امتى يثور الناس؟

حالك عجيب يابلد دايما كـــــــــدا في النازل
من عهد سيء لأسوأ وتاريخ ملان بالمــــــهازل
الدود بيرعي في جتتك والشعــــب مش لاقي ياكل
ابن البلد فيكي بيبكي غربته طــول عمره للهم شــــايل
بيقضي ايامه معلق ف الهوا لا هو سما ولا ارض طايل
وكلاب بتنهش جتته رغم الهزال والدم من نابها سـايل
لما سألت على النظام قالـــــوا حاله خايب ومايل
فيه ناس بتطلع للــــــقمر وناس تسوي الهوايــــل
وهو خيبته التقلية مالية الكـــــــتب والرسايـــــل
قاعد يسمسر للجيران عامل في شعبــــه العمايل

حتى انتخاباته عجب بقت حديث المحـــــــــافل
فرجة وتسالي للبشر وكل جاهــــل وغافـــــــل
فاهمين مساخـــر حكمهم داخلة ف باب النوافل
****
حالك غريب يابلد عايشة بدون منطق ولا قســطاس
وفساد بيسرح في البلد م الديل لحـــــــد الراس
ونظام لا فيه عنده خشا ولا دم ولا احــــــساس
قاعد يدمر في البلد والمنطقة وبيخدم الانــــجاس
همه يعيش ملزوق على الكرسي وهما ليه حــراس
وسؤال بيتردد ف ساعات العدم: امتى يثـور الناس؟
امتى يثور الناس؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

سيادة واخواتها وموسم النفاق الامريكي

امريكا الحلوة الامورة أرض الحـــــرية الهفـهافة
باعتة له رسالة بتقول له عاوزينها انتخابات شفافة
إلغي البلطجة والتزوير وبلاش حزبك يبقى خرافة
عارفين ان نظامك فاشل كراهيته وصـلت للحافة
بيض وش واشنطن مرة دا انت نظامك ابشع آفة؟
******
ظربن وتعفرت وشتمها وعمل حبــــة افشخانات
قال دي سيادة واستقلال وسيادة جمـــعها سيادات
والست سيادة أعجوبة غير كل النـــــاس والستات
عمرنا ما بنسمع بوجودها الا في موسم الانتخابات
تظهر وتلعلع وتلالي ويطلع لها م الارض اخوات
عزة وكرامة وحرية واستقلال ومعــــــاه عدلات
تلاقيهم ماشيين في الشارع ربنا يحرسهم قمرات
لكن في نهاية العملية تختفي مع فرز الاصوات
غير كدا في الايام التانية بيقولوا عليها حكايات
بيقولوا بتنام في الشارع ويعدى عليها الأغوات
كله بياخد حظه ويمشي وبيرمي لها يادوب شلنات
وتاخدها الشرطة من ايدها وتنام ف التخشيبة ساعات
وسنين تقعد في الزنزانة لحد ما تيجي الانتخابات
تلاقيها خرجت كالعادة وتكرر نفس الروايــــات
******
امريكا القحبة الكذابة بلـــــــــــــد الخيبة والافلام
وكلاب الحرب المسعورة الي بتـــــقتل أي سلام
عارفة اخينا بيعمل ايه وعارفة دا كله كلام ف كلام
عارفة ان سيادته اسطورة واستقلاله ملان اخرام
وانتخاباته كمان مضروبة وشعبية حـــزبه احلام
لكن لازم تقرص ودنه وتفكره راح يدفــــــع كام
علشان بتغطي غباءاته ونظامه يعيش ف الاوهام
عارفة بياكل ايه في فطاره وامتى بيخرج م الحمام
وعارفه معاد نومه بالثانية وبتأمره ياخد البرشام
وبتعرف تعبه وامراضه ان كان جلطة ولا زكام
وكل ما يتحرك يطلبها لو خطوة لورا او قــــدام
ولو غير معجون اسنانه او بدلته او حتى حزام
لازم يطلبها ويستأذن والرد يجيـــــــــــلو ف ايام
وكل ما يتمخط او يعطس يدي سفيرها ف مصر تمام
******
لكن الشعب الصامت ضايع بين الجلاد والشيطان
الاتنين بيبيعوا مصيره وهو ف حالة من التوهان
بيسدد من قوته وعمره تمن استمرار الطــــغيان
طغيان م الخارج والداخل وجزيرة ما لهاش شطآن
حتى السما باين ناسياه غضب الرب على الكسلان
نصه زهد ف الدنيا وعيشها مستني جنة رضوان
ساب الدنيا بكل ما فيها قال لك لنظامنا الغلبــــان
خليه يرتع فيها لحاله ويمتع فيها الاعــــــــــوان
والباقي بيقتلوا اخوانهم ف الشارع او ف الافران
لكن عمره ما فكر لحظة يعمل ثورة او عصيان
او يرفع أيد الجلاد او يسأل ان كان انـــــــسان؟
شعب الخوف على لقمة عيشه خلاه يتحول جرذان
عايش على انقاض احلامه مهمل في زوايا النسيان
مش من حقه يبص لبكرة وخضوعه اصبح ادمان
وعجوز سادد نفق الحيرة ولا شمعة تهدي الحيران

رحلة عامل ورنيش في حملة لجمال مبارك

عاوز كيلو اللحمة بتاعي وتي شيرت وشنطة رمضان
طول عمري وانا بتاع الرئيس وها ابقي بتاع اولاده كمان
كل ما تيجي مناسبة ادعي له وادافع عنه ف كل مكان
هو عمار مصر المحروسة ونسله نجومها مش الاخوان
اوعي تقول لي برادعي وغيره دا راجل حتى مالوش عنوان
مرة سويسري ومرة فرنسي متشحتف بين البلدان
لكن ريسنا الحبوب وابنه ما شاء الله انسان
طول عمره بيحب بلدنا ومن حبه عامل لها سجان
بيعذب من حبه ولاده حب جنوني ولا العميان
ورغم متاعبه ما بيسيبناش خايف من غيره نتهان
هو الراعي واحنا قطيعه وكلابه مالية الوديان
*****
قالوا دي لحمة ابن الريس بيوزعها على الغلبان
قلت ياواد روح خد لك كيلو بدل اللهفة والحرمان
قلت ياعادل شيل صندوقك علشان نمشي على الميدان
عادل ضرب الفرشة برجله وقال لو فيها جوزين خرفان
انا مش ممكن ابيع توقيعي الا لريسنا العيان
رجل طول عمره بيخدمنا قبل الضربة كمان بزمان
قلت يا اخويا المصلحة واحدة هو وابوه نفس الدكان
قال انا صوتي اديه للريس لو حتى ها اسافر أسوان
30 سنة عايشين على حسه عز وخير وبراح وامان
لولا بركته حامية بلدنا كنا زمانا ف خبر كان
اروح اطعنه واصوت لابنه لو ها اخد دستة خرفان؟!
*****
رميت صندوقي ف جنبه وسبته قلت اطلع ع الموقع بدري
لقيت الافات الناس واقفين وغيرهم بينادي أو يجري
قلت يكون غلط العنوان ولا انا جاي متنيل وخري
شفت عجول واقفين في الساحة العجل ماشاء الله متربي
بيبص لنا بنظرة ود واحنا نبادله الشوق ما نخبي
قالوا عجول رباها الريس في مزارعه ف الوجه البحري
بيطعم منها الشعب البائس عشان يشفيه ربنا م الجدري
*****
ست عجول واقفين في الصف تقولش سباق او حتى تحدي
واحنا نبص ونبلع ريقنا ونقول صلي على النبي يا بني
الكل ها يمشي مجبور الى مبدر أو جاي وخري
ست عجول واقفين ف الصف تقولش راحين ياخدولهم صورة
كله بيبلع ريقه وواقف مستني وعينه مكسورة
والشمس بتلسع في دماغه والدبان عامل شبورة
لكن اللحمة ياناس مغرية وعجول واقفة ولا الاسطورة
*****
دخل فريق الجزارين لابس مرايل وسطها عمي جمال
وقفوا في صف مع العجول يتصوروا...عالم خيال
حتى العجول باركوها بشعار الكرم مرسوم على شال
طلب عميد الجزارين تشجيعة الكل سقف سقفة الأبطال
*****
بدأت طقوس الدبح واحنا في الطابور اخر نظام
الكل واقف في مكانه محترم كل احترام
الشمس كالت وشنا وراسنا والعرق نازل سخام
لكن العيون متمسمرة فوق الساطور من غير كلام
وفجأة نادي من الطابور رجل عجوز قال ارحمونا ياناس حرام
الوقفة طالت والتعب والشمس واحنا ف الصيام
*****
الكل زمجر فجأة وتنتور كلام الاحتجاج
بدأت شتايم تترمي ع الجزارين والكل هاج
الجزارين غضبوا ووقفوا عن العمل..مالناش مزاج
الى ف قلوعكم انفضوه بقي يا غجر..حبة نعاج
*****
وقفت حشودنا مزمجرة وغضبها بيطلع شرار
الشمس زادت في الحرارة والغضب خلاها نار
الشغل واقف والعجول متقطعة والدم عامل جنبها انهار
اكتاف وافخاد العجول بتشدنا واحنا نمنى نفسنا بالانتظار
*****
كتر القلق والخضخضة والناس بتغلي من الغضب
الكل عاوز يطمئن ان ها ياخد حقه من بعد التعب
اللحمة عملة نادرة في البلد الخراب...زي الدهب
وفخود وروس متنتورة حنب الرصيف ليها العجب
*****
زاد الغضب والزمجرة واليأس خيم ع الصفوف
الجزارين قاعدين يذلوا في البشر من غير كسوف
والناس بقت من غير امل لكن ما فيش في قلوبها خوف
عرق الكرامة نقح عليهم والغضب رغم الظروف
شتموا الرئيس والجزارين والعجل قالوا عليه خروف
بدأوا يزقوا رجلهم يتقدموا والجبن ركنوه ع الرفوف
*****
هجمت جموع الشعب واندفعت على المسرح
كات العجول نايمة ومتقطعة منظرها يفرح
الى يطول حتة يشيلها ويختفي واللحم يشرح
بدأت معارك بين جموع الشحاتين والنار بتسرح
*****
انا شوفت راس عجل وعينيه بتبص لي من تحت رجلي
انا قلت دا قسمتي ونصيبي وهو دا ف الزحمة عجلي
وطيت على الراس وبكل قوة ايديا رفعتها لصدري
الحضن طال يمكن دقايق او ثواني والشوق بيسري
لكن عصا مرت بسرعة جنب ودني قبل ما اجري
ولما فقت لقيتني مرمي جوة بوكس وايديا مربوطة ورا ضهري

