أكثر من ربع قرن

ربع قرن على الكراسي

دمروا فيها تاريخنا

وكرهونا في كل بكرة

وخللونا في المآسي

الرجول دابت وشاخت

والناموس والنمل سارح

والنظام هبة ويسقط

ويقولو لنا العرش راسي

****
ربع قرن من التأخر

والتخلف والضغوط

البشر ماشية في طريقها

الى ماشي بسرعة ماشي

والى ماشي نص مشية

الا مصر المستكينة

عاملة عقد مع الهبوط

****
ربع قرن الفقر نايم

في البلاد هو وحبايبه

المرض والجهل

والهم الى جايبه

اقتصادنا الباشا ناهبه

هو والاعوان بتوعه

بيقسموه بالعدل بينهم

اما شعب الغلبانين

بيسيبوه ملهي في جوعه

ولما يتنفس بكلمة

يسجنوه ويكربكوه

لما تتكسر ضلوعه

ف النهاية يمشي ساكت

يشرب الملح ف دموعه

****
ربع قرن من المهازل

والنهايب والفساد

خربوا فيها اقتصادنا

شحتونا وبهدلونا

وشردونا في كل واد

اللصوص والافاقين

كل ثرواتنا في ايديهم

يعملوا شركات وبيزنس

واحنا نتفرج عليهم

ولما نطلب حق منهم

نلمح السوط بين ايديهم

****
ربع قرن دا مش شوية

ربع قرن من المتاعب

والبلاوي والاذية

حولوا الشعب لعبيد

والبلاد عزبة ووسية

الى عايش فيها ضايع

او نهيبة او ضحية

الا ابناء اللصوص

او ولاد الكفتجية

****
ربع قرن من الطواريء

والمآسي والشجون

دمروا فيها عقولنا

وابتلونا بالجنون

ولما نتكلم ونرفض

او نقول الوضع مؤلم

يحدفونا في السجون

مبارك يدعو الشعب الى الاستشهاد

حل الشتاء
حل الشتاء وجاء شيطان الغلاء
حل الشتاء ومصر تتضور
ما بين سغب او هلاك او شقاء
الجوع يغتصب المدينة في شبق
والليل يطبق فكه فوق المغارات الرهيبة
في الخلاء
وصغيرة تبكي اخيها وجوعها
مات شهيدا في طابور الخبز
يوم الاربعاء
الخبز منثور على الارض
لم تمسسه يد
جاء مع الجثة في ايدي الاصدقاء
سقط مع الباقين في حوم الوغى
في معارك وقودها البؤساء
*****
قلنا يا مولانا المبارك هب لنا
من فضلك بعض الرخاء
الارض لم تنبت
والجوع لم يخفت
والصيف لم يخلف
سوى اشلاء
مس المبارك أليته
وبدا عليه الاستياء
قال انظروها انها عجفاء
كانت في زمن الرغد مثل
عرجون السماء
قال يا ابناء الكنانة دافعوا
عن عزكم وفخاركم وحياتكم
في صولة الطوابير
اني انا والشعب في الجوع
سواء بسواء
قدح من الحنطة في قبو بيتنا
هو كل ما يمنعنا ان نذهب الى المخبز
نزاحم الشهداء
يا شعبي ان والبلاء قد نزل
ومجاعة في الافق تطفو فوقنا
استحلفك بالله ان تفزع الى الطابور
فهي الشهادة من اراد نالها
وطريقكم للجنة الخضراء
في الجنة كم تبدو الحياة رخية
لاخبز..لاطوابير..لا اعياء
بل كل ما تصبو اليه وتشتهي
من مطعم أو مأكل أو ملبس
وفوق كل ما تستحب وتبتغي
تجد المئات من الصبايا والنساء
امضوا الى الجنة تعيشوا في رغد
ودعوني ادعو للشهادة ها هنا
واصارع الجوع كما الأنواء

تهنئة للعادلى بعضوية الشورى

مبروك عليك ياعمونا العادلي ***عضويتك ف المجلس البلدي

دبح وعذب وارضي اسيادك ***واسجن ولادنا قبلي او بحري

اللص واسياده يجاملو بعضهم ***والشعب يدفع شعبنا المخصي

مبروك عليك عضويته الحلوة ***دا هدية حلوة من نظام مزري

مبروك عليك يا عمونا العادلي ***جاتلك كمان فوق الحصانة حصانة

دبح وعذب وارضي اسيادك ***واخدم عميد الذل طرطور المهانة

دمر وخرب انت واسيادك*** دا مصر مهما بتعملو نعسانة

لافيه امل ولا فيه بصيص من نور*** ف عهدكم هي اسمها الخربانة

سوناتا لخط الفقر

ياخط يا الى ماشي زي الغيمة فوق راسي
شجرة كبيرة لكن حرها آسي
امتى ياخط تحل عني مودتك
وتسيبني اشرب م الامان كاسي
نفسي ياخط اطلع وأقب عليك
واحلف ما ا نسى عشرتك ولا اهلي ولا ناسي
ماشي ف طريقك تطحن الناس الى تحت
والى بيطلع عليك عمره ما بيآسي
*****
يا خط نفسي ف يوم تمل محبتي
لو حتى تلعن عشرتي مع صحبتي
نفسي تقول مليت وجودك تحت سقفي
ابعد بقى شوف لك مكان غير حتتي
انت ياخط مع نظامنا والعجوز
انتم سبب همي وشقايا وغربتي
*****
لما العجوز قال انتوا اهلي واسرتي
ها افرد عليكم رمشي لو جفني ما كفاش
ما كنتش اعرف انه يقصد حضرتك
لو كنت اعرف كنت قلت بلاش
دا كل يوم قاعد يغني علينا
واحنا نقول له قول كمان يامسيلمة
ويسقف الحرافيش مع الاوباش
قلنا دا حبه للفقير ها يشحتفه
اتاريه بيبني ف الهوا اعشاش
*****
نفسي ياخط ف يوم اشوفك في الحضيض
فارد جناحك ع الحشود
وانا باراقبك من بعيد
وكل ما تطول المسافة ما بين مكاني وخلقتك
راح اتولد انا من جديد
لكن قالوا لي الخط في العهد الجميل
ناشر قلوعه ف المداين والقرى
من البحيرة لحد طنطا وبنها
ونجوع الصعيد
والكل نايم مستكن ف قبضته
ولا عمرهم حلموا ف وجوده بيوم سعيد
*****
فيه ناس ما بينها وبين الخط من هنا للمحيط
وكل ما تزيد الارانب ف البنوك
يبهت الخط السميك سمك السما
وتشوفه خيط
والى ف عهد المبارك يحلم
انه يفر منه ويهجره
من غير ما يبقى من لصوصه وشلته
يبقى عبيط
*****
أنا ماشي برغم الخط باجرجر كل آلامي
وفيه ثورة غضب مكتوم بتشعل روحي ومسامي
باشوف الثورة في الشارع وف الاتوبيس
وف المخبز وف المصنع وف الجامعة
وصوتها بييجي في منامي
الاف صوتها بيهدر شوق للحظة صدق وتسامي
باشوف ضجة واشوف رجة واشوف دخان
لكن دامي

