الشعب يحذر مبارك
اوعى تغامر اوعى تقامر***المسألة مش ناقصة مجازر
حاذر تعمل كارثة كبيرة ****حاذر حاذر حاذر حاذر
تلاتين سنة وانت بتقهرنا ***فاهم نفسك جن وشاطر
لكن شوفت الذل جبال ***ذل ما لوش اول ولا اخر
ذل يخلي الطفل يشيب ***والميت يطلع له ضوافر
ذل يساوي سنين وقرون***عشته ف يوم واحد ف يناير
لملم قرشينك على مهلك ***واخلع على عشرين فبراير
اخرج قبل ما تحرق بلدك ***بطل تبقى حقير وتكابر
اسيادك حتى لفظـــــوك ***وقالوا لك ابــــعد واتاخر
***
طول عمرك وانت بتخدمهم***وتحاول دايما ترضيهم
لكن لما تسيب السلـــــطة ***مش هاتحود على اراضيهم
اول ما بتضعف تنشاط ***خيبتك واضحة وعبء عليهم
وتشوف ان الكون على وسعه*** لو هاتجيبه ما يملا عنيهم
لازم تمشي..لازم تمشي*** وحيــــــــاتك تبقى في ايديهم
لو حبوا يحاكموك ع البركة***ولو طنشوا هاتبوس رجليهم
***
لازم تخرج برة بسرعة ***الصبـــــــــــر بينفذ م البير
ما تاخدهاش على انها عركة*** لازم تخرج منها كبير
اسيادك امروك تتنحى ***وامنـــــك في ايديهم يا خبير
طول عمرك وانت بتسمعهم*** وتنفذ من غير تفكير
اشمعنا ف موضوع الكرسي*** عاوز مــهلة للتدبير
لو لازق في الكرسي ياريس ***هانحاول فك المسامير
لو كانت صدت واتاكلت***ممكن نستخــــــدم مناشير
لو صعب انك تبعد عنه ***راح ندفنه وياك في الجير
لكن لازم تخـــرج برة*** ودا اخر ...اخر تحــــــذير