النظام البغيض وحزبه

حزب السلطة حبيب الشعب فاز بنزاهة ومـن غير لعب
كل خصومه يا عيني انسحبوا م المعركة وسابوا له الحرب
حزب مسلح بحديد عز والبلطــــجة والزور والنصب
ونظام مش شاغله الا الكرسي مهما تكون معانـاة الشعب
ازاي يعني ها يخسر مقعد لمــــعارضينه ولاد الكلب
هو الوطني حبيبنا ياناس وهــو الى معشش في القلب
حتى الموتى يصوتوا ليه وكمـــان نطفتنا ف الصلب
حزب ما شافش الشعب مثيله ولا ف العالم شرق وغرب
*****
حزب بيحكم دولة كبيرة عامــــل منها عزبة حقيرة
خلى الفقر معشش فيها وهو يطلع منـــــها خميرة
والشعب معوق او نايم مات عنده الاحســاس والغيرة
حتى العيش الحاف مش لاقي ومصايبه مزمـنة وكتيرة
والناس من يأسها بتدور للموت عن أقرب تأشيـــرة
لكن الثورة ما جاتش في بالها ولا جابت للعصيان سيرة
*****
يا بلد ماشية على جسر الكآبة والشكــــاية والنحيب
امتى ينهض مرة شعبك يطرد السفلة من الوادي الخصيب؟
امتى يبقى للمواطن من ولادك في البــلد حظ ونصيب؟
امتي يشعر كل مصري بالامان؟ امتى يرتاح الحبيب ويا الحبيب؟
امتي يرحل م البلد نبع الكوارث؟ امتى يبعد عننا وشه الكئيب؟

فايزة احمد تغني للقمر المفقود ايجبت سات 1

يا امه القمر راح فين غايب بقاله يومين
لا اشارة جات منه ولا صورة تخزي العين
***
يا امه القمر سرقوه يمكن يكونوا باعوه
ذي ما باعوا حاجات الفكر فيها يتوه
باعوا خيال الناس والي اعترض دبحوه
***
يا امه القمر قرفان طهقان بقاله زمان
عينه على الهجرة لو حتى لليابان
وحد م الجيران عارف بخيبتنا
لطشه من الاوكران وقال دي غلطتنا
***
يا امه دا اسمه سات قالوا عليه حكايات
قلوب ودايبة فيه لصبايا ولقمرات
لكن هجرها وراح وحلف كمان ما يبات
حبوا على ايده وقالوا له ليه تهجر
قال البلد تنفات
***
بابص م الشباك وابص ع السلم لا فيه كلام منه
ولا حتى بيسلم
ولما شوفت النور وطلعت ابص عليه وعيني جات في عنيه
بكي وقال يا صبية هي البلد فيها ايه؟
وحكى لي كم كارثة ما عرفت فيها كلام
ولا حتى ارد عليه
***
يامه اعملي معروف يامه القمر مخطوف
دا العجز والاهمال خلا النظام مكشوف
لا بقى يحس بشعبه ولا حتى عنده كسوف
والثورة في قلوبنا حلت محل الخوف
***
يا امه القمر غضبان زعق وقال ها امشي
لا بلدكو فيها امان ولا راحة واطمئنان
والي يعيش فيها من غلبه يقضى الليل
تعبان وما ينامشي
وخطوته على فوق من كتر نار الشوق
خطفت معاه رمشي
يا امه اروح وياه
ولا انسى كل هواه واقول له ع الهجرة
ياقمر ما يحكمشي

كفاية علينا أبوك يا جمال

يا بني كفاية عليـنا ابوك*** تلاتين سنة وأحنا بنتســـول
هي قصيدة الكفر جـــميلة***غاويين نبدأها مــــن الاول

تلاتين سنة مخـزون الصبر***كل ما يخلص نمشي نـفول
ونقول ياجماعة سامــحوه ***الفترة دي ومش ها يطــول
لكن ابوك عشش ف الكرسي*** وكل ما ينهي يعيـد م الأول
****
احنا نسينا سنينه الســودة ***وحتى نسينا وجوده كـــمان
ومشينا في حياتنا النــيلة ***كل طموحنا نعيش في أمــان
لكن ابوك متعته وسـعادته ***ان الشعب يعيش كفــــران
عامل ذي غراب الــبين ***لازم ينكش ف الكيمــــان
ويدور على أي مصيــبة ***يحطنا فيها بالمجــــــان
****
يابني ابوك مكروه ع الاخـر*** وانت وباقي الشلة اياهــا
شعبنا نفسه يشوفكوا في كارثة***خارجين من ارضها وسماها
علشان يتنفس بالراحـــة ***ويحس بنبضها وهــــــــواها
هو دا طين الارض المصري*** مش كل حرامي أو عاهـة
فاكر مصر دي بـــقرة أمه*** يحلبها بدون أي نـــــــزاهة
****
سيبك م الكردي ومن هدهد*** وأي غراب عايش ع الجيـفة
ناس لا ضمير ولا اخلاق ليها*** ولا حتى تساوي تعريفـة
مش دول هما الشعب المصري*** دول اوباش او طلاب ثروة
بيبيعوا ضميرهم في السوق*** ما بتفرقش أهي بيعة وشـروة

معا على طريق الثورة

ايدي في ايدك يا ابن النيــل نغير مصر وننهي الليل
ليل مش باين ف اخره نهار ولا حتى ف ضلامه دليل
ظلم وفقر وهم ونيلة ونظام ضيع حتى النيــــــل
ايدي ف ايدك يلا يا مصري نزرع ارضنا بالقنــاديل
ليه نستسلم ليه نتخاذل ليه نتنازل جيل ورا جــــيل
يلا عشان اطفالنا يعيشوا ف بلد متحضر وجمــــيل
مش سجن وحراسه عاوزينك تقضي حياتك محني ذليل
ولا تكية بيغرفوا منها وانت تموت م الجوع يا أصيـل
يلا يا مصري ارفع ايدك المسألة ما فيهاش تأجيـــل
****
يلا يا مصري يا ابن النيل غير مصر عشان أطــفالك
قل لنظام البؤس الازلي احنا تعبنا من أعمـــــالك
الفقر معشش ف بلدنا ارحل عنها انت وأرذالــــك
طول ماانتم عايشين جواها مصر هاتبقى جحيم ومهالك
****
يلا يا مصري يا ابن النيل ارفع صـــوتك يلا ونادي
مهما يكون الظلم كبير كله ها يرحل برة الــــوادي
نفسي يعيش طفلي ف حرية ويورثها لكل احـــفادي
أنا لو عشت حياتي ضياع لازم اضحي عشـان أولادي
****
يلا يا مصري يا ابن النيل أخرج من توب المــهزوم
بص لبكرة بروح الثورة وارمي وراك صورة المظلوم
وانسى الظلم الي انت عانيته وانسي آلام وشجون وهموم
تلاتين سنة وانت بتتعذب وليالي محــــروم م النوم
****
مهما طريقك يبقى طويل هدفك متحـــــدد مرسوم
انت ها تمشي واحنا معاك وطريقنا واضح معـــلوم
هو طريق الثورة الواسع مهما يكون في الجو غيــوم
دا نظام ابشع منه ما فيش والطغيان عمره ما بيــدوم
****
يلا يا مصري يا إبن النيل أرفع أيدك وامشي معــايا
يلا يا مصري تعبنا كتير وتبهدلنا ف عهده كفـــاية
أيدي في أيدك نعمل ثورة ونحمي بلدنا ونرفع رايــة
عهد الظلم نهايته قريبة والثورة ها تبقى لنا بـــداية
****
يلا يا مصري يا إبن النيل غير مصر عشان تتـغير
ليه الناس ماشية لقدام وانت كدا واقف متحــــير
قلبك عايش بين جدران وخيالك م الحزن مبعـــتر
ارفع أيدك يا ابن النيل دا النيل من حزنك متغيــر

"بعد إعلان على الدين هلال ان مبارك هو مرشح الرئاسة القادم"

يوم اسود على مصر

كان يوم اسود يوم ترشيحك
دا كل املنا ان احنا نزيحك
يا ما مشينا في مظاهرات
وهتفنا باعلى الاصوات
رغم العسكر والظباط
مش عاوزينك..مش عاوزينك

احنا الشعب المصري ياريس
عايزينك ترحل وتسيبنا
كل شوية نقول راح يمشي
او يزهق ويسيب الكرسي
وساعتها نحيي الافراح
ونداوي بالحب جراح
ونبدأ نمسح عفن الماضي
وتعود البسمة لشفايفنا
ونقولك بالصوت العالي
مش عاوزينك..مش عاوزينك

كان يوم اسود يوم ترشيحك
خلا الحزن ف مصر بحور
الناس قرفانة يامولانا
صبرت حتى طلوع الروح
بنقولك ارحمنا وغور

الشعب المصري مش صفوت
ولا سرور وكمال الشاذلي
ولا الفقي وزميله العادلي
الشعب ياريس ملايين
ماشيين في الشارع صابرين
الحزن بينزف من عينهم
والهم متلتل ف قلوبهم
ولما يشوفوا الطلعة الحلوة
في مجلة او تلفزيون
يصرخوا بالصوت المكتوم
مش عاوزينك.. مش عاوزينك

ملايين ضاعت كل امالها
ان يعيشوا حياة ادمية
اجيال ورا اجيال في طاحونة
بيدورو فيها من ولادتهم
لحد مايرحلو عن دنيتهم
وعرقهم تاخده الحرامية

اجيال تايهة ف المحروسة
بيعدوها باليوم والساعة
كل املهم انك تخلع
علشان يلقو حتى مساحة
يتنفسوا فيها بحرية
من غير ما المخبر اياه
ييجي ياخدهم ف الفجرية
ويصرخو من بين القضبان
مش عاوزينك..مش عاوزينك

الشعب ما هوش ابو جينا
ولا رضاه ودلاله علينا
واوامره الي بتمشي صاروخ
ولاهو كوندي الشعنونة
وتشيني ابن المجنونة
دول اسيادك بيساعدوك
على ظلمك واهانتك لينا
مش عاوزين يسمعو اصواتنا
واحنا بنهتف من الاعماق
مش عاوزينك..مش عاوزينك

الشعب مش هو شارون
ولا زميله التاني شيمون
الى بقينا نسترضيهم
لو حتى ها نبوس رجليهم
علشان يرضى عننا بوش
ونقعد ع الكرسي الملعون