سرور ينام ملء جفنيه بعد التخريبات الدستورية

نام انشا الله تنام ما تقوم @@@ ياالي حرمت الشعب النوم

نــام انشا الله تنام الليلة @@@ وبكرة يقولوا عليك مرحوم

راح نرميـك ف مقابر الصدقة @@@ونوزع على روحك دوم

خازوق أنابوليس

يا رايحين المؤتمر

حبيبيي طال بيه السفر

يوماتي اسأل عليه

واحشاني نظرة عينيه

لكن لا بيرد السلام

ولا حتى حس ولاخبر

*****

يا رايحين انابوليس

قولو لحبيبي المعمص

كفاية غربة وسفر

دا طريقه ذي الليل

ولافيه ونيس ودليل

الا كلاب الغجر

*****

يا رايحين المؤتمر

يا مشرفين اهل الفرح

والليلة

املو جيوبكم بالنقوط

لان عروستنا الحليوة

اسرائيل

بعد الفرح ها تكون من

العيلة

*****

عباس حبيبنا يامعتدل

يا الى انت احلى من العسل

انت الحياة وانت السلام

وانت مفاتيح الامل

سيبك من القدس الشريف

واللاجئين

سيبك كمان من غزة وبلاها

جنين

احذر حماس هي العدو

واحنا المعين

بكرة اميركا تسلطنك وترستأك

وهنية راح من حسرته

يقشر بصل

*****

يا رايحين المؤتمر

يا اذكى من كل البشر

رايحين تغطو المهزلة

من امتى كان بيع الاراضي

والضماير والمصاير مرجلة

خايف لاييجي اليوم

ونصحي في التاريح

نسأل عليكم ما نلاقيش

ليكم مكان

حتى في قاع المزبلة

*****

يا مقرفصين في المؤتمر

دا خازوق مغري ومعتبر؟

واحد مفرشح ع الخازوق

قاعد بيتألم عليه

والتاني واقف ينتظر

واللهفة طالعة من عينيه

واحد بيسأل في ملل

شوفو اخونا حصل له ايه

ويرد جمع من الطابور

مستعجلين ليه ع الخبر

*****

يا راجعين م المؤتمر

اكفو ماجور على الخبر

لاتجيبو سيرة الخازوق

ولا الكرامة الجريحة

ولا الى ضاع والى انكسر

قولوا لاشباه الشعوب

جبنالكو حتة من القمر

الريس يستنكر الشائعات ويتوعد

عاوز ارتاح م الغلب دقائق***نفسي ارتاح م الشغل ثواني

كل ما اغيب لو حتى ساعات*** يقولوا دا جلطة وكاني وماني

شعب انا همي ان اشحت ليه*** م الامريكي وم الالماني

طول ايامي باجري عليه*** عايش على فضلي واحساني

ولما يقول اعدائي دا فيص*** اسمـــــع فرحتهم بوداني

توصل حتى لضرب النار ***مع رقـــــص وافراح وتهاني

عاوز اطمن شعبي الغالي*** دي مجـــرد احلام واماني

مهما تقولوا عجــوز ومكحكح*** انا مالي مركزي ومكاني

قاعد على قلبكوا لطالوت ***وها اغيظكم واتجوز تاني

عاوز حاجـــــة "بالكرتونة"*** تستوعب ثورة وجداني

انسى معاها قلوبكو السودة*** وانسى قرفكم وانسى زماني

وانسي الكرسي الى مجننكم*** وارجع لشبابي الاولاني

عاوز اجدد كــــــــل حياتي*** وادفن اوهامي واحزاني

مهما تقولــــوا انا قاعد قاعد*** وها اجدد وابدأ من تاني

انا مش ناوي اسيب الضيعة ***ياخدها شيوعي او اخواني

ف اول جلطة ان شاء الله ***راح اسلمكوا لنجلي التاني

والعادلي ها يفضـــل وياه*** وها يبسطكم أوي علشاني

ابو الغيطان يرفض ربط المعونة بحقوق الانسان

مالكو ومال الشعب المصري احنا الى بنحكمه ونسوسه

عارفين ايـــــــــه الى بينفع له وايه الى بيتعبه ويحوسه

احنا الى بنســــهر على راحته ونهرب على برة فلوسه

وكمان بنشيعه للاخرة ونســـــــرطن عيشه وغموسه

الى بيمشي جنب الحـــــــــــيط بنقدره وكمان بنبوسه

والى بيعمل فيها كبــــــير نخلي حبيبنا العادلي يدوسه

*****

مالكو ومال الشعب المصري ها تحبوه اكتر من حسني

دا حتى الشعب ف عهده الوردي عايش متبغدد متهني

من تعذيبه بيرقـــــص تانجو ومن ضربات الفقر يغني
شعبنا شاف العز ف عهده والى يقول غير كدا متجني
*****

شعبنا اعمى ف حـب الريس مهما يقولوا عليه عزاله
عمره ما فكر يوم يتمــرد مهما يسوء وضعه واحواله
شايف العالم بمـــبي مسخسخ عالم حسني مع انجاله
*****
شعبنا واحنا ياناس عارفينه طول عمرنا كاتمين انفاسه
عمره مافكر يوم ف حقوقه ولاعارف رجليه من راسه
نيجي نقول له دا فيها حقوق ونبرجل وعيه واحساسه
عمي العادلي دا حامي نظامنا حاطط فوق الشعب مداسه
يعني نقول له بلاش تعــــــــذيب ونخليه يعلن افلاسه
يعني بلــــــــــدنا ما شاء الله ناقصة بطالة ليه ولناسه
*****
عمي العادلي طول ايامـــــــه بيعذب شعبنا لحسابكو
عمره ما رفض الشغل للحظة ولا حتى يناقش اسبابكو
بيعذب في سبـــــــــيل الله وسبيل بوش وكل اذنابكو
نفسه الشغل يخف شوية ييجي يتمرغ يوم في ترابكو
نفسه ف عمرة ولا ف حجة نفسه يبوس بعنيه اعتابكو
احلامه شرايط ونجـــــــــوم زي بقية الشلة احبابكو
*****
مالكو ومال الشعب المصري مالكو ومال سلطته وحقوقه
يعني احنا نكـــــهن له الريس وندور له زعيم على ذوقه
الريس مش ناوي يسيبــــــــــــنا الا وسقف المقبرة فوقه
حتى وهو جوة النعــــــــــش ممكن يرجع لنا من شوقه
*****
شعبــــــنا واحنا ياناس عاجبينه طول عمرنا بنطلع دينه
حد اشتكى من عـــهد مبارك او قالك تعبان في سجونه
شعبنا مش مشــغول بحقوقه ولا قرف الدستور وفنونه
شعبنا همه ينام مبسوط بعد ما يحشي العيش ف بطونه
سيبوا الشعب يعيش ايامه وسيبوا مبارك يرعى شؤونه
*****

مبارك يتحدث إلى نفسه

وقف الخلق جميعا يعجبون كــيف أُرسي قواعد القمع وحدي
ولصوص الدستور في يومنا الاسود كفوني الكلام حول التردي
أنا تاج الغثاء في ساحة الشرق ونكباته بـــدائع عهري
إن قمعي في الآتيات عظيم من له في القمع مجـــــــــدي
أنا إن قدر الإله فنائي لن ترى الشعب يخفض الرأس بعدي
ما رماني رام وجاز سليما نكـــاية الأمن وسوط العادلي
كم طغى الفساد في عهــــــــدي وشاع وطاش للنـهب لبي
انني لعنة فتحت حدودي كي يعيث العــــدا وأفقرت شعبي
أتراني وقد رميت بـــلادي في جحيم لم أبلغ اليوم وعــدي
أمن العدل انهم يرثون الـــعـــرش حولي وان يشرد نجلي؟
نظر الله لي فألهم أذنابي فشدوا الى العــــــهر اي شدا
إنما القمع قوة من قوى الطغيــان امضى من كل حل عندي
قد وعدت الـــدجي بكل غبي من رجالي فانجزوا اليوم وعدي
وارفعوا دولتي على القهر والتعذيب فالقهر وحده ليس يجدي
نحن نجتاز موقفا يسطع التــوريت فيه وغضبة الشعب تردي
فقفوا فيه وقفة حزم وارسوا جانبيه بعزمة المستبـــد
أنا تاج الغثاء في ساحة الشرق ونكباته بـــدائع عهري

الحزب البِطني يتحدث عن نفسه

احنا حزب البلطجية نصابين على هبشجية
همنا نهبش ونجري احنا مش اصحاب قضية
حزبنا حزب اللصوص والتحف والبصمجية
التاريخ ما لهوش حساب عندنا ولاحتى دية
لما ندخل ف انتخاب النجاح يبقي الهدية
ولما نعمل تعديلات نبقي غاويين الاذية
عندنا أحسن رئيس هو شيخ البورمجية
حط امريكا في عبه لف روسيا ف الطاقية
الى يسمع دندناته يقول بلدنا مية مية
الفساد مش بيزاحمنا والحياة حلوة وهنية
والسكن فيها ببلاش والمعيشة فنطزية
بكرة ناوي يمريس ابنه واحنا نسرح ف التكية

مبارك ينعي خروج موريتانيا على الاجماع العربي


زملائي العرب الشجعان
من سوريا لغاية عمان
ومن جدة لحدود تطوان
انا من عجزي وقلة حيلتي
باكتبلكو بدموعي بيان
كل عروشكو وحشو كروشكو
من مال الشعب الغلبان
حتي حياتكو وممتلكاتكو
ممكن تبقى ف خبر كان

مصيبتنا المرة دي مش جاية
من امريكا ولا المانيا
دي مصيبة من دولة فقيرة
شقيقتنا الى اسمها موريتانيا

اخونا محمد سوء الفال
عامل ف المنطقة زلزال
فال عامل فيها ديمقراطي
ناوي يشقلب كل حياتنا
ويجيب العالي في الواطي
ناوي يخلي شعوبنا التافهة
تركب وتدلدل رجليها
واحنا الحكام الاسياد
ييجي علينا يوم ونطاطي
ناوي يخلي عروش الحكم
الى تعبنا عشان نبنيها
غنيمة متاحة للاوغاد
ونسيبهالهم ف انتخابات
ياخدوها بدل الاولاد

طول الليل وانا بسأل نفسي
وفكري يجيب لساعات ويودي
لو هو مش قد الكرسي
او شايف نفسه مش فاضي
يعني ما فيش ف الاسرة عيال
ليه م الاول كان بياخدها
لما هو مش قد الاحمال
كانت حلوة ف ايد الطايع
ماشية حلاوة وعال العال
لا كان بيفكر في انتخابات
ولاغاوي ان الناس تشاور له
وتقول واحد م الابطال

اخواني العرب الشجعان
من سوريا لغاية عمان
ومن جدة لحدود تطوان
الحرية دي لعنة خطيرة
ابشع من داء السرطان
اوعو شعوبكم تسمع عنها
او تتكلم فيها كمان
دي شعوب من خبراتي معاها
ابشع من كل الجزذان
لما بتقمعها وتردعها
تمشي ف حالها ولا الخرفان
لكن لما تشم نفسها
يبقي الكرسي مالوهشي امان

