من ولد الصايع الموريتاني الى ولد الضايع المصري
بابعت لك بجوابي الحالي
من شقة في اراضي النيجر
بالتحديد من العاصمة نيامي
انا مش عارف لها عنوان
بس معلمها بالمتجر
الى انا باقضي فوقه ايامي
عايز اقولك خدها نصيحة
من واحد في النيجر صايع
اوعى تعزي في ميت تاني
لان الايام مش مضمونة
ممكن تخرج بعد جنازة
ولسه الميت داخل قبره
تدخل انت في عالم تاني
لو جالك مرسال من اخوك
بيقولك ان ابوك مات
روح بس القي نظرة عليه
نايم ف الشارع الوراني
قل مصلحة الشعب اهم
ووجودي مش راح يعمل حاجة
ولا هايصحي الميت تاني
اتعلم من اخوك الطايع
بعد جنازة بقى اسمه الصايع
وانقلبت كل الاوضاع
لا انا عارف انا ها اعمل ايه
ولا عارف على فين انا رايح
اوعي تعزي ف حد يموت
دا الاعمار كلها بتفوت
والواحد من غير الكرسي
بيضيق العالم على وسعه
كأنك يونس جوة الحوت
فنجل عينك على اعوانك
شوف مين منهم عينه بترمش
او مين منهم راح يتاوب
الاشياء دي مهما تخبي
بيبقى لها ف الوش معالم
اوعى تسلم نفسك ابدا
لواشنطن او تل ابيب
طول ما انت قاعد ع الكرسي
تخدمهم وتشوف مصالحم
ها تبقى صديق وحليف وحبيب
واول ما بتنشاط م السلطة
تلاقيهم ماسكين قباقيب
بيعاملونا باستحقار
ويبصو لامثالنا انا وانت
على اننا عملاء تافهين
اول ما بيفقدو وظيفتهم
يرموهم وسط الكراكيب
اوعى تكون فاكر امريكا
هاتحرك جيشها وتحميك
او ها تروح تنتزع الكرسي
من غيرك وتسلمه ليك
دي اوهام عشتها من قبلك
وادي نتيجتها جوابي اليك
اوعى تسيب العاصمة في يوم
ويكون اعوانك جواها
مش ها تشوف بعنيك النوم
لو عسكري ارتاح لهواها
اوعى تسيب الكرسي دقيقة
او تبعد عنه امتار
ممكن ترجع بعد ثواني
تلاقيه في ايدين الشطار
خلي العسكر يمشوا معاك
مطرح ماتروح اوعى تسيبهم
لو شافوا ف غيابك الكرسي
ممكن مشاعرهم تغلبهم
او هو بنفسه يجذبهم
حاذر من الحرس الجمهوري
اول ناس سيطروا على العاصمة
رسموا العملية باحكام
ونجحو في التنفيذ بجدارة
ولا واحد منهم خاد كدمة
انا اخوكم ولد الطايع
لحد امبارح كنت رئيس
دلوقت بقيت اسمي الصايع
قاعد لاجيء عند النيجر
والشقة ما لهاش عنوان
بس معلمها بالمتجر
اخوكم الصايع
(الطايع سابقا)
posted by مجــلة الإعصـار at
2:35 PM
|
0 comments
links to this post