الشعب ياريس مستكفي
خمسة وعشرين سنة افساد
خلت صرخات المحروسة
توصل لضفاف الاطلنطي
يمكن امريكا ترحمنا
او حتى ترق لاحزاننا
ما هي فيها حاكمنا المتخفي
سامع صوتنا بنصرخ فيك
مش عاوزينك..مش عاوزينك

الشعب ياريس مش شلة
كل حياتها تمص نخاعنا
وتشرب دمنا وتجوعنا
ولما نقول ياجماعة الرحمة
يبقي عملنا جريمة كبيرة
ولاخرجنا خلاص م الملة

الشعب يا ريس ملايين
هما الصوت العالي الهادر
مش هما الشلة الملعونة
الى بترفع راية الظلمة
وتقضي ايامها المسمومة
بيطوفوا حوالين الكرسي
ويسبحوا للطفل الساحر
الى مقرب ع التسعين
محبوب الملايين الاسر
وابنه ولي العهد الطامح
الى هايخرج لنا م العتمة
يركب بعده الكرسي الشاغر
ومهما نصيح بالصوت العالي
مش عايزينك..مش عايزينك
ها يقولك انا قاعد قاعد
عهدي مالوهشي حدود ولا اخر

جمال يقدم اوراق اعتماده في واشنطن

ها اخرب مصر اكتر من بابا***لو حتى هاتشحت بربابة
تل ابيب ها تكون ف عنينا***نحــــميها من أي ديابة
وها نديها الغاز مجانا ***مهما يقــــولوا علينا غلابة
وموسادها ها يمرح ف بلدنا*** ويقلـــب عيشه بنشابة
بابا عدو حماس طول عمره*** وانا ها ابــيدها بالدبابة
لو امريكا عنيها على دولة*** المنطقة عنــدنا منصابة
تخش وتغزو وتفني ولادها*** واحنا علينا ندين بصلابة
بابا علمني ملاعب شيحة*** قال لي الدنيا دي زي الغابة
وامريكا بتتحكم فيها ***ضبع وكاسر جوة خــــرابة
وهي الى بتنهب ثرواتها***شاطرة ومؤذية ودحـــلابة
وهي الى بتسند كراسينا***طول ما احنا بندفع ضـرايبنا
وننفذ اوامرها في ثانية***لو حتى ها نبــــيد قرايبنا
احنا بنحكم باسم واشنطن***ولولاها تكتر متـــاعبنا
مش لازم شعبنا يرتاح***ولا يبقي مبسوط وراغــبنا
لكن لما واشنطن ترضى***تلقي المال والكرسي ف جيبنا
دي حاجات بابا معلمها لي***من يوم ما وعدني بالمنصب
قال لي عنيك ع البيت الابيض***ببركته ها تسير المركب
هو الى بيحرس خطاوينا***وبيشجـــعنا كل ما تخرب

ميني إيجبت عمولة لشمندي

مصر كبيرة عليك ياشمندي
وعاوزة مواهـب ساحر هندي
سيبني ابنيلك دولة عمولـة
تشوفها تقول الله على أدي
شارع عرضي وشارع طولي
وميدان فاضي وكوبري مصدي
ها ابنيها فضة على حنـة
والشعب ها اجيبه من عندي
شعب ظغنن كـدا حنتوسو
غير الشعب ف ضيعة والدي
لكن ليه نفسه مـواصفاته
وخنوعه وحاله المتردي
يمشي حياته جنب الحيطة
ويقولك همي على كـبدي
ولما الشرطـة تطرقع ليه
يتبسم في سـكون ويوطي
نفسه تكون مصدودة عن زاده
ولا يطلب فينو ولا بلدي
شعب يكون آلى ومبرمـج
يهتف كـل ما جحش يعدي
ولا يعرف معنى انتخابات
ولا تـصويت ولا وفد ووطني
ولا عمره اتجمع ف مكان
إلا عشان يرقص ويغني
شعب يكون نصه منافقين
ويشوف عهدك فل ووردي
ومهما يكون في سواد الطين
يحلف بمبة كمان ولازوردي
شعب سكوته هدية ربي
لك ولكل العيلة من بعدي
اركب زي ابوك ما بيركب
واوعى تخالف حكمي ونهجي
خط الفقر يكونوا تحتيه
علشان تبقي سـعيد متهني
عاوز اوضاعهم تتدهور
ويترحموا على العز ف عهدي
شعبي وعارفه ودارس طبعه
تبعد سوطك يقلب نكـــدي
شد لجامك وارخي لجامك
زي الهوا ما يجيب ويودي
دولة عاملها بأيدي عمولة
بس ياريت ما تخـيب ظني
علق على ابوابها الكردي
دا تميمة للـنحس الابدي

من اسرائيل الى الحكام العرب

ياعرب يا الى انتوا عاوزين السلام
السلام عاوز تنازل مش كلام
علموا شعوبكم يحبوا اسرائيل
دول ولاد العم مش اولاد حرام
قولوا لشعوبكم ما تنطق اسمها
الا مقرون بالمودة والمحبة والاحترام
خلوا طيرانها يطير فوق ارضكم
زي ما بتطير حداكم كل اسراب الحمام
****
افتحولها سفارة في كل مدينة
ولا مكتب للرعاية والاهتمام
بكرة ها يعم السلام المنطقة
والشعوب تاخد وتدي في انسجام
والحروب راح تبقي ماضي نذكره
والتاريخ راح يطوي ايام الالام

****
ياعرب يا اليى انتو لايدين ع الامان
لكراسي الحكم من غدر الزمان
الامان عمره ما يبينالوا المخنث والعميل
والى بايع عرضه والندل الجبان
الامان ما بينالوش الى بيسحق امته
حتى لو قاعد على الكرسي بدعم الامريكان
احنا هانطبع ونمشي في الطريق
لكن انسوا حتى وقف الاستيطان

نصيحة من الريس لوجه الله
انسوا برادعي وانسوا زويل انا قاعد لنهاية الليل
لو هما عاملين علماء انا اســـــــتاذ ترويض الخيل
مش هاتلاقوا احسن مني مرجع ف التعذيب ودليل
هاتشوقوا ف الفترة السادسة طعم الذل ومعنى الويل
انا خليت الفقر خليلكم بيدمركــــم جيل ورا جيل
والامراض والجوع وخلافه والقمع وتلويث النيل
حولتكوا من شعب بيفهم لشــــوية دببة وتماثيل
شعب مسخته وحتى خصيته حولته لحبة مهابيل
نخبة يعيشوا عيشة ملوكي والباقي يلبسوا هلاهيل
ولا الفرن البلدى تروحه ممكن ترجع بيتكو قتيل
انا مش ناوي اسيبكم لحظة انا معدني طيب واصيل
دي ضيعتنا وورثناها والى ها يحشر نفسه دخيل
شوفوا ايمن اوجمعة وغيرهم وتعلموا واقروا التفاصيل
الى بيتحــــــــــــــداني بيتعب ويقضي ايامه ذليل
مهما بتعلملوا انا باتسامح انا نفسي وياكو طويل

عايزينك ياجمال عايزينك

عايزينك ياجمال عايزينك***وها تحكم غصبا عن عينك
مهما ها ترفض او تتمنع***احنا مصرين على تمكينك
يكفينا محبتنا لابوك ***دا الشعب ياروحـــي طالبينك
انت ها ترفع راية الدولة***وصورتها وشم على جبينك
***
عايزينك علشان سعادتنا***ورخائنا يفضــــــل موصول
دا احنا في عهد ابوك الوردي***خاصمنا العدس نسينا الفول
وتمرغنا كمان ف النعمة***وقلنا ياريت عمرها ما تزول
عايزين العيلة تحكمنا***لحد ما يطــــــلع لينا ديول
***
عايزينك علشان تقرفنا***ذي ابوك ما قرفنا سنين
عايزينك علشان تفقرنا***زي ماشيلنا في عهده الطين
عايزينك علشان كوارثنا***تملى القنوات والجرانين
عايزينك علشان اولادنا***يقعدوا دايما كدا عاطلين
عايزينك علشان نتسرطن***وتودعنا بدون تأبين
عايزينك علشان تســــجنا***وتعذبــــنا بالملايين
***
يعني ابوك اخرنا سنين***ناقصين نرجع ورا بزيادة
مصر في عهد ابوك الوردي***عمرنا ماعرفنا لها سيادة
ونظام لو تكريمه ف دفنه***خسارة في جلده القهوة السادة
وحزب فساده مالوهشي مثيل***اوسخ من اوسخ سجادة
مهما تنفض فيه ما بينضف***والتنفيض بيـــــــزيده بلادة
ولا الاعلام المشؤوم ****يشرح لنا ايه يعـــــني ريادة
يعني انت ها تيجي تصلحها***قربة وها تحط لها سدادة؟
***
عاوزينك علشان تحرمنا***اي امل او طــــــاقة نور
علشان الشعب المسكين***يفضل حقه كمان مـــهدور
وواشنطن تحتل بلادنا***واحدة ورا واحدة بالــــدور
وانت ها تقعد زي ابوك***متوتر..خايف..مقهــــور
تتحايل علشان يسيبوك***ع الكرسي ابو مسند مكسور
***
عايزينك علشان تسقينا***مجاري مع كوليرا وتيــفود
دا انت ابوك مضطهد الفقرا***أسوأ من اهل الاخدود
تلاتين سنة بيجخ علينا***كله كلام طنطنة ووعــود
واحنا بنسمع ليه ونفوت***ونقول دا الكذب المعهود
اما الحرامية والاضيشه***دول ثرواتهم مالها حدود
نهب منظم وفساد اعمى***وقلة ذوق على جهل حقود
***
عاوزينك علشان الجوع***يحصد ارواح الاطفال
سوء تغذية وفقر وموت***وفلوسهم يسرقها بغال
بيعيشوا في عالم اسطوري***ويتنعموا بيها لاجيال
***
يعني الناس بتهادي ولادها***بهدايا حلــــوة وجميلة
وانت ابوك خربها مداين***وناوي يقولك شيل الليلة
لو عاقل ترفضها وتخلع***قل له يابابا دي كارثة تقيلة
تلاتين سنة وانت بتحلبها***لما بقت اســــوأ م النيلة
وجاي ترميها على دماغ ابنك***وتقوله دي كرامة العيلة
***
يا بني الناس كلها كارهاك***وكارهة ابوك وبقية الشلة
وانت ها تبقى اسوأ من ابوك***لان ابوك سابها لك جلة
مش ممكن تزويد الداء***يبقى علاج لــــــــزوال العلة