المصريون يبيعون اولادهم في عهد المبارك

يابت هاتي العيال علشان نروح السوق
عاوزين نبيعهم ونخلص كفاية فقر وضيق
يابت هاتي العيال علشان نروح السوق
دا عهد اخونا المبارك والحال يوماتي يسوء
يابت ما تعيطيش دا انا قلبي محروق
يا بت هاتي العيال اتحركي يابت
داحنا في عهد المبارك والعيشة كلها زفت
يابت هاتي العيال السوق ها ينفض
دا عهد سيدنا المبارك والهم ماله حد
يابت عاوزين نبيعهم يمكن يعيشوا بجد
كان نفسي ما نبيعهمش لكن الطريق سد
يابت هاتي العيال عاوزين نروح السوق
كفاية ما تولوليش دا انا دمعي مخنوق
يابت هاتي العيال علشان نروح السوق
يابت ما تعوقيش مش وقت بوس ولاشوق
****
كان نفسي ابعتهم يشتغلوا في الامارات
يركبوا هجن الشيوخ ويبعتوا لنا دولارات
على حظنا اتنيلوا بيشغلوا الروبوتات
****
يابت يلا اخرجوا السوق زمانه فات
خبي دموعك في قلبك لحد يوم الممات

من سرور الى مبارك

انا شلفطتلك الدستور*** زي ما وصيتني يادكتور

لما تشوفه تقول دا وثيقة ***كتبها شوية عِمي وعور

خليته مسخرة ومهازل ***دا انا شيخ الترزية سرور

لما امد مقصي في توب*** ان كان بفتة او دمـــور

اعمل منه قانون محبوك***فشر ان قلت شانيل وديور

احكم بقى لنهاية القرن*** احكم ومعاك الدستـــــور

وابنك ييجي وراك مرتاح ***ووراه احفادك في الدور

****

الاخوان حاولوا يعاكسوني ***وقالو لي ها نخرج م الجلسة

قلتهم مش فارقة معايا ***بيكم خالصة بغيركم خالصة

عندنا ناس الحزب الوطني*** في التصويت عفاريت وابالسة

بيصوتوا من غير ما بيدروا*** اذا كانت شربة او صلصلة 

لو ها نبيع مصر بتعريفة*** الناس دي ها تدينا مخالصة

****

انا خدام الاسرة ياريس ***وانا ترزيها في الدساتير

عمري ما عزيت عنك شغلي ***ولا قلت ٌقليل وكتير

رجل شاغله اكل العيش ***وكل مصيبته بقايا ضمير

****

احيانا قلبي بيوجعني ***وساعات بيأنبني ضميري

واقول انا ليه باتحمل ذنب*** وادي نتيجة تعبي لغيري

وباضحي بملايين الناس ***علشان مستقبلي ومصيري

احيانا بيفوت الليل ***وانا عيني مفنجلة ف سريري

اتفلسف ف الخير والشر*** وف قراراتي وف تدبيري

لكن لما تجيني اوامرك ***بارمي هواجسي مع تفكيري 

وباحس ان العالم اكبر ***من احزاني ومن تكديري

****

 واقضي ايامي زي المكنة***بافتش ف الكتب الملعونة

عن ثغرة نوصلها لفجوة ***ونصيغها ف مادة مجنونة 

انا تعبان من دوري ياريس*** وعاوز اقولها بكل بصراحة

انا طول عمري تقوللي وانفذ*** لو حتى عجين الفلاحة

لكن مصر دي برضه بلدنا*** وانا شايفها مش مرتاحة

مصر ف عهدي وعهدك الاسود*** بتفكرني ببيت الراحة

خايف واد مجدع م الجيش ***يقولك يلا اديها جراحة

ساعتها لاراح تنفعنا الشرطة*** ولا ها تقولي اعمل تعديل

امريكا ها ترحب بالرجل ***وبوش ها يعمل فيها خليل

وانت مليت مصر بكراهية ***بيتوارثوها جيل من جيل

حديث ودي بين مبارك والجنرال جون ابي زيد
بمناسبة تسليمه ارفع وسام مصري لانجازاته
في ابادة الشعبين العراقي والافغاني


بوش قاللي اديك هدية
اي حاجة والسلام
يعني تلفزيون ملون
ولا غسالة بروحين
ولا حتى جوزين حمام
بس علشان انت مجرم
وإلى باعتك ليا مجرم
من بلاد نبع المجارمة
ها امنحك ارفع وسام
****
اوسمة مصر العظيمة
ارض ابناء المحبة والسلام
تمنع العين القوية
والعنوسة والبلاجرا
والملاريا والزكام
****
اوسمة مصر العظيمة
من رئيس بيحب شعبه
مهما كان حكمه مؤبد
حب عاشق مستهام
****
أوسمة مصر العظيمة
من زعيم مصر الهمام
الى طول عهده
عشان الكرسي
دافن انف شعبه
ف الطين والرغام
****
ها امنحك ارفع وسام
بس قل لي قتلت كام
قل لي كم عدد الارامل
واليتامي ف الفلوجة
والكرادة والرمادي
والرفاعي والرصافة
والعمارة والصينية
والسلام
****
قل لي كم مسجد نسفتوا
بعد ما تبولتوا فيها
قل لي راح فين المصلين
والامام
****
قل لي كم طفلة بريئة
ذي طفلتنا عبير
اغتصبتوها ودبحتوها
ف نفس اللحظة
على نفس السرير
ودبحتوا الاسرة
لا رحمة ولاشفقة
لصغير او كبير
****
قل لي ياراعي
التقدم والحضارة
والفتح الكبير
****
قل لي بشرني يا مبعوث السلام
امتى يجري الدم ويموت الامان
ف ضحيتكو الى جاية
قل لي بشرني
بضربتكو الى جاية
هي سوريا ولا مصر او ايران
****
باسم كل القتلة والسفلة
وتجار المذابح
والمجازر والالام
باسم كل المدبوحين
باسم كل المجروحين
باسم كل المشلولين
والمدفونين
باسم لون النفط
والدم وترانيم الحنين
باسم كل طفولة او شيخوخة
غطاها الركام
بامحنك يا سيدي ارفع وسام
___

عبير قاسم الجنابي

مبارك ينعي ضياع دوره في السمسرة
على الدم الفلسطيني بعد اتفاق مكة



خطفوا الدور منا يا ابوالغيط
وانت ماشيلي جنب الحيط
كل ما اقولك اعمل حاجة
انا حاسس عيني بترف
تقول لي ياريس اهمد خالص
الاطراف كلها في ادينا
بنحركهم زي مانهوى
زي عروسة ماشية بخيط
*****
بعد ما كانت فتح في ايدنا
وحماس بتقوللي ياسيدنا
واولمرت بيبعتلي رسايل
وبيتذلل وبيتحايل
وبوش يوماتي بيكلمني
ويقول لي انت كبير الحتة
وانت الى بتعرف مسالكها
عاوزين افكارك ياحويط
*****
راح الدور منا يا ابوالغيط
راح واتبخر منا ف ثانية
خطفوه منا زعيط ومعيط
واحنا قعدنا جنب الحيط
*****
بوش ما عادش يرن عليا
ولا أولمرت بيسأل فيا
واسأل عبس يقول دا هنية
وهنية يقوللي دا عبدالله
وعبدالله يقوللي دا سعود
واطلب بوش يقولوا مش فاضي
واخد جنب ومش ف المود
*****
كنز كبير كان اسمه الدور
ذي وديعة بنصرف منها
او بقرة حلوة بنحلبها
كله اتبخر منا ف ثانية
ما بقاش منه الا الاوراق
ومرارة مكلبشة ف الزور
*****
حاول تبحث لنا عن دور
انا ما اعرفش اعيش من غيره
لو ها تروح لكولالمبور
او ها تسافرلنا مدغشقر
شوف لنا حاجة مع السنيورة
او حتى ف احراش دارفور

حوار بوش والمالكي

بوش ياعـــيني عـــاوز يخلع نفسه يسيب النفط ويطلع
بس مصيبته وخيبته ثقيلة عامل زي حمار في المطلع
لا هو عــــارف يمشي لقدام ولا عارف يرميها ويرجع
طلب المالكي وقال له يامالكي انا هاسحب قواتي واروح
مش معـــــــــقول قواتي تموت وانت ووزرائك بتسوح
قال له المالكي ياريس اصبربكرة ها ناخد نفط ونفرح
بكرة ها نشرب من براميله لحد ما نمشي كمان تطوح

المالكي

بكرة النفـــــــط ها يبقي بلاش لاميركا وباقي الاوباش
تشرب منه لحد ما تســــــــــكر لو حتى تخش الانعاش

بوش

احنا صحيح عاوزين النفــــــــط لكن مش بحياة العسكر
عاوزنيه يجيلنا مـــــــــــــجانا انا مش متعود ان اخسر
انا حاطك ع الكرسي بتاعك عاوز اشوفك وانت بتكبر
مش عاوز اشوفك مرعـــــوب هربان من صدام متحير
انت يامالكي غـــــير التانيين الطواغيت وحثالة العسكر
حاول تعـــــــــمل راجل مرة حاول تشخط مرة وتنطر
قل للصدر ميليشيات مــــــاكو انا زعيم مش حتة مخبر

