كوندوليزا رايس تحرك الدمى

ليزا ليزا
حلوة لذيذة
هزت صاحبك
خلت شكله ما يسوى بريزة
هي صحيح ناشفة ومحروقة
ولسانها حركاته عزيزة
لكن لما بتشخط شخطة
تتهز لها اهرام الجيزة
قالت لابو الغيط مش رايحة
قال له مصيبة ياريس سايحة
لو ها نغضب ستنا ليزا
دي صديقة بوش المجنون
الى حلف بدماغ ابو امه
لا هو شايل صدام في يومين
قال له ابعت لى الترزي بتاعي
انا عارفه لا هو ذكي ولا واعي
بس اما يفصل قوانين
تقول دا معلم ابن افاعي
جابوا الترزي شايل ادواته
حبسوه في الاوضة ايام
خيم صمت غريب على القصر
وهو لوحدة جوة الاوضة
هو لوحده وملفاته
لحد ما نادي على الحراس
فتحوا الباب وخادوه على طول
قال له ياريس كله تمام
انا فصلت قانون مسحور
لما تبص عليه بالعرض
تقول الجنة و فيها الحور
ولما تبص عليه بالطول
تقول دي مغارة جوة بحور
خادوا وطار بيه على االمنوفية
قال ياجماعة دا عهد جديد
انا ها اعمل فيها ديمقراطي
وابعتر على الشعب امتيازاتي
واخلي الناس تذكر حسناتي
وابدأ عهد معاكو جديد
الناس سمعوا كلامه في ذهول
قالو اخينا صبح مخبول
ولا دماغه دي طاسة فول
الى حصل له ده مش معقول
ما حدش عرف الى مخبيه
شخطة ليزا في وزيره وفيه
اجتمعو المديحة اياهم
كل واحد يهتف بنشيد
قالوا دي "أزهى عصور" عشناها
كله جديد في جديد في جديد
لكن كانوا من الخوف تايهين
اجتمعوا باخينا في السر
وقالو له مودينا على فين؟
هاترمي الجاه و السلطة بلاش
وتطمع فينا الاوباش
ما حدش راح يقدر يوقفهم
ها نعيش أيامنا على كيفهم
ونظامنا يخش الإنعاش
لكن شافوا في عينيه أحزان
وهموم راجل في خبر كان
فهموا : مشاكل في التمديد
فيه اعتراضات من جوة وبرة
ومن أمريكا بالتحديد

17 ابريل 2005