الحزن اللاوطني الاوتوقراطي في مؤتمره

احنا الحزب الوطني يا ناس وبلدنا بتتقدم بينا
شوفوا سرعتها في الانجاز من ساعة ما احنا تولينا
مصر بقت م الدول الكبرى وبتوزع معونات حوالينا
والعز مغرق شوارعنا والفقر دفناه بايدينا
ما بقاش فيه طوابير ع العيش ولا اسرة نايمة في جنينية
صوتوا للحزب المطحون دانتوا معانا ف ايدي امينة

****
ف عهد الحزب الوطني الزاهر مصر بقت م الدول العظمى
بقي ليها كلمة في العالم وبقت من اصحاب النعمة
لا في دولة بتديها اوامر ولا تنسى رئيسها في الزحمة
ولا فيها دويقة وخرابات ولا ناس محرومة م اللحمة

****
مصر ف عهد الحزب الوطني بقت احلى من كل اوروبا
فيها حقوق انسان بالزوفة وديمقراطية للركبة
والناس من سعادتها ياعيني ماشية في وسط الشارع ضاربة

نكتـــة دوليــــة

اوباما خاد جايزة نوبل والنكتة خادها في السلام
الناس من الصدمة اتلهت ومات على لسانها الكلام
عالم اموره ملخبطة بيكافيء اولاد الحرام
الى جنودهم كل ما يخشوا بلد تبقى مداينها ركام
****
اوسلو بقت من فعلكم اكبر صفيحة مهملات
اوسلو بقت من جهلكم ملعونة في كل اللغات
ملعونة من كل الضحايا في ارض كابول والفرات
****
مسكنة يا جايزة نوبل بقيتي خيبة على هبل
بقيتي جايزة مجرمين واللجنة صايبها الخبل
بكرة ها يدوها لقطاع الطرق او حتى مطاريد الجبل

نظيف بعد فضحية جامعة النيلة

اسمه نظيف ويوسخ قارة
لو تنقعه ف البحر الابيض
ليلة ها يصبح كله عكارة
نخلة طويلة ما فهاش فايدة
ولا مسلة لقوها مرمية
عند هرم خوفو ف سقارة
الشعب ف عرفة ما نضجش
لسا عيال قاعدين ف الحارة
لكن امه ولدته علامة
نازل وف ايده النضارة

ثروة جمال مبارك بين التهويل والواقع

ثــروة جمال مبارك***يادوبك ربــع ارنب
مصــروف بابا وماما***مع سـلفة ع المرتب
وجمـــعية ماسـكها***راجـل أمين مؤدب
قبضــها ف البداية***والادخار دا متــعب
***
ساكن ف بيت مكحكح***وآيـــــل للسقوط
وعفشة ميــة واحدة***والبيـت مليان شحوط
نفســه ياعالم يخلف***ويلم فلـــوس نقوط
ياخد قانــون جديد***ويخلــص م الضغوط
***
عربيته كمــان قديمة***شـــــاريها مكهنة
قطع غـــيارها نادرة***ويومــاتي مزرجنة
ريحة البنزيــن وصوتها***عامــلة له تربنة
ولما تشوفها ماشــية***تحـــلف دي مأفينة
مشوار واحـد يادوبك***وتنـــام باقي السنة
***
أوضــاعه صعبة جدا***وظــروفه معقربة
عليه ايجـــار مأخر***وفاتورة كـــهربة
مراتــه يا عيني دايخة***طبـــاخة مدربة
طول النهــار تنفض***ف أوضـة مكركبة
والكــنس مع الغسيل***وشيـــل المرتبة
بتوفر الخـــدامة***وتقــول دي مخربة
***
جزمه القديــمة دايما***فاتـــحة له بقها
وصوابــعه طالة منها***والرمــل يخشها
شرابــاته لونها باهت***ورقعــها ملونة
جوزين جداد يادوبك***هما مئــونة السنة
***
كبيره ف المــواسم***يجيـب له فرختين
اونص كيـلو لحمة***وماسـورة ولا اتنين
مع عيـنات فواكه***ويادوب بيجيب نوعين
شعــاره ان التقشف***والزهد نعمــتين
***
حفي عشان ياخد له***شقة في اسـكان ابوه
لقى الشفافية صــعبة***وحلفوا ما يجاملوه
حاول يشوف له واسطة*** تحـــل عقدته
ابــوه عرف وظربن***وطلبـــه وبكته
***
الربـــع ارنب نايم***ف بــنك المستحيل
يعد فيه ويفــرز***ويقول ياعــين ياليـل
امتى يكبــر ويبقى***ارنــب او حتى فيل
تعبان ياعيـني فيهم ***زمــن قاسي وبخيل
***
ساعـات يفكر يصرف***لكن خـايف عليه
ويقول دا كـل كارثة***بدايتها يا دوب جنيه
لو ضيـع منه باكو***هايروح من بين ايديه
عمر الى يروح مايرجع***وهايرجع تاني ليه
***
يحط البــاكو تاني***ويبص في ارتيـاح
يقول له نــام معاهم***كفاية بقى الى راح
الباكو يوم ما يمـشى***بيسيبش الا الجراح
لا علاج بيزيل اثرها***ولابيشيلها انشراح
***
بلاش نـق وبلاوي***وسيبوا النــاس تعيش
دا جمال حياته صعبة***عالـــم ما بتستحيش
بس الحســد يا عيني***ف قلوبكو ذي الهيش
كل ما تقصــــه يطول***وينق على مافيش

مبارك يتحدى الانفلونزا والشيخوخة ويحج الى البيت الابيض


ألف سلامة ياريس بيرة*** حج ان شاء الله مبرور
وذنب الملايين من ضحاياك ***ف البيت الاسود مغفور
يارجل عيب استحي على سنك ***بطل كذب ونصب وزور
يعني اوباما اهبل مش فاهمك*** او شايفه لابس طرطور
تقول له انك بتصلح فيها ***يا عم ارحمنا وخف وغور
بتسمي التخريب اصلاح ***انت واخوك الى اسمه سرور
اصلاحكو ليه ماشي بضهره*** ذي ما طينتوا الدستور
****
دا انت كمان صلحت البنية ***وعدلت المكسور ف بلادنا
علشان كده اوبئتك كترت ***والامراض مش سايبة ولادنا
دي الامراض في ايامك السودة*** كالت كلاوينا واكبادنا
والتيفود اخر امجادك ***ياترى ايه تاني راح يحصدنا
جيل ورا جيل بيسيبوا الدنيا ***لكن انت هاتحكم احفادنا
واحنا ف عهدك شوفنا الويل*** وانسدت نفسنا عن زادنا
****
يا ترى اتكلمتوا عن الضيعة ***ومشاريع الاسرة المنكوبة
خايف الخطة تفنيخ منك ***وتلاقي حلــــــمك أكذوبة
قالوا يا ريس ف الامثال ****الطوبة تصيب المعطوبة
مصر ماهيش سوريا التانية ***ولا حتى كوريا ولا كوبا
الشعب في اخر ايامك ***مش ناقص كارثة وأعجوبة
شوفنا ابشع ايام ف حياتنا ***ف عهدك الاسود عهد الروبة
مش عاوزين نعمل له كمالة*** بعد ما تيجي ساعة النوبة
****
المسألة مش عند اوباما ***المسألة في ايدين ضحاياك
الى بيحلموا طول ايامهم ***انك تمشي ويمشو وراك
تلاتين سنة مازهقتش لسه*** ولاشبعوا الخونة الى معاك

هوامش على دفتر القرعة

يا وزير الاسكان يا ابوقرعة*** ياالي انت وحكومتك بدعة
لو عندكو ذرة احساس ***كنا خلصنا منكو بسرعة
كان يركبكم اكبر هم ***وتموتو بزيادة الجرعة
والى مافيش احساس بالمرة*** كان يرمي نفسه في الترعة
لكن انتوا ولا لوح التلج ***لا بيشغلكم صيت ولا سمعة
ايه في بلدنا ما جبتوش اجله ***دا احنا بلدنا في عهدكو شنعة
****
ياوزير القرعة يا ابشع وزير*** يا الى قننت الفساد وانت خبير
امتى ها نلاقي سكن ذي البشر*** للمهندس والمدرس والغفير
امتى ها يعيش البشر زي البشر*** امتى يوصل صوتنا للقصر الكبير
هي دي مصر الى ها نسيبها لولادنا*** لا كرامة ولا عدالة ولا ضمير
شعب من ظلمه نسي انه بشر*** واعتبر نفسه مطارد أو اسير
حاسس انه غريب ف بلده وموطنه*** عايش ايامه في ظلمة أو هجير
واللصوص هما الى حاكمين البلد*** المقاول والحرامي والمدير
****
يعني شيخنا الله يعينه ع الزهايمر*** لا بقى قادر يفكر او يدبر
كبر الطاسة وقالك تنحرق***سايب الضيعة يديرها ابنه الصغير
وابنه جامع شلته الفاسدة بتاعته*** يطحنوا في مجتمع قاتله التدهور
الى ف الاسكان يجرب خطته*** والى في الصحة يقول عندي تصور
والى ف التعليم يخرب مخنا*** وان سألته يقول يا ابني دا تطور
والي يطرح نظرته في علاج همومنا*** شعب هايف طول حياته ف تأخر
رغم ان حكومته عاوزة ترفعه ***ما تلاقيش منه الا شكوى او تذمر
يعني اصبح شعبنا فئران تجارب*** هي دي مصر الحضارة والتحضر
****
ارض الشعب وحق الشعب***و بيتجاروبها ولاد الكلب
وتدور دايرتها المحدودة ***وترسى في جيب احباب القلب
الحرامية والاغنيا ***والخونة وتجار الكدب
تاجروا ف اراضينا يا طواغيتنا*** واحنا بنتفرج م الغلب
بيعوا الارض وبيعوا العرض*** وتاجروا كمان في منام الشعب
****
يانظام عايش عشان السمسرة*** في الاراضي والكرامة والمصير
لسا فيه حاجة عارضها في المزاد*** وياترى مين هو دلالنا الحقير
الى صنعه الشعب من عرقه وشقاه*** بتبيعوه وتقسموه من غير رقيب
كل بيعة وسمسرتها مع العمولة*** كل لص وله من الكعكة نصيب
لكن الشعب الى داير في السواقي ***حظه متنيل وعايش في البلد منبوذ غريب
****
كل وزير بينافس الزملا*** ف جمع فلوس من جيب الفقرا
خلى عجوزنا يعيش متمتع ***ويصرف ع البهوات الكبرا
اما الشعب فحاله سيء*** قبل ما ييجي ولاد الغفرا1
ودلوقتي ساء اكتر واكتر*** ومافيش امل انه يشوف بكرة
****
فيه كام واحد ف المحروسة*** نفسه يعيش ذي البني آدم
يبقى له شقة ووظيفة ***وحياته يبقى لها معالم
لكن حكومتكو المعتوهة ***بتفكر تضحك ع العالم
الشعب في عرفها حشرات*** وحياته منحة من الظالم
****
أفسد خلق الله يامبارك***لعنة وحلت ع المحروسة
عمري ما شفت بلدنا في عهدك*** الا بلد خايبة وموكوسة
كم شاب في عهدك ضايعين*** بين امراض وبطالة وعنوسة
حتى النومة في عهدك الاسود**** محتاجة رشوة او كوسة
****
مصر بقت فيها الاحلام*** اصعب من لبن العصفور
حتى الحلم في نومة مريحة*** بقى حلم اعرج او مبتور
يعني الشعب ينام ف الشارع ***والبهوات ف فلل وقصور
والى الشارع مش على كيفه*** نشوف له دويقة وفيها صخور
****
ابني قبرك يا مواطن*** هو دا شعار النظام
وكل ما تعجل بسكنه*** يبقى لك منه السلام
دا انت عبء تقيل عليه*** شايله من غير انسجام
الفقير مالهوش مكان*** الا في كومة ركام
ابقى عيش ف الاخرة افضل***انت مش غاوي آلام
في الدويقة او في غيرها*** المهم انك تنام
خلي اراضينا الجميلة*** حكر لاولاد الحرام
****
يا وزير الاسكان يا ابو قرعة *** يا الى واكلها وناسك والعة
بكرة الشعب يفوق من نومه*** ويكسرلك راسك الصلعة
سايب الشعب ينام ف قبوره*** والاوغاد يرمحوا ف الضيعة
بكرة الشعب يثور ع الجهلة*** ويسحل كل كلاب القلعة
****