المالكي

انا يا ريس عاوزك ترضى عني وعن باقي وزرائي
احنا حياتنا في ايد قواتــــك وولائهم ممزوج بولائي
انا ياريس عاوز فرصــــــــة قبل ما تستهون بذكائي
انا ايدي دايما مغــــــــــلولة وقراري بيصنعه حلفائي

بوش

احنا دخلنا عشان النــــــفط لكن المسألة طالت خالص
وانقلبوا علــــــــــــينا الشياطين م الفلوجة لحد الخالص
لا انا عارف اسيطر واتحكم ولاجيشي وياهم خالص

المالكي

اصبر بس الله يهديـــــــك بكرة هاتمشي امورنا تمام
اول ما القاعدة ندمــــــــرها تبقى حياتنا ولا الاحلام
قواتك ترجع امــــــــــــريكا والنصر يرفرف اعلام
ونقول بوش عظيـم الشرق ويحلفوا بك اهل الاسلام

بوش

انا جاني امبــــــــــــارح الهام من رب الناس والانعام
جاني ملاك في البيت الابيض وانا باصلي قبل ما انام
جابلي رســالة م الملأ الأعلى قالي يابوش ادبح صدام
بس يكـــــــون دا في يوم العيد واوعى تغالط في الايام
لان الدبح ف يوم العــــــــــــيد رمز كبير عند الاسلام
قالي يا بوش هـــــــا تبقي هدية للشيعة وباقي الازلام

المالكي

انا خايف اعمـــــلها ياريس انا مش شايف دا التوقيت
دا ها يثير العـــــــــالم ضدي و يغضب باقي الهلافيت
انا بانام ف الخضرة ليلاتي جوة الخندق تحت البيت
وكل ما انام تيجي كوابيس بامشي لوحدى ف سكة موت
خلينا نصير اســـــــــــبوع لـحد الناس ما تقضي العيد
وبعدين نبقى نصفي حسابنا على مهلنا من غير مواعيد

بوش

انا باقولك دا الـــــــهام مش تهريج ولا اي كلام
لازم يحصل يوم العيد دا المختار من بين الايام
انا دايما بيجيلي الوحي المسالة ما فيهاش اوهام
لو واحد راح يفتح بقه قول دي اوامر عمنا سام
هو راعينا وهو زعيمنا وهو الى بيحمي الاسلام

دايما شايفك كدا مرعوب خايف من صعاليك السنة
خوفك منهم ها يضيعنا دا جابلك عجز وجابلك عنة
نفسي اشوفك رجل مـــــرة نفسي اعملك شنة ورنة

المالكي

انا عاوز اخدم امريكا اكتر من صبيانكوا في مصر
عاوز خدماتي لاســــيادي تبقى نموذج اعظم عصر
احنا بحبك وبتأيـــــيدك راح نمشي من نصر لنصر
انا ها ادبح صــــــدام ف العيد بالليل قبل ادان الفجر
انا ها ادبح صدام ف العيد مهما يقول السنة دا غدر

بوش

انت كده بيعجبني كلامـــــــك مهما يقولوا انك تعبان
عاوزك تتخلص من رعبك تخرج من صف الخرفان
خليهم يعرفوا اصـــــــــرارك ويحسوا دماغك مليان
لو ها تقدم اي تنازل ها يـــــحسوا ان المالكي جبان
هاتلاقي الشيعة والسنة بيتصرفوا من غير حسبان
هايتصرفوا ذي ما بيحبــــوا وتضيعنا في خبر كان

المالكي

انت اوامراك تمــشي علينا كأنها من تصاريف القدر
انت زعيمنا وانت حبيــــبنا وانت المهدي الى بننتظر
انت رسول من السما باعتاه هداية لكل صنوف البشر
انا ها دبحه ذي ما بـــتقول مهما تكون صدمات الخبر
خلي السنة يفوقوا شـــــوية ويعرفوا مين هو المنتصر

انا راح اكلم عمي خامنئي يوقف مشاريعه النووية
بلا تخصيب بلا لعب عيال ما يمشيها احسن بالمية
مية خفيفة من غيـــــــر نار واحنا نركب له الحنفية
وها ابيع نفط لتل ابيب مع تخفيض تسعين في المية

بوش

انت يا مالكي من ابــــــداعي انت وبلدك والمستقبل
انت بداية حلم كبــــــــــير ها يعيد الشرق من الاول
هاتبقي حضارة ودنيا جديدة مهما يقولوا ان انا باهول
مهما يمـــــوت م العراقيين احلام بوش لازم تتأول

انا راح اهد الشرق بحاله وابنيه م الاول وجديد
عاوزين حكامه وشعوبه يبقوا حدا امريكا عبيد
مــــــــش عاوز واحد يتكلم او يرفع عينه بتهديد
انا حكام الشرق ف أيدي ذي العبد ف أيد السيد
كل ما بــــــنفكر في حكاية بينافسونا في التأييد
او بنفكر نضرب دولة يشوفوا لنا انسب مواعيد
بس شعوبهم مش بالعانا ولاشايفة وجودنا بيفيد
علشان كــــــده لازم يتهد ويتبني من أول وجديد

إلى كل المصريين الشرفاء

قاطعوا الاستفتاء وارفضوا تعديلات التوريث

استفتاء استفتاء اوعى تروح الاستفتاء

انت يا خالد قل لوهيبة وخلي علية تقول لبهاء

وانت ياعادل قول لحميدة وخلي ابو جورج يقول لسناء

اوعى يروحوا الاستفتاء

وسلامة ينبه على ويصا ومصيلحي يعدي على وفاء

كله ينبه اخوه واخواته اوعو تروحو الاستفتاء

استفتاء على ايه يامواطن دا احنا حياتنا بقت اشلاء

عيشتك حلوة قوي وهنية ولا حياتك فيها رخاء

ناس مش لاقية العيش الحاف وناس بتعيش ذي الامــراء

وناس بتدور في الصناديــق يمكن تلقى بقايا عشـــاء

قل لجيرانك ولاصحابــك اوعو يروحوا الاستفتاء

الاستفتاء ده بتاع امريكــا علشان يقعد ابوعــــلاء

وتقعد نفس الشلة الفاسـدة واحنا نعيش زي السجنــاء

الاستفتاء ده بتاع امريكــا ترضى تكون ويا العمــلاء

وانت يا عمدة كفر العنــبة اوعى تخاف من ناس الحــزب

دول عالم فاضية وتافهــين كل كلامهم كذب ف كـذب

****

امريكا هي سبب مصايبنــا هي السم وداء الـــــداء

هي تجدد له على الكرســي بعد مهانة واستجـــــداء

واحنا يطلع عين اهالينــا نعيش في نكد وعذاب وشقـاء

طريق الاستفتاء لاخينا مفروشة بصمت الجبنــــاء

صمت على القتــل في رام الله والفلوجة وسامـــــراء

لو هاتروح الاستفتاء اعرف انك من الشــــركاء

شركاء امريكا الملعونــــة الى ايديها ملانة دمـــــاء

دماء اخوانا في كل مكـــان في غزة وصابرا والعــــراق

****

عمر الشعب ما خاف امريكـا ولا كان ليها عنده حســـاب

لكن الريس لاجل الكرســي يعمل الف حساب وحســاب

صدام اخوه النسخة التانيــة لحظة وكان بين الانيــــاب

خلا عروش العرب اهتــزت من طرابلس لشبرا شهـــاب

واحد فيهم بل هدومــــه والثاني خلع الجلبـــــاب

فتشوا جيبه وحتى دماغـــه وقالو له يلا من الاحبـــاب

بقو يزوروه ويودو بـــلاده بعد ماكان كلب ابن كــلاب

****

حكامنا بيعبدوا امريكــــا وقلوبهم مليانة خـــــواء

راحو انبطحو امام الظالـــم كله مهانة واستخـــــزاء

عدى عليهم بوش نايميــــن قال خدامي من العمــــلاء

سلطنوهم وابسطوهــــم شعوبهم عندي ماليها عـــزاء

الى عايز يحكم مدوا لــــه بس ولاءنا ما بعــــده ولاء

استعجال من مبارك لمحمود عباس

انا ياعبس باعتلك شحـــــنة احــدث نوع م الكلاشينكوف
عاوزك تمحي حماس من غــــزة وتطفشها لجبل الشوف
خليها تقضي ايامـــــها متململة بين رعـــــــــــب وخوف
ما تخليش ولا واحـــــد منهــــــم ولا حتي هنية المهفوف
بس انا عاوزك تطلــــــب ليزا المسألة مش عاوزة كسوف
قولها تبعت شيك مستعجل لان رصيدي في جنيف مكشوف
********
انا صحيح من حــــــــلف اميركا الى اسمهم المعتدلين
بس دي من اموالي الخـــــاصة مش اموال المصريين
انا جنب وظيفتي الحـــــــكومية باقلب عيشي بالقرشين
ابيع واشتري دايما في السوق اسمي نزيه معروف وامين
لا انا باهتم بنـــــــــــــوع السلعة ولا باهتم بابيعها لمين
انا مديكو بسعر الجمــــــــــــــلة علشان حبي لفلسطين
انا مصلحتي مع الى بيدفع يهمني امسك ف الدولارين
********
لما قالوا لي بوش ها يدفع انا قلــــــــت حليفي عباس

