ولابقشيش
دي فلوس ناس تعبانين مش لاقية تاكل عيش
فيهم مليون مواطن لقمة ف بيتهم ما فيــــــش
بيدعو انك تفلس وتلبس خيش ف خـــــــيش
ولا علشان غلابة يبقى يضيعوا ف الهــــيش
وانت تبعزق فلوسهم ويموتوا وانت تعيـــــش
*****
يا رجل دا انت أغنى من كل الاغنــــــــــياء
بس الصبيان بتوعك من معدومي الذكـــــاء
حبك شاغل قلوبهم وقاتلهم الوفـــــــــــــــاء
فاهمين السرقة ليك هي علامة الــــــــولاء
عبيد ونفوسها واطية ما فيهاش غير الرياء
رباها نظام معفن 30 سنة م الغبــــــــــــاء
*****
ياعم طومسون اعقل وشخشخ بالـــــــدولار
دا احنا عايشين في ثورة ومش لاقيين سولار
ولو البنزينة فيها بنموت م الانتظـــــــــــــار
وانت بتهبش فلوسنا وتاكلها والــــــــعة نار
يعني ثروة سيادتك حاجة وعشرين ملــــيار
وتدور تلهف قروشنا بدون أي اعتبـــــــار
صبيانك فهموك ان احنا من التتـــــــــــار؟
وفلوسنا غنيمة سهلة للهبيشة الكبـــــــــار؟
*****
وعامل لي فيها محسن وفاتح لي مؤسسات
وهي امور اونطة شغل التلات ورقـــــات
والهبل مصدقينك بيقولوا دي صدقــــــات
بلاش تحسن الينا وبلاها مسكنـــــــــــات
بس انت ادفع فلوسنا وهات ياعم هـــات
دا احنا اقتصادنا واقع وكمان فيه انفلات
والناس ماشيين يا دوبك مش لاقيين الفتات
صبيانك لو تصدق مش افضل م الآفات
*****
قرايبك خادوا غازنا وبينهبوه بــــــــــلاش
وناتانيا وتل ابيب يطبخوا وما يـــدوناش
واحنا بتطلع عنينا والانبوبة ما فيــــهاش
ونروح على المستودع بعد الطبيخ ما باش
والمستودع ملان حرامية على اوبــــاش
ومسلحين لعينهم م السنجة للرشــــــــاش
ونرجع بيها فاضية ودماغنا عليها شاش
والعركة لو كبيرة بنخش ع الانعــــــاش
ومن الانعاش بنرحل..طبيخ وما استواش
*****
يا ترى راح تفتكرنا لما تخش السبــــاق
وييجي ترتيب سعادتك في قمة الثـــــراء
ويقولوا حبيبنا طومسون بقى اغنى الاغنياء
يا ترى ممكن تزورنا وتجيلنا اسطبل عنتر
تيجي تواسي الضحايا وتشوف العالم اكبر
من قرش بيسرقهولك صبي بضمير معكر
http://tornado75.blogspot.com/2012/02/blog-post_21.html
ليست هناك تعليقات:
إرسال تعليق