ارسل لي الاصدقاء في القاهرة قرعة وزارة الاسكان الاخيرة. وتتعجب كيف يقبل الشعب المصري حكاية السكن بالقرعة وهي من مهازل النظام الاخيرة. وهم غاضبون للغاية من انهم حتى نجحوا في جمع اربعة افراد ولكن اليأس اصابهم من شروطها ويقولون ان القرعة السابقة كانت افضل من الناحية المالية. ويشكو هؤلاء من ان وزارة اللاسكان وبنك الافساد والتدمير المسمى سابقا ببنك الاسكان والتعمير خربا البلد تماما من اجل جمع اموال لمجاملة النظام. ويبدو ان التدهور في مصر وصل حالا لايمكن تصوره حتى ان النظام قد يقرر في وقت قريب ان يعالج الناس بالقرعة وربما يفرض عليهم ايضا ان يتناولوا طعامهم بالقرعة.

1 الضباط اللااحرار.

سيد درويش في عهد مبارك

نام يامصري مصر خايفة بتناجيك
وطي راسك لا النظام يخلع عينيك
وانسى نصري دانا محسورة عليك
م الى حاصل والى شايفاه جاري ليك
شوف ولادك راح يعيشوا في مرار
بعد ما قضيت حياتك في انكسار

****
شفت اي بلاد يا مصري في العفاشة

ذى مصر مدهولة وحاكماها فاشة

شفت اي بلاد يا مصري في التخلف
تيجي زي بلد بيحكمها المخرف

نيلها متلوث باطنان المجاري
وانت تشرب وانت عارف وانت داري
ولاعيشك والديدان مشوية فيه
بعد ما كان نصه سوس مقدور عليه
****
ليه يا مصري كل اوضاعك عذاب
عيشتك اسوأ حتى من عيشة الكلاب

ليه يامصري كل احوالك خنوع
تقضي ايامك ما بين ذلة وجوع
مصر ضيعة وانت عايش عبد فيها
والفساد والفقر والظلم ماليها
****
حب جارك وإدي غازك له بلاش
وانت تاكل او ما فيش ما يهمناش
عمر ابنك لن يعيش عيشة كريمة
طول ما فيها الهم والشلة القديمة
يوم مبارك يوم مطين ع العباد
خلا عيشة الشعب اسود م السواد
عيشة تكره من مهانتها الوجود
ايه دا مسلم او مسيحي قول يهود
دول بقوا اسيادنا احفاد القرود
****
هز ايدك مرة واحدة ف الحياة
مرة يمكن ينكتب ليك النجاة
اصحى يوم قول للهوان مرة كفاية
يمكن اليوم دا يكون هو البداية

جمال مبارك يتحدث الى العبيد في ضيعة الوالد

انا ها احكمكم رغم انوفكم وها اطلع عينكم و اقرفكم

بابا علمني القمع سنين وشرح لي ازاي اخوفكم

قال لي الجوع يا حبيبي يا ابني هو الى يذل الابطال

علشان كدا طوابيرالعيش راح اطولها بالأميال

بابا كمان وصاني بالفقر وقال اتعلم م الامثال

دايما جوع كلبك يمشي وراك لو تمشي يمين وشمال

لو ناموا يوم ببطون شبعانة الفكر هايفتح له مجال

يبدأ يتحرك بسهولة ويخرج من اسر الاغلال

بابا شرح علوم القمع وفن الذل والاستهبال

مع امريكا توطي دماغك واقبل عمال على بطال

واعمل فيها عبيط واتمسكن واسمع نصايحهم ف الحال

لو قالوا البحر بيتشخلع قول دا كمان لابس خلخال

لو قالوا ان الملح مسكر قول دا حلاوته من النحال

لو قالوا تبيع المحروسة قول اجيبها لكم من غير مال

نصايح ماما

ماما قالت لي يا جيمي يا سكر اوعى تغامر اوعى تفكر

دا التفكير بيهد الحيل ويخلي دمك يتعكر

عيش ايامك روشن نفسك زي باباك العود الاخضر

مع انه عدى التسعين ماشي كأنه غزال يتمختر

عايش ايامه على راحته وحتى بيصبغ شعره الاسمر

عايش ايامه بيتمتع مع ان الشعب بيتدهور

الفقر معشش ف بلادنا و وبيتطور وبيتحور

ولا فيروس الانفلونزا ووبائه فوق كل تصور

انت صغير ع التفكير وهموم شعب دماغه مسنفر

دور سرور

عمي سرور ابو صلعة جميلة رتب كل اموري تمام

كم تشريع ما يخر المية ترزي عظيم ولا في الاحلام

خبرة في تحديد المقاسات وعرض الكتف مع الاحجام

يوم ما بابايا يقوللي ها اريح ها اتقدم خطوة لقدام

يبقى مصيركوا ف ايد اذنابي وتبطلوا طنطنة وكلام

الى ها يمشي ف حاله يعدي والى ها يرغي ما فيش اوهام

السجن ابوابه مفتوحة والمستقبل كله ضلام

وصايا خاصة

بابا وصاني بتل ابيب وقال لي احذر عمك نصر الله

شيخ نصاب وبتاع الاعيب ويقولك خليها على الله

عاوز ينقل قم لشبرا ويجيب لنا ف بلادنا العلة

ظبط نفسك مع امريكا وتل ابيب وبقية الشلة

حج سريع للبيت الابيض وادعي ان يجيلك فرج الله

بابا علمني ويا ما علمني قال لي القمع علاج موصوف

لاي شعوب الذل راكبها او بتنام على رعب وخوف

لو ترفع سوطك لدقايق ياما ها تعاني ياما ها تشوف

اعمل زي ما بابا بيعمل المسألة مش عاوزة كسوف

خلى القمع شعار لنظامك تلقى اسدهم ماشي خروف

خلي لصوصك يملوا جيوبهم واملا عنيهم بالمصروف

ها يخافوا عليك اكتر مني وهايبقوا للكرسي سيوف

هما الى بيعملوا شعبية لو حتى رصيدك مكشوف

تحذير من ايران

بابا حذرني من طهران قال دي ناس قلبها قطرن

عاوزين يشعلوا نار الثورة من مكة لغاية تطوان

لولا امريكا كانوا عملوها هي الى بتحمي العربان

علشان كدا خدمتها فريضة واجب ع الناس الجدعان

لولا امريكا يضيع الكرسي ويحكمنا الشعب الغلبان

وتيقى بلدنا زي فرنسا فيها ساركوزي او ميتران

تيجي تسلم على سنكوح يبعد أيده ابن الجربان

حراس الكرسي

اوعي تزعل يوم الجيش ولاتغضب يوم الشرطة

هما الى بيسندوا كراسينا من غيرهم راح تبقى في ورطة

وصي الشرطة كمان ع الشعب تخلي حياته هم وكرب

خلي سجونك دايما عامرة فراغ السجن نذير الحرب

دوس على كل قانون قدامك وما تسمعش كلام الغرب

لو قالك دي حقوق انسان او هدد دي جرائم حرب

الى اديه في المية الباردة وبيحلم مش شايف الغلب

دا الشعب بتاعنا وانا عارفه ما بيمشيش الا بالضرب

الفساد الفساد

بابا نصحني افسد اعواني علشان اترستأ في مكاني

ما حدش راح يعمل لي شريف ويقول لي كاني ولا ماني

قال لي فساد الناس حواليك من صلب الفكر الجواني

ساعتها ها تبقى الثورة بعيدة ويبقي زوال الكرسي اماني

الفاسدين راح يحموا نظامنا ويحطوك ع الكرسي مكاني

خليهم يكتروا حواليك اكتر م النبت الشيطاني

كل ما جيل منهم بيروح مصر بتولد جيل من تاني

مصر في انتاج الفاسدين خصبة ولا الفأرة الاسواني

من وحي هندوراس

قومي يامصر العظيمة زي قومة هندوراس
اطردي المزمن بتاعنا واعلني يوم الخلاص
زحولي الشر الى نايم ف البلد من غير اساس
كل يوم عمال يعدل كل يوم دستور مقاس
تلت قرن الشعب صابر مصر ما بقاش فيها ناس؟
فين قضاتك..فين جنودك ولا مات قلبك خلاص
يا جنود مصر العظيمة ياغزاة الشرق صناع الحضارة
اكسحو الماضي الملوث امسحوا عهد الدعارة
افتحوا صفحة جديدة واقلبوا الصفحة الى كتبتها الحقارة
التاريخ لما ينادي بيسمعوش إلا كل لبيب بيفهم بالاشارة
الى هاتشيل الجموع صورته وتهتف والهتاف والحب حقه عن جدارة
التاريخ بينادي صناعه اليه يدخلوه من غير بطاقة ولا استمارة
يكتبوا صحفات من المجد بايديهم تبقي للاجيال واحفادهم منارة
قومي يامصر العظيمة زي قومة هندوراس
كل شعبك حمل الجيش الامانة والامور واضحة وما فيهاش التباس
--------
هندوراس دولة فقيرة وصغيرة لايتجاوز سكانها سبعة ملايين نسمة تقع في امريكا الوسطى. حاول رئيسها - المنتخب بصورة ديمقراطية - لفترة اربعة سنوات لايتم تجديدها تعديل الدستور بحيث يحكم فترة اخرى فما كان من المحكمة العليا الا ان دعت الجيش الى التخلص منه قبل يومين من اجراء استفتاء على تعديل الدستور فدخل جنود من الجيش الى قصره وامهلوه دقائق لارتداء ملابسه ثم وضعوه على طائرة متجهة الى كوستاريكا. في مصر حكم مبارك ما يقارب ثلاثة عقود بدون صفة شرعية وعدل الدستور مرتين و.....باقي الحكاية تعرفونها.