لو ها يماطل في التسديد ها ابعت شحنة اكبر لحماس
انا ف البيزنس لا اعرف ابويا ولا عندي ذرة احساس
الدولارات بتزغلل عيــــــني وتسببلي وجع ف الراس
تلاقيني مشغول بحسابها قاعــــــــد طول الليل محتاس
اما عمولتك ها ابعتــــهالك يوم ما الشيك يوصل للناس

وظيفة لله يا حكومة

يا اخواني انا عاوز شغلانة ياعم مبارك شوف لي وظيفة
من يوم انا ما سبت الجــــامعة يا اخواني وجيوبي نضيفة
لفيت المحروسة على رجلي وف ايدي اعـــلان وصحيفة
شايل عفريته على كتفي وعلى جـــــــــــلدى بدلة تشريفة
كل ما اعدي على باب شركة يقولوا لي دا مواهبي ضعيفة
واحد قال لي يا ابني افهمها الواسطــــــــة في بلدنا مخيفة
تتوظف من غير الواسطـــــــــة دي اوهام مجنونة سخيفة
دي بلدنا واحنا فاهمينـــــــــــها يعني شايفها حكومة شريفة
احنا ف عهد اسود م النيلة وبكرة الشــــــعب هياكل الجيفة
********
شوف واحد من الركش اياهم يســـــــــــند طلبك يبقى تمام
دا احنا بلدنا فســـــــــــــــــادها فظيع اكبر من كل الاحلام
يا أما الواســـــطة يا أما الرشوة بس تشوف راح تدفع كام
فيه ناس عاملة لـــــــــــــــها تسعيرة وناس سايباها للايام
*******
كل ما اشوف واحد متوظـــف يقولوا لي دا من اهل القمة
دافع رشوة كبيرة تمــــــــــــــــنها او عمه شخصية مهمة
مش ابوه واحـــــــــــــــــد من حتتنا او بواب قاعد بالعمة
لافي نزاهة ولا انــــــــــــــصاف دي بلد ماتت فيه الزمة

صدام وبوش والدبح على الطريقة الامريكية


وانا باندبح فكــــرت ف بقيـــــــــــــة المواشــــــي والــــــــتيران
اخواني حكام العرب رمز الشممم وشعــــــــوبهم الجدعــــــــــان
قاعدين على المزود بياكلوا التبن مخـــــــلوط بالمهانة والشوفان
سعداء بوجبات العلف من يد بوش لو كانت الوجـبة الاخيرة كمان
نفس الساطور رايح يعـــــــدي عليهم مهما يقولوا انهم ف امـــان
والراعي بوش يفوت عليهــــــــم يبتسم نظراتــــــه بتسيل بالحنان
يمشـــــي يقلب ف الزريــــــــبة منشكح ويقول ما اكترها التيران
ساطوره متعلق على باب الزريبة والحبال مشغــــــــولة م الكتان
يقول ها ندبح انهو تور فيهم عاوزبن نضحي ونطعــــــم الجيران
الناس بتعمل اضحيتها بالغنم وانا الوحـــــيد باعملــــــــها بالتيران
محتار اضحي بانهو عجل يا ربي اللحم وافر والعجـــــــول الوان
تيران كبيرة ف الرياض وف مصر وعجول بتلو عنـدنا ف عمان
انا خبرة ف التسمين وتربية البقر وزرايبي من تكساس لحد جيزان
اجدع زريبة اخشها بساطوري واسحب عجولها ما يعترض انسان
لما باقــــــــول التور دا لازم يندبح في الفجر يتشفى حدا الصبيان
كاوبوي وباعرف ف المواشي والغنم والدبح خبرة حتى ف الخرفان
لو عجل يرفـــــــــع راسه يتحدى الرعاة اقول تعال يا عرة التيران
انت يا عجـــــــــل طلبتها لنفسك وانا ساطوري مع العجول ســـيان
باقي العجول تغرز انوفها ف العلف وتقول لي هات التبن والشوفان
التبن لو بايت ها ياكلوا ويسكـــتوا دا ساطوري جاهز والحبال كتان
سلخانتي مفتوحة حداكم يا غجر وساطـــــــوري دايما يعمله السنان

بمناسبة الحديث عن التعديل الدستوري

الحنطــــــــــــور

قالوا ها نعدل في الدستــور **** قلت اهم اخينا يغـــور

دا رجل خرب مصر بحالهـا **** ولازم يخرج على حنطـور

خلا عيشتنا نكـد وبلاوي **** وبنى لنا مع الفقر جسـور

فقر..مذلة..حكـم طواريء **** خلا الشعب عايش في جحور

تشوف المصري القهر في وشه **** تقول احزانه بقالها عصـور

مش لاقيين اوضة ننـام فيها **** واذنابه عايشين في قصـور

كم مليار هربم على برة **** وكم نصاب عايشين في حــرير

نص فئات الشعب بتشـحت **** وفلوسنا في أيد المساعــير

فين علاقاتك..فين صداقاتك **** يا مسخرها لينا يا كبيــر

كله غباء ودعاية حقيرة **** مـن نسج خيال الصراصيـــر

الى بينفخوا طول ايامهـم **** ف نظام مضحك ماله نظيــر

بيسوقوا سلعة مضروبة **** وبضاعة بايرة بدون فواتيـر

عمرنا شوفنا فساد في حياتنا **** اكتر من عهده المـجدور؟

زي فاروق ماخرج على يخته **** لازم يخرج على حنطـور

مين جاب اولادنا يعذبهـم **** ويرجعهم كوبا كســور

بعد ما ياخد اعترافاتهــم **** ويبيعها لبوش الموتـــور

يعني مقاول في التعــذيب **** خبرة طويلة وشغل كتيـر

وسابقة الاعمال مليــانة **** بمقاولات اكبر بكتيــر

والا ما كانش بوش اختاره **** علامة تعذيب وخبــير

له ابتكارات في الكار سجلها **** هو وتلاميذه المغــاوير

مين نشر السرطان في بلادنا **** في طنطا وجرجا ودمنهور

ادمانه السلطان دمرنــــــــا **** وخلا الشرق جثث وقبور

مين حرض بوش وقـواته **** على صدام بشهـادة زور

هو اخينا الله لا يســامحه **** والاردني ابن المأجــور

خلو بيوت بغداد انقـاض **** وجروا الدم في دجلة بحور

قالو له عنده كيماوي ونووي **** وكل بلاده سلاح محظور

فتشوا بعد الحرب وداخـوا **** وقالو لقينا بارود وبخـور

ثوروا لحد الجهلة ما يمشـوا **** ونبقى نعدل في الدستـور
ثوروا لحد ما يمشي الظلمـة **** ولا ارموهم في المـجرور

هو مش اقوى من شاوشيسكو **** ولا من أي نظام مغـرور

زي فاروق ماخرج على يختـه **** لازم يخرج على حنطـور

مبارك يحكم المصريين حتى في العالم الآخر

سأظل جاثما على صدوركم ما دام في الصدر قلب ينبض ونفس يتردد
مبارك 19 نوفمبر 2006

قاعد لاخر نفس
لحد آخر حشرجة
حالف ياخدنا كلنا
مهما تكون اجيالنا
للتربة
معاه

صعبان عليه ان احنا
نتلطم بموته
والحياة من بعده صعبة
ومهما تكون مباهجها
كتيرة
صعب انها من بعده تبقى
حياه

الشعب نصه مات
من الغيظ الكمد
والباقي هو قاعد له ومتبت
ومهما تطول ايامه
برضو قاعد له ومتبت
بيستناه

ازاي يروح للموت
وبرده ووحدته
ويسيب عبيده
يعانوا بعده
صنوف الويل
وطول الليل
وألم الآه

لازم هناك برضو
يعيشوا ف ضيعته
وتحت عينه
وعين مباحثه وشرطته
وهو يحكم ويتسلطن
ويتمتع بنفس العز
والجاه

ثورة البصل

يا اللى البصــل في عهــــــدك الاســود وصـــــــل لخمســـة جنيه
على فين تــروح من ربنـــــا هـــــا تقول له يوم الحشــــر ايــــــه
اللحمة بتخاصنما م السنة للسنة والفاكهة بنقول للعيال دي للغني والبيه
لكن الخضار والفول ما فيش عنهم غنى من غيرهم الشعب ها ياكل ايه
بيقولوا ان الكوسة دي شعار النظام لكن جنون السعر مش قادرين عليه
ولا الفاصوليا والبسلة والبطاطس والجزر والراتب اتنزعت بركته ليه
فيه ناس بتهبش من البلد بالمليارات وناس شاغلها الطماطم سعرها بقى ايه
وناس تموت بالتخمة من دم البشرعاوزة تلاقي اي باب وتصرف فيه
وناس يعدي اليوم ساعاته مرار مشغولة تعمل سندوتش المدرسة بايه
لما قالــوا له الشعب مش لاقي البصل قال قطعوا التفـــاح وقلوا بيه
قالتها قبله انطوانيت من زمن شوف رد شعب فرنسا كان ازاي وليه
وهو طالع المقصلة ها يقول (بصل) زي ما هي قبله قالتها..(جاتوه

