من زين العابدين التونسي الى زين العابدين المصري
شوفت ازاي الـــعالم قاسي*** بيورينا همــــــــــــــوم ومآسي
بعد سنين بنسيب الضيعة ***ونودع بالحزن كــــــــــــــراسي
ست ساعات وانا ف الطيارة ***مش عارف رجلي من راسي
ماشي اخبط ع الابواب ***واسأل فين اصحابي ونـــــــــاسي
لكن الكل بينسى بسرعة ***ان كتير شربم من كاســــــــــــي
وان الكاس دوارة علينا ***مهما تقول العالم راســــــــــــي
****
فين الشرطة فين الجيش*** كله تبخر... كـــله مـافيش
الشعب اما يقولك تمشي ***اوعي تقوللي وما تقوليش
لم عيالك لم عــــــزالك ***المسألة ما فيهاش تــهويش
الشعب اما بيرفع صـوته*** بتيجي الثورة ما بتخليش
وتحس ان حياتك راحت*** مستني لحظة ما بتجيش
وتحس انك رغم سنينك ***عـصفورة منتوفة الريش
ف الاخر بتلم هدومــك ***وف أي مصيبة بتــــعيش
وتقضي ايامك مــستني ***ملاك الموت زي البقشيش
****
مهما تقدم ف تنازلات ***او تعمل ليهـــــــــــــم قرارات
او تحلف ها تصلح حالك *** او توعدهم بانتخابــــــــات
مع اول خطوة بترجعها ***بيبدأ عهد الانتكاســـــــــــات
الشعب اما دماغه بيركب ***بيقولك م الاخــــــــــر هات
يلا الحقني ف جدة بسرعة ***وارحم نفسك م الاهـــانات
الزالزال باديء من تونس ***وتوابعه ها توصل في ساعات
لما الكرسي يروح من ايدك*** ها تقضي أيـــــامك أزمات
الى يقولك مش عايزينك ***والى يقولوا دا كلـــــــب ومات
وحياتك تبــدأ في النازل ****احزان ومهازل وآهـــــــــات
حتى الموت بيعز عليك ***ويجيلك من غير سكـــــــرات
****
ساركوزي طول عمره حبيبي*** ومعزتـــــــه في القلب كبيرة
قلت اكيد ها يرحـــــب بيا ***عارف برضه معايـــــــــا خميرة
ساعة لاطعني على التليفون ***قالوا سكران من شرب البيــــرة
بعد شويـــــــــــــــة رد عليا ***قال لي اخويا حبـــــــــيبي الزين
قلت له انا ف ورطة كبيرة ***محتاج احط رحالي يـــــــومين
انا خرجت خلاص من تونس ***ومافيش فرصة ان ارجع تاني
قال لي اخويا حبيبي الزين ***لو ف ايديا اسيب له مـــــكاني
انا مش عارف اعمل ايه ****الموضوع بيزيد احــــــــــزاني
كان نفسي احطك ف عنيا ***مكانك في النني الجـــــــــواني
لكان عارف شعب فرنسا ***ها يقولك كاني علــــــــى ماني
انا مكسوف ان انا اقولهالك ***بس ياريت تفهــــــم علشاني
****
فيه فيـلا ع البحر جميلة*** قلت ف جدة ان انا عاوزها
قالوا مبارك سبقك ليها ****باعت من شهرين وحاجزها
مسيره ها ييجي بعد شوية*** وجدة بتستقبل عواجيزها
جدة مدينة جميلة ياريس ***احلى ما فيها البحر الاحمر
والشمس بتغطس في المية ***والكورنيش بالليل بيـنور
عبدالله اخونا مضـــــياف ***وسخائه فوق كـل تصـور
كله بييجي ويركن عنده***أي رئيس مخلوع متـــــعور
بس انا بيجي لي كوابيس ***ان انا قاعد في الـــطيارة
والمطارات كلها مقفولة ****والطيار مستني اشــــــارة
وعداد البنزين على آخره ***واحنا بنتدحرج في مغارة
واصحي ألاقي نفسي مخشب ***ودموعي نازلة بغزارة
****
تلاتين سنة وانت نتحلبها ***وأكيــد عامل قرش كويس
يلا تعالى الحقني ف جدة ***نقـــــعد هنا ع البحر نتيس
نحكي عن الأيام الحلوة ***ايام كنــــــا انا وانت الريس
ايام كان الشعب بتاعنـا ***ينحني لما يشوف لنا صورة
لو كانت ملزوقة ف شارع ***او حتى ف حارة مهجورة
ويرفع ايده ويهتف لينا ***ويقول دا زعيمنا الاسطورة
ايام كان همهم العيش ***واللقمة بياكلوها بـــــصعوبة
ويقولوا ان حياتهم عال ***مع انها ماسخة ومخـروبة
لكن تعمل ايه للعالــــم ***عشنا وشوفنا شعوب أعـجوبة