الثلاثي المرح

مبارك وبونجو واخوهم موجابي*** اسامي تشوفها تقول ياخرابي
اسامي بتلزق ف كرسي الندامة*** لحد ما ييجي يشيلها الترابي
مافيش حد فيهم بيشغل دماغه*** سوى بالهيافة وشغل التصابي
بيصبغلي شعره وينهبلي شعبه*** ويعمل حرامي ولص ومرابي

ولو يوم تقول له استريح ياموميا***يقول دانا لسا في عزي وشبابي
ولما الترابي بيبدأ يشيله ***ويدخل بوعيه في عالـــــم ضبابي
يشوف الحشود في الجنازة سعيدة*** يقول: النهاردة اعادة انتخابي؟

-----
توفي عمر بونجو منذ ايام بعد ان قضى في السلطة في الجابون 41 عاما مما احبط المصريين وجعلهم يتوقعون لمبارك عقد ونصف على الاقل

صدق او لاتصدق

انا مش مصدق ان دي مصر العظيمة

مصر الى دايما ف الكتب او ف التاريخ قيمة وسيما

من عهد احمس او تحتمس او حتى ف عهد المماليك الغشيمة

صارت بفضل الله بيحكمها الغجر والسفلة وولاد القديمة

عملوها موقف ميكروباس للعم سام ورصيف وغرزة للجريمة

اما عن الشعب الى اجداده بنو له الاهرامات رمز العزيمة

ماشي يا عيني ف سطل او دروشة وهروبه من سوط النظام اكبر غنيمة

ملايين خصوها م العذاب والخوف وصراع على لقمة سابوها ف الوليمة

اين ولي العهد والعالم يحترق؟؟؟


شوفوا ولي العهد ياناس يقول لنا رأيه ف ضرب حماس

ولا الواد طالع لابوه ما عندوش ذرة من الاحساس
يعني يسيبنا في وقت الشدة ودي اخلاق ابن النخاس
يعني يوماتي اربع صفحات صورة وهيصة ومانشتات

مشروع هنا ها يغير مصر وكلمة تقولها مع البهوات

والناس تتعذب ف الشارع علشان تمشيلنا خطوات

كل الصحف الخايبة تجيبك وتبشرنا البؤس اهو مات

كم يوم وانا مش شايف صورك ولا شايف ليك مقترحات

كم يوم افتش في الجرنان حتى في صفحات الاموات

شوفوا ولي العهد ياعالم شوفوا الفاسد ابن الظالم

دا المنطقة خلوها خرابة مابقاش ليها حتى معالم

فينك ياوريث المحروسة دا احنا بدونك اخر حوسة

لما الدم يسيل بتغيب حبكت يعني تقشر كوسة

اشتم حتى ولو شتماية يتلموا ولاد الفرطوسة

ولا ارمي لنا تحية عليهم يمكن ينكسفوا من البوسة

ورينا راح تعملي ايه يا اختى يا قطقوطة يا ننوسة

فين انت وفين حزب النيله او حتى لجنة سياساته

بيقولوا وريثنا مش داري وبيتغدى عند حماته

بيقولوا ما شافش الى بيحصل ولاداري بمحنة اخواته

لو يعرف كان قلب الدنيا وارث ابوه حتى في صولاته

يوماتي باشوف الصور الحلوة انت وماما وابوحلتيت

اقول ربنا راح يوم يفرجها وربك ياما ناس بيغيت

بابا يوماتي صورته بتبهت ووشه ولا وش العفريت

جلده بقى مكرمش وتخين اتخن من جلد الخرتيت

خايف تزعل طنط تسيبي ولا تغضب اونكل بيبي

التوريث بيعدي عليهم واسأل بابا كمان يا حبيبي

شوفوا ولي العهد ياناس دا انا م الغيط هايفرقع صدري

لو ورث المحروسة في يوم خلوه يبقى يتف عليا

او يعملها كما ن على قبري

من مبارك الى باراك أوباما

ماشي على نفس الطريق المستقيم باخدم اميركا واسرئيل وعمولتي ملاليم
رؤساء اميركا ربعهم عدى عليا وانا قاعد على الكرسي ولا الصنم المقيم
رغم كوارث بعضهم عندي الكل يشهد ان دفتر خــــــدمتي فل وسليم
ولما يشتمني كمان منهم رئيس باكبر الطاسة واقول دا مبتديء وغشيم
ريجان في يوم قال ان انا كداب وباعاتبه في التلفيون قاللي انكتم يا لئيم
بادعيله يشفيه م الزهايمر والهبل دا مهما كان انا قلبي برضه رحيم*
*****
غزة محاصرينها ولاحصار الماسادا وحياة ولادها كلهم غم وجحيم
المرضي بيموتوا على السور عندنا ذي السمك جوة الشبك بيحرك الخياشيم
لو حفروا انفاق يخطفوا منها الرغيف بيموتوا فيها بدون انذار ولا تجريم
اقول شاليط يرجع لحضن امه تفتح حدودي وتدخلوا وسط البلد معازيم
اقول شاليط يرجع لاحـــــبابه واهله وافتح لكم سينا مع الاقاليم
شاليط دا ابني زيه زي جمال انا مش بافرق بين فرنسي ولا مصري صميم
ساركوزي حتى بعت جواب بيشكرني قاللى انت حامي الاسرى والمظاليم
******
الغاز بتاخده اسرائيل مجانا والعقد مجلسنا الهزوء عامل عليه تعتيم
سرور حبيبي وهو عوني ع الشقا هو االموقر بيدبا وانا المعظم دبشليم
اقول له فصل لي قوانين العجب يقوللي هــــــات الابرة والابزيم
شيلنا الجهاد من كل كتب المدرسة ولو عاوزين كمان نشيل الحج والصوم
بنعلم الطفل الرضيع ازاي يحب العم سام ونأمركه حتى وهو فطيم
انا رهنت مصير المنطقة ليكو والحالة فيها ماشية تحت الجيم
بقى كل حكامها العرر ف ايديكو نايمين في قبضتكو ولا الطفل اليتيم
عملاء على اغوات على خونة و الكل ماشي في سكة التأزيم
وانا الى باصنع كل دا بصمتي والصمت هو ملاذي في الكرب العظيم
******
اما عن الشعب الى حاكموا باسمكو عايش حياته ف نغنغة ونعيم
الشعب من رفاهيته مل الحياة حاسس وجوده فيها عبء سقيم
بيقضي اجازاته في افران الحكومة مستني يستشهد وناقصه غريم
مبسوط وطافح بالسعادة والهنا في الصحة والاسكان مع التعليم
لو تسأله لو كان سعيد بوجودي يحلف بانه ما شاف في كرمي زعيم
زودت له علف المواشي ف الدقيق يمكن تجيله الصدة او يعمل رجيم
مواشي روسيا ترفض القمح المسوس ونجيبه تاكله عندنا المحاريم
من حرص حكومتنا على صحة سعادته عاوزين نضيفله التبن والبرسيم
أهي حاجــــــــة برضو تحرش المعدة وتسلك الأمعاء وتنشط الانزيم
******
اما عن الاصلاح وباقي المكلمة دا كله سحر وشعوذة وتنجيم
انا لما باسمع الكلمة بترعبنـــــي كأنها شيطان ومسه رجيم
بأحس لساني مش قادر يكررها وابص ع الكرسي واقول يارحيم
اصلاحكو معناه الكراسي تنخلع والكرسي في عرفي مؤبد مستديم
الكرسي دا هو حياتي ومهجتي هو رفيق الدرب ف الليل البهيم
الكرسي دا هو نصيبي م الحياة وهو كل الآتي والعمر القديم
لو راح تروح مني الحياة وبصيصها ووجودي فيها يبقى خاوي عقيم
الكرسي وانا حتى واحدة مننفصلش الا بموتي او تولي حميم
الكرسي من حبه ساعات يكلمني ويقول لي انا السين وانت الميم
كلام في العشق لكن انا مش فاهمه زي كلام الصوفة كله طلاسيم
الكرسي من وجده ساعات يناجيني وانا ف حب الكرسي عاشق مستهيم
*****
ابني جمال طمعان في احسانكم خايف يضيع الكرسي م الشاب الوسيم
ابني جمال حامل جيناتي وخبرتي قلبه ف واشنطن والهوى من اورشليم
كم مرة اكلم بوش في الموضوع يقوللي ربنا يحنن وانا اقول ياكريم
لو تخدموه ها يعيش اسير افضالكو دا ابني وانا عارفه خدوم وكريم------

مبارك بسبب الزهايمر ربما لايعرف ان ريجان توفى

رسالة الى أوكامبو

ياعم اوكامبو يا الي قاعد على باب المحكمة تكتب بيانات الادانة والاتهام
لك من بلاد مصر العظيمة وشعبها المقهور ونيلها الفين تحية وسلام
نفسي تشرفنا برحلة ظغننة دا حنا غلابة وشعبنا منضام
دارفور تهون جنب الى حاصل عندنا دا احنا كوارثنا ما فيها كلام
حسني العجوز ومراته وابنه وشلته خلوا حياتنا ضلام ما بعده ضلام

خلوا البلد تشحت على جريدة وفلوس صحابهم ف البنوك اكبر من الاهرام
لو يوم تشرفنا برحلة صغيرة ها تشوف بلاوي بحق مش اوهام
فيه ناس بتغرق بالالاف ف العبارات والمجرمين قاعدين في لندن يصرفوا المال الحرام
وناس تقضي عمرها جوة السجون من غير جناية ولامحاكمة ولا اتهام
لوتدخل القسم ف قضية ملفقة ممكن ولادك تاني يوم ينضموا للايتام
وناس يدسولها العصا في مؤخرتها ويصوروها كمان ويوزعوا الافلام
وناس تطير من البلكونات زي الطيور من غير جناح زي ابن فرناس الهمام
والعادلي دا هو زعيم الجنجويد والجنجويد مع شعبنا اسوأ من الانعام
لو تبتدى تكتب قرارهم ع المسا يتسلموا للمحكمة قبل انت ما تخش السرير وتنام