ما بقتش سلعة رخيصة في سوق الخضار الا الخيار الاستراتيجي وسعره ايه
بيقولوا سعر الطن منه مع العمولة والمشال وصل ف سوق الجملة ربع جنيه
هو وعبدالله وعبدالله الصغير والكبير واقفين في سوق الخزي بينادوا عليه
لكن لا اسرائيل بتطلب سلعـــته ولا حتى بوش استـــــحى ووقف يقلب فيه
ربع قرن الشعب شاف فيه الهوان والكرسي منصوب والصنم ملزوق عليه
والناس بتسأل عزرائيل ضيع خرايط المنطقة ولا اجهزة المباحث قاعدة بتشوش عليه

مبارك ينصح بوتين بعدم التخلي عن السلطة

ياعم بوتين اعقل**** ها تسيب السلطة ليه

ما انا ربع قرن قاعد**** حصل لي بس ايه

دا الكرسي يا ابني جنة**** للي بيقعد عليه

تبقي البلد ف ايدك **** مفتوحة ولا البوفيه
تغرف وتملا جيبك*** وجيوب ولاد الايه

وتخدم اصدقائك**** ف أميركا والاليزيه
*****

اطلب من بوش فترة **** وها يخسر يعني أيه

دا كريم وايده فرطة**** بس انت اضحك عليه

قل له ان الفودكا ملكه**** والكافيار والفيليه

قل له ان الغاز بتاعه**** ما تعزش شيء عليه

قل له أنا قاعد بحسك**** ومصيرك بين أيديه

ابعت نظيف بتاعك**** فهمه ها يقول له ايه

يقول له بوتين عاوز**** الى يطبطب عليه

*****
لو شايفه فاتح بقه**** على حد م الجيران

اعمل نفسك مطنش**** خليه ياخد الامان

وبعدين اعمل منظر**** يعني تطلع بيان
دي أمور أنا مجربها****وبأعملها من زمان

تبقي انت واحد منا**** وتنضم للخلان

*****

ياخسارة دا انت نونو**** لسا ف سن الشباب

ليه تترمل في عزك**** وتسيبها للكلاب

لو فيه عندك عيال**** يبقالها الف باب

دا السلطة البعد عنها**** بدون الموت عذاب

ها تبقى ايامك صعبة**** وتشوف النوم سراب

أنا ناوي اخدها دايركت**** من الكرسي للتراب

*****

بس انت اديني رنة**** وانا ابعت لك سرور

ترزي لكن معلم**** أيده تتلف ف حرير
دا حجة ف المغالطة**** ومكلمة في الزور
يعمل م الحق باطل**** ويسمي الضلمة نور
في سهرة واحدة منه**** ها يظبط الامور

لو كان دستوركو عاصي**** يحلبه لو حتى تور

قصيدة غزل في كوندليزا رايس

حيزبون العصر شمطاء الزمن**** لعنة الله على هذا النتــــن
اي ثدي غذى تلك السلعوة**** اي صدر ضم بركان المحــن
افعوان تبرز الانياب منه**** وجه شيطان على رسم وثــــــن
لو حباك الله انثى مثلها**** لسئمت العيش ابغضت السكــــــن
امنا الغولة اذا نزلت بدار****غار منها الحب وانداح الشجن
ساء يوم القوم ان حلت بهم**** وانقلب في وجههم ظهر المجن
لاتراها غــادية او آتــــية**** الا شيطان تنكر في بــــدن
اينما تخطو ترى بركاتها **** قتلى وجرحى..عويل وكفـــن
انثى لاشبه لها بين النساء**** دابة عمياء ينقصها الرســــن

افيقوا يا امة العرب؟؟؟؟

1. 
   متى تستفيق شعوب العرب**** فتلقي بحكامها للكلاب
2. لتنهل من دمها ما تشأ ****وتنهش من لحمها المستطاب
3. وتترك بقايا لسقط الجوارح ****يعافها نسر ويأكل غراب
   ذيول لا تتقن الا العمالة ****وسحق الشعوب ونشر الخراب
4. اضاعوا الشعوب واوطانها ***واعملوا فيها القنا والحراب
   لكل طاغوت بطانة سوء**** تزين له كل ما يستعاب
5. وشيخ معمم يزف الفتاوى ***ولو كانت الفتوى بيع التراب
6. يقول له انت عقل الزمان**** وكل دعاء لك مستجاب
7. وانت الذي ارسلته العناية ****واضفت عليه سناها المهاب
8. فلا تبتئس ان انست جحودا ***فكل الشعوب تجافي الصواب
   @@@@@
   متي يستفيق نيام العرب ****ليلقوا باذيالهم في الجحيم
9. صبرنا كثيرا ونمنا كثيرا ****واصبحنا اسرى لموت سقيم
10. نفيق ونغفو ونمسي ونلهو ****وارواحنا تستظل الهموم
11. نسير فنكبو ونخطو فنجثو ****ونبكي فنسمع صوت الهزيم
12. يهيب بنا ان نقم جاثمين**** ونثبت في وضعنا لا نريم
13. سئمنا النخاسة وصمت الكياسة**** وذل المخدر والمستنيم
    @@@@@
14. الا تسأمون عصا الجلادين ****وصوت الانين يصل للنجوم
15. الا تشتاقون لايام**** عز ومجد الفناه جد قديم
16. اضعناه تحت سنابك قوم**** وحكم غبي عنيد عقيم
17. يري العز في خدمة الامريكان**** ويرضى بذل مهين مقيم
18. شعوب تدانت هاماتها**** ليعلو عليها جهول غشيم
19. اذل الجباه لاعدائها ****واهدر فيها السنا والعلوم
    @@@@@
    وعالم ابي ان تطيب الحياة**** لشعب كسول ضعيف هضيم
20. يروم الحياة في تيه الكسل**** ويأبى الضياء في ليل بهيم
21. يقود زمامه ارذاله**** ويرضخ لطاغ صلاه الجحيم
22. لننفض عنا غبار السنين ****ونهدر في الصنم المستديم
23. ليرحل عنا مع رهطه**** وتقلع عنا رياح السموم

مقدمة

هذه القصيدة نشرت في موقع كفاية في اعقاب انتحار او استنحار غازي كنعان ووضعت في المندرة تحديدا يوم 16 اكتوبر وبعد ساعات انتقلت من مندرة الى اخرى ربما من مندرة قعدة كفاية الى مندرة الفلاح الفصيح او شيء من هذا القبيل وفي اليوم التالي اختفت تماما من المنذرة ولم يذكر سببا لاختفائها المفاجيء. كانت قصيدة "كوندوليزا رايس تحرك الدمى" و "الحنطور" قد تسببتا في تخريب مندرة كفاية مرتين متتاليتين على ما اذكر في شهري ابريل ومايو او مايو ويونيو من عام 2005

هذه القصيدة
نحن بطبيعة الحال نتعاطف مع اسرة غازي كنعان وزير الداخلية السوري الذي قيل انه انتحر مؤخرا باعتبارها مآساة انسانية بشعة. وبالطبع لن نعرف ابدا اذا كان كنعان قد قتل او انتحر او دفع الى الانتحار. ولكن الشيء اليقيني ان ما حدث ما كان ليحدث لو كان النظام السوري نظاما سويا وديمقراطيا وانسانيا فمثل هذه الامور لا تحدث الا في النظم المشوهة والمعوقة والعقيمة والمجرمة وهي اوصاف تنطبق على النظم العربية بلا استثناء

عقبالك ياعادلي ما تلحق بغازي

عقبالك ياعادلي
ما تحلق بغازي
دا صاحبك وشكلك
واسلوبكو واحد
وحتى نظامك
بيشبه نظامه
لحد التماهي

عقبالك ياعادلي
ماتلحق بغازي
وتمشي في ركابه
دي نفس الجرايم
ونفس الفضايح
ودم الضحايا
بيصرخ ببابك
ويصرخ ببابه
يقول كل مجرم
بياخذ عقابه

عقبالك يا عادلي
ما تمشي وراه
وتدخل تاريخنا
من الباب معاه
دا باب الجريمة
وباب الفضحية
وباب الزراية
مع الاشتباه

عقبالك ياعادلي
ما تلحق بغازي
دا هو نظيرك
وانت نظيره
ومعروف نظامكو
نظام المآسي
نظامهم في سوريا
نظام بهلوان
وانت نظامك
نظام الغوازي

من عند الخلايجة
لحد المغاربة
نظم مش جديرة
باي احترام
تبعبع
تهجص
نهارها وليلها
تقول السلام
لكن ما تلاقيش
عندها للشعوب
خلاف المهانة
وسوط الالام

نظم من نفاية
بتحكم بنار
الحديد والعصاية
وتقتل قتيلها
وتمشي في جنازته
وتصبغ ايديها
بدم الرعايا
نظم لو تروح
الحجيم
مش كفاية

نظم مش شاغلها
الا سحق الخصوم
وتكسير عظامهم
ونشر الهموم
ولو مر اعدى
الاعادي عليها
بترفع راياتها
بياضها يرفرف
وتبدي انكسارها
في ذل ووجوم

نظم لو تشوفها
بتدهس علينا
تقول دول اسود
لكن لما يقوى
عليها الاعادي
بتبدأ تولول
وماتشوفش منها
الا لطم الخدود

نظم شغلانتها
تعذب شعوبها
وتطفي شموعها
تضيع طريقها
ولما التأخر
يحل عليها
تقول مش بايدنا
دي اخرة ذنوبها

نظم كل زادها
دما ء الشعوب
تخرب حياتها
وتدفن امالها
وتصبغ تاريخها
بلون الجمود
وشرطتها عارفة
الى بيدور في راسك
وداخل فؤادك
وتحت الجلود

نظم لو تفكر
زبالة الزبالة
وزير يستقيل
بعد كارثة خطيرة
يقول له استمر
لان جلالته
غرامه الاقالة
وزير تاني
بحبح
وفضفض كتير
وقال كلام يودي
عم حافظ السعير
قالوا له حبايبك
ولادك مراتك
يموتوا امامك
ولا من مجير
معاك المسدس
وتحسم امورك
وتستر علينا
ف موقف خطير

عقبالك ياعادلي
ما تلحق بغازي
ويمشي في ركابك
رئيسنا المعتت
ويسبق خطاكم
خليفته ونجله
رئيسنا الموازي
ويمشي وراكم
بقية نظامنا
نظام المهازل
نظام الفضايح
نظام المخازي

تكرار قتل جنود مصريين على يد اسرائيل

اسرائيل تقتل ولادنا ***ع الحدود واحنا نطنش
والنظام شايف بعينه*** بس بيحاول يغلوش
ولما تصفعه بالحقيقة ***يعمل اعمى ولا اطرش
واعتذارهم كان مهانة ***زي واحد جاي يبقشش
ييجي اكبر كلب فيهم ***تاني يوم من غير مايرمش
واحنا نستقبل جنابه ***بالورود والرمل نفرش
صرنا ملطشة للقرود ***والتاريخ نايم محشش
والنظام راقد مفرشح ***حالته م الخذلان تطرش
******
النظام مع اسرائيل*** هم اعدائك يامصر
يقتلوا ولادك بجرأة ***على الحدود او جوة مصر
مهما بيقولوا السلام*** القلوب مليانة غدر
مطرودين من كل قارة*** محدوفين من كل كفر
يقتلوا ولادنا في خسة ***واحنا بنفكر ف عذر
صرنا ملطشة للقرود ***والنفاية في كل عصر
******
هي دي مصر العظيمة ***هي دي ارض الكنانة؟
دم مصر على الحدود*** دم غزة ودم قانا
مش ها تنساه البلاد*** مهما نتلفت ورانا
ياعرب دخلوا التاريخ ***محشورين ف العربخانة
******
قالوا مصر خصوا رجالها*** اسمها حتى مؤنث
والتمن معروف وواضح*** ان يورثها المخنث

عروش العرب

عروش تراها قذى في العيون

زعيم بغي

وحكم غبي

وشعب شقي

وشرطة تفتيش

خلف النوايا

وبين الطوايا

وتحت الجفون

فارس بني وحلان يغزو نادي القضاة


ياخبير القمع فينا والتعاطي مع القضاة
كنت فين ودهب بتنزف والنظام مكشوف قفاه
صاحي قبل الفجر يرسم خطته لسحل الجناة
جامع الجيش العرمرم والجنود واقفة انتباه
الى لابس مدني لابس والى جاي شايل عصاه
قلت له على فين ياعادلي ماشي على اي اتجاه
قلت يمكن يغزو يافا ولا حيفا نروح معاه
قال لي دا الغزوة محلي جنبنا ف نادي القضاة
القضاة دول سم ناقع انت مش عارف اذاه
******
بدأوا هجوم الاشاوس بالفوارس والرماة
جندلوا الخصم ف دقايق والصراخ عالي صداه
سيطروا على الحصن كله دمروا جيش الغزاة
وقبل ما الفجر يشقشق عادلي حقق مبتغاه
عادلي طاف كل المدينة جيشه وجنوده وراه
ساحب الاسرى ف مواكبه موسومين فوق الجباه
والجحافل ماشية ترقص جارة اعداء الحياة
والهتاف بالنصر عالي من الحناجر والشفاه
عادلي قائدنا المزفر* عادلي مقبرة الغزاة
كتبوا في عادلي قصايد تاه ف تفسيرها النحاه
فرشوا الساحة ولايم اتخموا منها الحفاة
احتفالهم كان علامة اسهبوا في وصفه الرواة
******
لكن الفرحة ماتمت والوضيع ما بلغ مناه
قبل تقسيم الجواري والغنايم والاماة
جاهم الخبر المنيل نقله واحد من الرعاة
عادلي مش قائد مزفر والنظام وارم قفاه
-------
هي هكذا في الهتاف*

علموا اولادكم كراهية امريكا واسرائيل واحتقار الانظمة المنبطحة*



علم ابنك كل صباح
كل مساء
كل دقيقية
ان اعدائه طول ايامه
هم اعدائك طول ايامك
مغتصبي ارض فلسطين
واللعنة الى اسمها امريكا
*****
علم ابنك كل اذان
مع صوت تراتيل القرآن
مع صوت مزامير الانجيل
وحلاوة صوت الرهبان
ان الحكام العملاء
باعوا اوطانا
باعوا ثرواتنا
باعوا تاريخنا للشيطان
من امثال بوش وبلير
وشارون وبقية الغربان
*****
علم ابنك ان بلادنا
ما بيحكمها سوى اوغادنا
وعشان يحتفظوا بالكرسي
لحد الموت ما يقص اجلهم
لازم يسترضوا الشيطان
امريكا و بريطانيا وغيرها
لو حتى بفلذات اكبادنا
*****
علم ابنك ان حياته
في عهد الحاكم
زي مماته
لو كان من خدام امريكا
او عامل من البيت الابيض
كعبته في صلاته وعباداته
وما بيحجش لمكان غيره
وحتى بيقضي فيه عمراته
*****
علم ابنك ان واشنطن
هي وتل ابيب الاعفن
من بين كل طغاة العالم
من بين كل غزاة اوطاننا
هما الاقسى
هما الاشرس
هما الالعن
*****
علم ابنك كل صباح
ان العرض العربي رخيص
وان الدم العربي مباح
يجري ف دجلة
يجري ف غزة
يجري ف قانا
يشربوا منه
ويسكروا طينة
باوامر بوش السفاح
*****
علم ابنك ان الدم
دم الاب ودم الابن ودم الاخ
وابن الاخ وولد العم
مش ممكن يتباع بكلام
مهما يكون معسول ومهذب
ولا يمكن يتنسي بالمرة
مهما يقولوا دا فيها سلام
ومهما تمر عليه سنوات
اوتصاريف او ايام


*بمناسبة مرور ثلاثة اعوام على الفتح الامريكي للعراق

جمال مبارك يروي كيف توصل الى فكر الخراء الجديد

فكر جديد فكر جديد
خلي بلدنا تروح ف حديد
فكر جديد فكر جديد
هل علينا زي العيد
فكر جديد فكر جديد
للتوريث ويا التمديد

بابا قال لي ياجيمي فكر
انت ابوك في نهاية العمر
مابقاش حتى قادر يتذكر
هو كلام الماضي اياه
عمال اعجن فيه وازيد
عايزين منك حاجة جديدة
حاجة تكون من غير تحديد
حاجة تخلي الحزب بتاعنا
يخطط لينا بحس جديد

قلت يا بابا انت مفكر
ومهما الحزب يحاول يبدع
او يتنطط او يستطلع
مش ها يلاقي مفكر اكبر
بابا كان ف اليوم دا حزين
بان على وشه انه اكبر حتى
من سنه المعروف بسنين
لا صبغة شعر بقت بتفيد
ولا حتى هتاف الملايين

بصيت حواليا قلقان
شفت الشاذلي ومعاه عزمي
وباقي الشلة واقفة بعيد
قلت ياربي ما فيهم فايدة
أهي عالم كلها مناكيد
طول ما يشوفوا مصلحة وياك
تلاقيهم لازقين في قفاك
لكن لما تخش في ازمة
تلاقيهم يسيبوك محتاس
ويزقوا عجلهم لبعيد

الحزب بتاعنا متخلف
لا ها ينفع فيه التطوير
ولايمشي معاه التعديل
ولا حتى يشفع تجديد
الحزب دا سجادة قديمة
فيها حروق
فيها خروق
مليانة عتة وحشرات
ولاينفع فيها التنفيض

كم يوم وانا مشغول وبافكر
كل ماتيجي فكرة ف بالي
احس انها مافيهاش تجديد
يوم وانا قاعد ف الحمام
وكل اموري ماشية تمام
لافيه امساك
ولا اسهال
ولا تنغيص ولاحتى الام
فجأة في لحظة هبط الهام
ولقيت نفسي باكلم نفسي
وباقول الجملة اياها
من غير حسبة ولا ترتيب
"فكر جديد..فكر جديد"
نطيت من ع القاعدة ف لحظة
ودعيت اللجنة اياها
لما اجتمعوا بعيون جاحظة
قلت لقيتها بدون مواعيد
احنا شعار الحزب بتاعنا
من دي الساعة ومن دي اللحظة
"فكر جديد..فكر جديد"
دا ياجماعة فكر جديد
خارج طاظا من المراحيض

زيارة ليزا الاخيرة وخطوبة جمال مبارك؟؟؟؟؟


يلا يا عم اديها جواز
أهي كلها حركات مكشوفة
علشان الكرسي الهزاز
خايف يخرج برة العيلة
تبقي سنينكم طين على جاز