مقتل سوزان تميم والشرمطة بأموال الشعب

يانظامنا يامقصر رقاب الشعب ف بحور الغرام ليه كل صبيانك نصيبهم م الهوى هجر وخصام

شايلينه ليه على كتـــــــــافكم ودايرين وكل معارككم يا عيني بتنتهي عند الكلام

نظام مصــــــاب بالعنة حتى ف نزوته والعجز عنده نهايته دايما الانتقام

قلتوا الفياجرا راح تداوي عجزكم جبتوها ف البراميل من الامارات وقلتوا دي بودرة رخام
اراضي مجانا وشركات بالهبل وفلوس ما يعرف حد مصدرها رهينة لارادة جميلة الشام
ملايين خلو رجل قبضها معتوق ونص مليون مصري نايمين ف المقابر ف الامام
مش هي دي اموال ولادنا يا غجر ياريتكوا حتى فلحتوا وسترتونا ف ساعة المنام
ليه المحلي ما لوش نصيب ويا النظام واسأل سميحة ف طنطا شوف دفعوا لها كام
الناس بتقتل بعضها عشان العيش ومش لاقيه وفلوسها يتشرمط بها اسفل نظام
لو كان قاتلها ولسا الدم على ايده القاضي جاهز بالبراءة زي عبارة السلام
القتل والسرقة وحتى الشرمطة من كل لون متاحة للكبرا واقطاب النظام
الله يخرب بيت ابو أمك يا بوش انت حاميهم وسبب كل المصايب والالام
يانظام عايش على جيفة فساد واقتصادك مبولة لكل السماسرة و اللئام
اي ضحكة من جميلة توقعه او سيقان غادة بتتهز في مهارة وانسجام
أكفي ماجور على الخبر لحد ما الشعب العبيط ينسي الامور ويتوه في زحمة الايام

مشرف مضى ومبارك جاثم

تسع ســنين فقط لاغير واخوك مشرف سابها بعد ما اعتذر
وانت ياريس ربع قرن وحتتين قاعد بتزرعها آلام وتحصدها جزر
والشعب كله بيدعي ربنا ياخدك او يجـعلك عبرة لمـن لا يعتبر
عاوز أقول حرام عليك تكتم مراوحنا اكتر من كده زي الحجر
يعني لو تطلع اجازة خمس سنين رحلة سياحة لاسيا او جزر القمر
الكرسي ما تخافشي عليه راح احرسه بعنيا مع عادلي واشباه الغفر
يمكن امورنا تتعدل لما تروح وساعتها ترجع تاني لو سمح القدر
اجيال وملت م الحياة وسابتها وانت الى قاعد زي تمثال او أثر
نفسي ياريس لو ضميرك يصحى يوم ولا انت اعلنت انتحاره ف مؤتمر
ليه الالاف تقضي حياتها ف السجون ومين حكم بانهم مصدر خطر
نفسي ياريس مصري يمشي ف الجنازة غير الجنود الميري وبقية الغجر
دا انت كراهية بلدنا لســـحنتك بتزيد على اوصاف لغات كل البشر

مبارك يرحب بموجابي وينصحه

اخويا موجابي ياشاغل فؤادي يارافع رايتنا هناك في الجنوب

تعبنا انا وانت وعاوزين نريح لكن كـــــل خوفنا تضيع الشعوب

بدأنا نختير وصحتنا تتعب وتظهــــــر عليـنا الحفر والندوب

لكن ليه تخلى المعارضة تنافسك وتحلم بعرشك برغم الخطوب

دا كل الى حلموا بعرش المبارك اندثروا وتاهوا ف ابعد دروب

دا ايمن وجمعة الى حلموا بمكاني بيقولوا ياريتنا دخلنا الحروب

هناك موتة واحدة وتبقي النهاية لكن عندي موت م الشروق للغروب
نصيحتي ترتب مع الامريكان وإلا مصيرك زوال أو شحوب

دا هما الدعامة وهما الضمانة لكل طاغوت ف المحن والكروب
أميركا بتحمي الطاغوت ضد شعبه وتملا فراغ البطون والجيوب

ف حجة لواشنطن ها ينسوا مساوئك ويملوا جيوبك وتبدأ تتوب

واشنطن بتشخط وتغضب وتزعـــل لكن ف النهاية بتغفر ذنوب

ساعتها هاتبقى حليفها المعسل وتبقي الموجابي قليل العيوب

ولو نص شعبك ينام ف السجون ها تبقى ف عنيها حبيب القلوب
ساعتها ها يخرص خصوم النظام وتبدأ تبرطع ما فيش لك حدود
وتترك مكانك لاصغر حفيد وتبقى البلد ضيعة سابها الجدود
توزع مغانم وتحبس بهايم وتكسر دمــاغ الغبي والحــقود
وتمشي ف واشنطن كأنك في بيتكو وتضحك لبوش ف حديقة الورود
ولو يوم دعاك للسلام ع البقر ف تكساس ها تبلع مناك في الوجود

في ذم الذين داسوا على الرئيس بالجزم في المحلة

داسوا على صورة مبارك بالجزم
داسوا على وشه الكريم المحترم
داسوا عليك ياحبيبنا يارابع هرم
*****
الجزمة شايفها قديمة مقطعة
لابسها شاب بتطل من بوزها
صوابعه الاربعة
بيدكها في وش الزعيم المحترم
والثانية مغروزة على الرقبة
الى كات متلمعة

*****
مشيت عليهم والدموع
نازلة اشد من المطر
صورته الكبيرة ف الميدان
ما بقاش لها اي اثر
ناديت عليهم هو دا صدام
بلادنا ياغجر؟
هو دا صدام وتمثاله الكبير
الى انكسر؟
مش هو دا برضو الزعيم
الى عبر والى انتصر؟
والى صحافتنا بتحلف حكمته
حامية البلاد من اي كارثة
او خطر

*****
قالوا دا صدام العجوز
ماشي على نفس الطريق
المختصر
بكرة ها نفتل له حبال المشنقة
وتكون من الليف المتين
المعتبر

تجليات الفكر الجديد في التعليم

عاوز انجح بالاونطة
واجيب مجموع كبير
دا بابا امن دولة
مش مخبر او غفير
دا جزء من النظام
ونفوذه يا ناس خطير
ياما بهدل ياما عذب
وداس على الضمير
وضيع عمره ياما
في خدمة الكبير
****
عاوز انجح مستريح
واجيب مجموع كمان
دا بابا عضو مجلس
وشاريلي الامتحان
عاوز انجح زي بابا
ما نجح في البرلمان
****
اللجنة لجنة خاصة
معمولة في المستشفى
ولاتسمع فيها همسة
ومراقبة جميلة باصة
اقول هاتي الكتاب
تجيبه بامتنان
****
وتقول لي بابا وصى
م المجلس ع المنصة
ان انت لازم تنجح
علشان يديك الكرسي
لايضيع مع الزمان
****
اللجنة لجنة خاصة
معمولة في المستشفى
والمرضى والدكاترة
واقفين معانا يدعوا
ويقولوا يارب هون
من غير ما تيجي كبسة
او ينكشف المكان
****
سؤالنا ف الجغرافيا
بلد حاكماها مافيا
واخدين الحكم عافية
وناسها عايشة حافية
على شمال السودان
****
سؤالنا ف التاريخ
شعب يحب الصريخ
ويقول هاعمل واسوي
وياخد على قفاه
ويقول انا مش جبان
****
سؤالنا في الفيزياء
نظام كله غباء
قاعد زي الوباء
والثورة في صدر شعبه
اكبر من البركان
****
سؤالنا في التكامل
نظام موكوس وخامل
بيحب ع الايادي
ويجب ع الرجول
ف واشنطن او بروكسل
او حتى ف اسرائيل
وصحافته العرة تكذب
وتقول دا نظام مناضل
****
سؤالنا ف الكيمياء
تفاعل مال وسلطة
ف قارورة جيش وشرطة
وظروف كلها مغالطة
وفساد يجيب الجلطة
تبقي النتيجة ايه؟
****
سؤال الانجليزي
دا سهل واختياري
ومش محتاج ذكاء
ياشعبي ياعزيزي
خد راحتك في الاجابة
واختار كما تشاء
يا إما الموت سحلا
وإما الموت غرقا
وإما الموت كمدا
وإما الموت جوعا
من قلة الغذاء