يلا ياعم طريقك اخضر
شايف فيه العرش منور
هو صحيح رجليه مش ثابتة
والمسند مخلوع ومكسر
والنور فيه باهت وصناعي
لكن شايف زحمة عسكر

يلا ياعم اهي ليزا موافقة
وجايبة كمان بركة امريكا
بس قالت له اعملها بحنكة
بوش عليه يعمل مش شايف
ذي ايام الانتخابات
دي المسألة فن وبولوتيكا
وانتوا عليكوا تدبروا حالكوا
والي يعارض او يتنطط
امسحوا اسمه بالاستكية

ليزا قالت له احنا موافقين
وهانقنع حلفاء امريكا
من بريطانيا لحد الصين
وانتوا عليكوا اقناع الشعب
سواء بالشدة او باللين
اول خطوة ابنكوا يتأهل
ذي ما بيقولوا ف بلدكم
يعني يكمل نصف الدين

ليزا حلفت له على الانجيل
ان خطوبته مجرد خطوة
ف سكة طويلة زي الليل
ماحدش عارف ايه الى هايحصل
يمكن شعب بلدكم يغضب
يعمل ثورة على التوريث
او يخرج ماسك شخاليل

يلا ياعم جواز ع المعدة
عروستنا ابوها متريش
مش يعني موظف كحيان
ولا عامل طلعانة عنيه
ولاصاحب عربية كبدة

بكرة ابوها يبيع البحر
زي ما صهره بيبيع فينا
ها يبيعه بالسنتي وبالمتر
ولما تروح ف الصيف تتنزه
راح تدفع له الاجرة في ايده
دا نسيب الريس بلا فخر

يلا ياعم جواز ببلاش
الشعب الى هايدفع تمنه
وبكرة تجيب ننوس يحكمنا
بس على الله ماتكسفناش

بكرة ولى العهد يشرف
والشعب هايحتفي بميلاده
ما احنا ياعيني شعب غلابة
تبقي عنيه طلعانه من همه
لكن يفرح مع اسياده
مهما الحزن بياكل قلبه
ولا الجوع ينهش اكباده
لازم البسمة تكون على وشه
علشان الفرعون ما يحسش
ان العالم فيه احزان
لو هايضحي كمان باولاده

حول محاولات الجامعة الامريكية المشبوهة في العراق


ياعم موسى سيبهم في حالهم
لا هاتصالحهم
ولا هاتفاجئهم
ولا هاتعالجهم
بعد ما ماتوا ومات املهم
@@@@
كان فين قادتنا لما غزوها
بوش وكلابه ودمروها
كانوا ساعتها جوة الجحور
وكل واحد بيطوف بعرشه ويناجي ربه
ويقضي ليله يحرق بخور
@@@@
البعض ساعد وفتح بلاده على اخرها كما الماخور
والبعض قدم اكبر قواعد وقال معاهم يبقي المصير
والبعض صامت من رعبه صامت صمت القبور
دم العراقي في نهر دجلة نده عليهم
باسم الاخوة
باسم العروبة
باسم الشهامة
باسم الضمير
لا حد منهم سمع صراخه
ولا حد منهم فكر للحظة
وقال مصيري نفس المصير
الكل همه ان يحمي عرشه
ويملا كرشه
ويبيد ف شعبه لو قام يثور
@@@@
الدم صابغ ايدين اميركا
الدم نازل من المخالب
بيشق ترعة او يملا بركة
واحنا معاهم في الذنب واحد
احنا معاهم في الجرم شركة
@@@@
امريكا كلبة صابها السعار
لو دم مسلم او دم عربي
تشرب ما تشبع
ومهما تشرب
بيزيد سعارها
ويزيدها نار
@@@@
دم الضحايا
في وادي دجلة
بيقول سكوتنا
ما فيهوش نجاة
والدور علينا
ها ييجي بكرة
او بعد بكرة
ما دام رضينا
نخفض رؤسنا
ونهين نفوسنا
مع التتار
@@@@
دماء بتجري
زي الجداول
دم العراقي
مش هو دمك؟
مش هو دمي؟
لا في كرامة
ولا شهامة
والخزي أوضح
من النهار
@@@@
يا عم موسى
بعد ما ضاعت
جايين ندور على البقايا
حكامنا سكتوا
لاجل الكراسي
وشعوبنا يأست
واليأس قاسي
وسكوتنا هو
بدء النهاية
هو القرار

المواصفات القياسية للزعيم العربي - الايزو

فخور بالحقارة والعمالة@@@ ولا يأبى الترفع عن سفالة

يسير بين الناس مختالا بجهله@@@ ويزعم انه ضد الجهالة

يمن على الجموع اذا تحدث@@@ وقوت الشعب هو فضل ماله

اذا ما الشعب حاول ان يغمغم@@@ اجاب في غضب الشعب عالة

الا يكفيهم العيش في ارضي@@@ واحساني لهم عند السؤال

يرى في الشعب مخلوقات ادنى@@@ تقربه اليها هو المحال

وفي التعذيب لذته الكبيرة@@@ وللموت في حضرته جلال

بقبضته العظيمة يجف نهر@@@ وامر منه تنتفض الجبال

عظيم لو مشى بين الرعية@@@ وفأر ان هبط في بلاد غال

اذا سار الى بوش ورهطه@@@ تراه يختفي بين النعال

شرعية جمال مبارك وشرعية الاخوان

انت الشرعي وابوك الشرعي@@@ ياحبيبنا يا ابن السلطان
انت وابوك ساكنين ف قلوبنا@@@ لافي احزاب ولا فيه اخوان
انت تتاجر ف ديون مصر@@@ وابوك بيسمسر ف المليان
مصر ف عهد ابوك طهقانة@@@ والشعب بحاله قرفان
تلاتين سنة بتخربوا فيها@@@ وتنتهكوا حقوق الانسان
شرعيتكم جاية من بوش@@@ وتشيني وباقي الجرذان
الشرعية ان انت وابوك@@@ تملوا سجونكم بالشبان؟
الشرعية الشعب يجوع@@@ والشلة كرشها مليان؟
الشرعية ان احنا نعذب@@@ شعب بلدنا بالمجان؟
علشان نرضي بوش وغيره@@@ ويسيبنا نقعد ف أمان؟
لو طلبوا واحد بالاسم@@@ نبعت لهم الحارة كمان
انتوا هدفكم خدمة بوش@@@ هو سايبكم كده احسان؟
طول ما انتوا بتخدموا اغراضه@@@ الكرسي ها يفضل عمران
الاخوان باعوا المحروسة@@@ وسمسروا على باقي العربان؟
الاخوان دبحوا اولادنا@@@ وباعوا تاريخنا للشيطان؟
الاخوان هربوا اموالنا@@@ وخلوا الشعب ف حال خذلان؟
الاخوان سمموا ايامنا@@@ ونشروا ف اراصينا السرطان؟
شرعية الاخوان م الشعب@@@ وما بينكرها الا العميان

الفساد والعبارة الغارقة

الفساد عنوان لمصر ***هو معبود النظام
ناس بتفطر م الزبالة*** وناس بتتغدى حمام
وناس تنام من جوعها بدري*** وناس تبعزق والسلام
ناس بتهبش مليارات*** وناس تشوفها ف المنام
دا النظام هو الفساد ***والفساد هو النظام
الفساد ويا النظام*** حالة صعبة م الغرام
لو يبعد عنه لحظة ***تبقي ايامه سخام
كل عهده برد جامد*** والفساد هو الزكام
خلوا ايامنا كريهة*** خلوا ليالينا ضلام
لا عدالة ولانزاهة دبحوا*** ف نفوسنا السلام
نظرة واحدة للثنائي ***تلقى حب وانسجام
لما يستشري الفساد ***ينسجم رأس النظام
ولما ينتعش النظام ***تنفتح هوة فساد
يغرفوا منها الاحبة*** والبطانة والولاد
الفساد مكتوب علينا ***بلوى حلت ع العباد
الفساد عند اخينا*** اعلى درجات الجهاد
لو تروح تطلب وظيفة*** يقولك ابن مين يا واد
لو معاك وسطة كبيرة*** تيجي بكرة ف المعاد
لو ما فيش واسطة تروح ***تبقى ايامك سواد
لو ابوك كان من البطانة*** وحبه لابد ف الفؤاد
تبقى مجموعة وظايف*** حتى لو مخك جماد
لو بتطلب قرض مالي*** تبتدي مشروع صغير
تبقى هاتشوف النجوم ***بالنهار والليل مغير
ولما تفشل ف السداد*** يسجنوك ..نفسك قصير
لو ابوك كان م البطانة*** اسمه لامع ف البلاد
الفلوس تيجي لعندك ***ما تراعيش مواعيد سداد
لو ترخص عربية ***تشرب المر ف كؤوس
ولو يكون ورقك تمام ***برضو راح من الخوف تلوص
تدفع الشاي والعمولة*** والفطار وياه غموس
لو معاك عبارة خردة ***حتى لو ما فهاش تروس
راح ترخص في السليم*** المهم ادفع فلوس
وان غرق ركابها جمعا ***يعني ايه تمن النفوس؟