جوقة النفاق في مولد سيدي الأفاق

كلنا بنحبك يا ابو جمال

ونحب حرمكم والانجال

ونحب عصابتك ولصوصك

والشلة وبقية الاندال

دا الحب مكلبش في قلوبنا

ومولع صفحات الجورنال

*****

دي صحافة شيلني و اشيلك

وادفع لي وانور قناديلك

والمع ف الكرسي الباهت

والمع في الوش الكالح

كده تمشي امورنا عال العال

*****

بنحبك ونغني لمجدك

جدد لي ياريس واكتب لك

واقول ان الشعب بتاعنا

رغم ان مافيش لقمة ف بيته

عايش ف رخاء وف حرية

وماشافش العز الا ف عهدك

*****

كلنا بنحبك يا طاغوت

ونلمع فيك ونغني لك

من يوم ما بتلزق ف الكرسي

لحد ما ترحل وتموت

وساعتها نقول كان عهد اسود

ونغني لتاني هلفوت

*****

واحد بيقول مصر تولدت

يوم ما تولد الى ما يسمى

والتاني قلبه بقى منخل

م الحب ومحتاج لمرمة

والتالت قاعد بيغني

ويقول تخاريف العواجيز

هي الي ها تصنع لنا أمة

دي قلوب من حجر الصوان

ما يشيلها في جنبه الا الرمة

وعقول مشمومة ومضروبة

مش انضف من نعل الجزمة

*****

كتاب من جيل العبودية

في جنينة قصره تملية

واقفين بيسنوا اقلامهم

بايعين ضمايرهم بقروش

او حتى بقرصين طعمية

أكثر من ربع قرن

ربع قرن على الكراسي

دمروا فيها تاريخنا

وكرهونا في كل بكرة

وخللونا في المآسي

الرجول دابت وشاخت

والناموس والنمل سارح

والنظام هبة ويسقط

ويقولو لنا العرش راسي

****
ربع قرن من التأخر

والتخلف والضغوط

البشر ماشية في طريقها

الى ماشي بسرعة ماشي

والى ماشي نص مشية

الا مصر المستكينة

عاملة عقد مع الهبوط

****
ربع قرن الفقر نايم

في البلاد هو وحبايبه

المرض والجهل

والهم الى جايبه

اقتصادنا الباشا ناهبه

هو والاعوان بتوعه

بيقسموه بالعدل بينهم

اما شعب الغلبانين

بيسيبوه ملهي في جوعه

ولما يتنفس بكلمة

يسجنوه ويكربكوه

لما تتكسر ضلوعه

ف النهاية يمشي ساكت

يشرب الملح ف دموعه

****
ربع قرن من المهازل

والنهايب والفساد

خربوا فيها اقتصادنا

شحتونا وبهدلونا

وشردونا في كل واد

اللصوص والافاقين

كل ثرواتنا في ايديهم

يعملوا شركات وبيزنس

واحنا نتفرج عليهم

ولما نطلب حق منهم

نلمح السوط بين ايديهم

****
ربع قرن دا مش شوية

ربع قرن من المتاعب

والبلاوي والاذية

حولوا الشعب لعبيد

والبلاد عزبة ووسية

الى عايش فيها ضايع

او نهيبة او ضحية

الا ابناء اللصوص

او ولاد الكفتجية

****
ربع قرن من الطواريء

والمآسي والشجون

دمروا فيها عقولنا

وابتلونا بالجنون

ولما نتكلم ونرفض

او نقول الوضع مؤلم

يحدفونا في السجون

مبارك يدعو الشعب الى الاستشهاد

حل الشتاء
حل الشتاء وجاء شيطان الغلاء
حل الشتاء ومصر تتضور
ما بين سغب او هلاك او شقاء
الجوع يغتصب المدينة في شبق
والليل يطبق فكه فوق المغارات الرهيبة
في الخلاء
وصغيرة تبكي اخيها وجوعها
مات شهيدا في طابور الخبز
يوم الاربعاء
الخبز منثور على الارض
لم تمسسه يد
جاء مع الجثة في ايدي الاصدقاء
سقط مع الباقين في حوم الوغى
في معارك وقودها البؤساء
*****
قلنا يا مولانا المبارك هب لنا
من فضلك بعض الرخاء
الارض لم تنبت
والجوع لم يخفت
والصيف لم يخلف
سوى اشلاء
مس المبارك أليته
وبدا عليه الاستياء
قال انظروها انها عجفاء
كانت في زمن الرغد مثل
عرجون السماء
قال يا ابناء الكنانة دافعوا
عن عزكم وفخاركم وحياتكم
في صولة الطوابير
اني انا والشعب في الجوع
سواء بسواء
قدح من الحنطة في قبو بيتنا
هو كل ما يمنعنا ان نذهب الى المخبز
نزاحم الشهداء
يا شعبي ان والبلاء قد نزل
ومجاعة في الافق تطفو فوقنا
استحلفك بالله ان تفزع الى الطابور
فهي الشهادة من اراد نالها
وطريقكم للجنة الخضراء
في الجنة كم تبدو الحياة رخية
لاخبز..لاطوابير..لا اعياء
بل كل ما تصبو اليه وتشتهي
من مطعم أو مأكل أو ملبس
وفوق كل ما تستحب وتبتغي
تجد المئات من الصبايا والنساء
امضوا الى الجنة تعيشوا في رغد
ودعوني ادعو للشهادة ها هنا
واصارع الجوع كما الأنواء

تهنئة للعادلى بعضوية الشورى

مبروك عليك ياعمونا العادلي ***عضويتك ف المجلس البلدي

دبح وعذب وارضي اسيادك ***واسجن ولادنا قبلي او بحري

اللص واسياده يجاملو بعضهم ***والشعب يدفع شعبنا المخصي

مبروك عليك عضويته الحلوة ***دا هدية حلوة من نظام مزري

مبروك عليك يا عمونا العادلي ***جاتلك كمان فوق الحصانة حصانة

دبح وعذب وارضي اسيادك ***واخدم عميد الذل طرطور المهانة

دمر وخرب انت واسيادك*** دا مصر مهما بتعملو نعسانة

لافيه امل ولا فيه بصيص من نور*** ف عهدكم هي اسمها الخربانة

سوناتا لخط الفقر

ياخط يا الى ماشي زي الغيمة فوق راسي
شجرة كبيرة لكن حرها آسي
امتى ياخط تحل عني مودتك
وتسيبني اشرب م الامان كاسي
نفسي ياخط اطلع وأقب عليك
واحلف ما ا نسى عشرتك ولا اهلي ولا ناسي
ماشي ف طريقك تطحن الناس الى تحت
والى بيطلع عليك عمره ما بيآسي
*****
يا خط نفسي ف يوم تمل محبتي
لو حتى تلعن عشرتي مع صحبتي
نفسي تقول مليت وجودك تحت سقفي
ابعد بقى شوف لك مكان غير حتتي
انت ياخط مع نظامنا والعجوز
انتم سبب همي وشقايا وغربتي
*****
لما العجوز قال انتوا اهلي واسرتي
ها افرد عليكم رمشي لو جفني ما كفاش
ما كنتش اعرف انه يقصد حضرتك
لو كنت اعرف كنت قلت بلاش
دا كل يوم قاعد يغني علينا
واحنا نقول له قول كمان يامسيلمة
ويسقف الحرافيش مع الاوباش
قلنا دا حبه للفقير ها يشحتفه
اتاريه بيبني ف الهوا اعشاش
*****
نفسي ياخط ف يوم اشوفك في الحضيض
فارد جناحك ع الحشود
وانا باراقبك من بعيد
وكل ما تطول المسافة ما بين مكاني وخلقتك
راح اتولد انا من جديد
لكن قالوا لي الخط في العهد الجميل
ناشر قلوعه ف المداين والقرى
من البحيرة لحد طنطا وبنها
ونجوع الصعيد
والكل نايم مستكن ف قبضته
ولا عمرهم حلموا ف وجوده بيوم سعيد
*****
فيه ناس ما بينها وبين الخط من هنا للمحيط
وكل ما تزيد الارانب ف البنوك
يبهت الخط السميك سمك السما
وتشوفه خيط
والى ف عهد المبارك يحلم
انه يفر منه ويهجره
من غير ما يبقى من لصوصه وشلته
يبقى عبيط
*****
أنا ماشي برغم الخط باجرجر كل آلامي
وفيه ثورة غضب مكتوم بتشعل روحي ومسامي
باشوف الثورة في الشارع وف الاتوبيس
وف المخبز وف المصنع وف الجامعة
وصوتها بييجي في منامي
الاف صوتها بيهدر شوق للحظة صدق وتسامي
باشوف ضجة واشوف رجة واشوف دخان
لكن دامي

سرور ينام ملء جفنيه بعد التخريبات الدستورية

نام انشا الله تنام ما تقوم @@@ ياالي حرمت الشعب النوم

نــام انشا الله تنام الليلة @@@ وبكرة يقولوا عليك مرحوم

راح نرميـك ف مقابر الصدقة @@@ونوزع على روحك دوم

خازوق أنابوليس

يا رايحين المؤتمر

حبيبيي طال بيه السفر

يوماتي اسأل عليه

واحشاني نظرة عينيه

لكن لا بيرد السلام

ولا حتى حس ولاخبر

*****

يا رايحين انابوليس

قولو لحبيبي المعمص

كفاية غربة وسفر

دا طريقه ذي الليل

ولافيه ونيس ودليل

الا كلاب الغجر

*****

يا رايحين المؤتمر

يا مشرفين اهل الفرح

والليلة

املو جيوبكم بالنقوط

لان عروستنا الحليوة

اسرائيل

بعد الفرح ها تكون من

العيلة

*****

عباس حبيبنا يامعتدل

يا الى انت احلى من العسل

انت الحياة وانت السلام

وانت مفاتيح الامل

سيبك من القدس الشريف

واللاجئين

سيبك كمان من غزة وبلاها

جنين

احذر حماس هي العدو

واحنا المعين

بكرة اميركا تسلطنك وترستأك

وهنية راح من حسرته

يقشر بصل

*****

يا رايحين المؤتمر

يا اذكى من كل البشر

رايحين تغطو المهزلة

من امتى كان بيع الاراضي

والضماير والمصاير مرجلة

خايف لاييجي اليوم

ونصحي في التاريح

نسأل عليكم ما نلاقيش

ليكم مكان

حتى في قاع المزبلة

*****

يا مقرفصين في المؤتمر

دا خازوق مغري ومعتبر؟

واحد مفرشح ع الخازوق

قاعد بيتألم عليه

والتاني واقف ينتظر

واللهفة طالعة من عينيه

واحد بيسأل في ملل

شوفو اخونا حصل له ايه

ويرد جمع من الطابور

مستعجلين ليه ع الخبر

*****

يا راجعين م المؤتمر

اكفو ماجور على الخبر

لاتجيبو سيرة الخازوق

ولا الكرامة الجريحة

ولا الى ضاع والى انكسر

قولوا لاشباه الشعوب

جبنالكو حتة من القمر

الريس يستنكر الشائعات ويتوعد

عاوز ارتاح م الغلب دقائق***نفسي ارتاح م الشغل ثواني

كل ما اغيب لو حتى ساعات*** يقولوا دا جلطة وكاني وماني

شعب انا همي ان اشحت ليه*** م الامريكي وم الالماني

طول ايامي باجري عليه*** عايش على فضلي واحساني

ولما يقول اعدائي دا فيص*** اسمـــــع فرحتهم بوداني

توصل حتى لضرب النار ***مع رقـــــص وافراح وتهاني

عاوز اطمن شعبي الغالي*** دي مجـــرد احلام واماني

مهما تقولوا عجــوز ومكحكح*** انا مالي مركزي ومكاني

قاعد على قلبكوا لطالوت ***وها اغيظكم واتجوز تاني

عاوز حاجـــــة "بالكرتونة"*** تستوعب ثورة وجداني

انسى معاها قلوبكو السودة*** وانسى قرفكم وانسى زماني

وانسي الكرسي الى مجننكم*** وارجع لشبابي الاولاني

عاوز اجدد كــــــــل حياتي*** وادفن اوهامي واحزاني

مهما تقولــــوا انا قاعد قاعد*** وها اجدد وابدأ من تاني

انا مش ناوي اسيب الضيعة ***ياخدها شيوعي او اخواني

ف اول جلطة ان شاء الله ***راح اسلمكوا لنجلي التاني

والعادلي ها يفضـــل وياه*** وها يبسطكم أوي علشاني